Read obolo Asaya 62 Bible Online

Asaya 62 - obolo bible

Asaya 62

¹Bak me lek Sayọn, emi m̀kpariaan̄ ere, mije Jeruselem, emi m̀kpachit otu, mege ata irọrọ kan̄ môkibum itoon̄ inu kubọk utoon̄ egwe, mege unyan̄a kan̄ môkisak kubọk ukan̄ nlak.

²Owu Jeruselem, ebi ido geelek mêmun̄ ata irọrọ kwun̄, otutuuk ebi ubọọn̄ geelek mêmun̄ umin kwun̄. Mêkigwen owu aya erieen̄, eyi Okumugwem obosan̄a owu.

³Owu môbet lek okpibot ubọọn̄ òkup òrirọ òrirọ me ubọk Okumugwem, mè ibet lek ọgbọn ubọọn̄ me akajit ubọk Awaji kwun̄.

⁴Kpebeyaka ikpọk igwen owu Ama Ejijit, kpebeyaka ikpọk igwen si ijọn̄ kwun̄ Ijọn̄ Eyayat Itele. Ire, ebekigwen owu Ama Òbebele Awaji Ejit,[24] mè igwen ijọn̄ kwun̄ Ogwu Òkaan̄ Olom,[25] mije, Okumugwem îbele ejit me lek kwun̄, ijọn̄ kwun̄ si môkukup kubọk nwa òkaan̄ olom me lek.

⁵Ike gwun̄ enerieen̄ okido obaak enenwaan̄, mè ikana ogwukaan̄, ikeya ke bọn kwun̄ ebere ebikaan̄ kwun̄; Ike aya olom okibele ejit me lek aya nwa kan̄, ikeya si ke Okumugwem obobele ejit me lek kwun̄.

⁶Owu Jeruselem, nra iria ebi mbem igwook me inyọn̄ mgban kwun̄; ikarek mè eririeen̄, otu kiban̄ ìkpochit. Enyi ebi ìkiriaak uriaak igwen Okumugwem, ikasiki efuuk.

⁷Ikachechieek ibe ọmọ isiki si efuuk mege ọmọ orọ Jeruselem ikeke inye, mè ikana ere ebi linyọn̄ ebekitọtọn̄.

⁸Okumugwem îsa ubọk ulom kan̄ inyan̄a ibot, mè isa si unye eyi ubọk kan̄ înyanabe inyan̄a si ibot ibe: “Emi m̀kpayaka isa akpa kinyi inyi ebi ochicha kinyi esa erọ inorie; m̀kpayaka isa si aya miin̄ enyi ekwukwulube me lek ikana inyi ebi ofifi ido ibe enwọ.

⁹Ire, enyi ebi ìwowop, mè irọkọ, eberie, mè itọn̄ Okumugwem, enyi ebi ìtititiin̄ gerep cha ebenwọ miin̄ ònan̄a me lek me emen oyet egep n̄a.”

¹⁰Ìje ìtibi, ìje ìtibi me otunchit! Ìnen̄e oniin̄ ìsun̄ ìnyi ebi ene. Ìbum, ìbum uga oniin̄! Ìteen̄ okpọkọ ewuuk ìsan̄a. Ìtaba egop ìbene ìnyi ebi ido geelek.

¹¹Okumugwem înyi ulook ikana ire ntutun̄ ere geelek me linyọn̄ ibe, “Ìtumu ìnyi ebi ama Sayọn ibe, ‘Kpọ, ogwu Unyan̄a kinyi òkinu! Kpọ, mkpukpe kan̄ me ubọk kan̄, îsa inu ìbosa iniwaak enyi ubọk igbaalek ikinu.’ ”

¹²Mêkigwen ema Ebi Mbuban, ebi Okumugwem Ofakabe Isibi; mè ikigwen owu Ama Ekiweweek, mè Ama Kpejijit Itele.