Read obolo Asaya 61 Bible Online

Asaya 61 - obolo bible

Asaya 61

¹Ekwukwu Ogwukaan̄-ene Okumugwem òwa me lek n̄a, mije, Okumugwem îtọkọ emi aran̄ me ibot, ibe emi ǹsi ǹlook ebi ugbọọn̄ ata etip, mè ǹsi ǹsiki ejit ebi ufieejit, mè ǹsi ǹtumu ǹnyi ebi ekpulube me akọn̄ ibe ke ema mîkaan̄ utelelek, mè ǹtumu ǹnyi ebi mkpọn ibe ke mîsan̄a ema isibi me udun uwu mkpọn.

²Ìbe emi ǹlook ibe ke acha Okumugwem oborọ nnwọn îre, ke usen Awaji kiji obokpe useen̄ inu erọbe îkem; mè ǹsa me ikeya ǹkat ejit otutuuk ebi ìkifieek ejit.

³Ìbe emi m̀kpọ chieen̄ me lek ebi ìkifieek ejit me Sayọn; mè ǹnyi ema uja ekwut ichit-ibot, kpan̄asi ntọn̄, mè aran̄ utop olu òkinyi ubelejit, kpan̄asi ufieejit, mè ofọnti itọn̄, kpan̄asi ekwukwu eyi ugwuuk. Mêkigwen ema uti ilip echi ata irọrọ, echi Okumugwem owopbe isasa inyi lek kan̄ umin.

⁴Ema mêkpọk inama ama cha egbugbọbe igwook me ukot ikaan̄, mè ineen̄ ere ekpukpukube igwook karake akat cha isun̄; ema mêkpọk inama ama efiatbe igwook cha, inyi ikana ayaya, ere cha ekpukpukube igwook karake ukot ukot môkana ayaya.

⁵Ebi ichen ebekikpukpo urum arọọn̄ kinyi inyi enyi, ebi ofifi ido ebekirọ ikwaan̄ uko inyi enyi, mè ikiwop si uko gerep kinyi.

⁶Ire enyi, ebekigwen enyi ebi ngwugwa Okumugwem, mè ikigwen si enyi ebi ikwaan̄ Awaji kiji. Inu ubọọn̄ ebi ido geelek ke enyi ebekirie, inu ubọọn̄ kiban̄ ke enyi ebekisa igugo lek.

⁷Me useen̄ esip ebi n̄a ebọkọbe, ebekaan̄ umin mgbọ iba itoon̄ urọt, me useen̄ ochak, ema ebenwọọn̄ unwọọn̄ me lek ìrot kiban̄; ema mêrie ìrot mgbọ iba itoon̄ urot me lek ijọn̄ kiban̄, unwọọn̄ kpotabe obokup inyi ema.

⁸“Mije, emi, Okumugwem, mma unen oyerebet, mè icha inọ agam mè ijo irọrọ. Mâkpe ema mkpukpe me atikọ, mè inyan̄a ibot môkupbe ire mgbọ geelek melek kiban̄.

⁹Owot iman kiban̄ mêtaan̄ etip me etete ebi ido geelek, bọn bọn kiban̄ mêtaan̄ etip si me etete ebi ife geelek. Ebi geelek mêmun̄be ema mêriọọn̄ ibe ke ema ìre ife Okumugwem ogbanabe.”

¹⁰Ejit îkitop emi enenen me lek Okumugwem; ibot ejit n̄a ìkinwọọn̄ unwọọn̄ me lek Awaji n̄a. Mije, îsa unyan̄a kan̄ ichit emi lek kubọk ofọnti, mè isa ata irọrọ igwook ichit emi lek kubọk ofọnti inyọn̄, kubọk ogwu òdo nwa okikwuun̄ inu òbet lek okpibot ogwu ngwugwa me ibot kan̄, mè kubọk nwa òbat olom okisa ewuuk unye otu ewe ibala lek.

¹¹Ike ijọn̄ okirọ inu ewopbe itibi isibi, mè ike ijọn̄ uko okirọ ukwuuk uti ibum otu isibi; ikeya ke Ogwukaan̄-ene Okumugwem oborọ ata irọrọ kan̄ mè itọn̄ kan̄ itibi isibi me isi otutuuk ebi ido geelek.