Read obolo Asaya 63 Bible Online

Asaya 63 - obolo bible

Asaya 63

¹Ekene ire ogwu òkinan̄a me Edọm inu, òtap ofọnti eje eje, mè ikinan̄a me Bojira inu? Ekene ire ogwu, òbabala lek ikup ikeyi òrirọ òrirọ, mè ikisaba ukot ikije me umin kan̄ melek unye kan̄? “Îre emi, ogwu òkitumu ikọ ata irọrọ, mè ikaan̄ unye isasa inyan̄a ene.”

²Keke orọ ofọnti kwun̄ orebe araran̄, kubọk eyi ebi ìkijak gerep me ere ichimi miin̄?

³“Emi gaalek njak gerep me ere ichimi miin̄; ene geege me lek ebi ofifi ido ìkakup melek n̄a. Ǹsa me unaan̄-ejit n̄a ijak ema, mè isa me uyok uyok unaan̄-ejit n̄a ijak ema otutuuk ikpukpuku iriọk; eje kiban̄ onyanyan igwook me lek ofọnti n̄a, mè iken emi lek ekwut.

⁴Mije, usen irọrọ useen̄ ìkukup emi me ejit, acha mbafaka ene isibi îra ire.

⁵Mkpọ, ǹkamun̄ ogwu ntap-ubọk geege, îyọt emi me lek ibe ke ene geege ìkatap ubọk; îre ubọk n̄a gaalek orọ ikwaan̄ unyan̄a inyi emi, uyok unaan̄-ejit n̄a otap emi efuuk me owot.

⁶Nsa me unaan̄-ejit ijak ebi ido geelek igwook; mè isa me uyok unaan̄-ejit n̄a irọ ema enwọ esa, mè igwook eje kiban̄ me ijọn̄.”

⁷Mâkpa nnwọn inu cha Okumugwem orọbe, ikwaan̄ cha echi mêbakbe me lek itọn̄ ọmọ, ikpọ me lek otutuuk inu echi Okumugwem orọbe inyi eji. Mâkpa owuwa ata inu îrọbe inyi ebi uwu kè Ijeren, ikpọ me lek nsan kan̄ mè owuwa ikwaan̄ ata ejit kan̄.

⁸Ọmọ onenibe, “Me atikọ, ema ìre ebi n̄a, bọn ebirieen̄ ebi kpere ebi ofiaan̄.” Sa me ikeya ke îkana Ogwu Unyan̄a kiban̄.

⁹Me emen ukwook kiban̄ geelek, ọmọ îkwook ukwook, ogwu osat òkup me isi kan̄ onyan̄a ema. Ọmọ îsa me imumechieen̄ kan̄ mè nsan kan̄ ifaka ema isibi; karake ukot ukot ke îbene ema ifo inyọn̄, mè ikibeen̄ ema ikaan̄.

¹⁰Ire, ema ekpakpaka ibot, mè itap Ekwukwu Mbuban kan̄ ufieejit. Eya orọ, igwugwu ikom, mè inikana ogwu ochicha inyi ema; ọmọ me lek kan̄ otitim ema akọn̄ me lek.

¹¹Mgbọ ya, ebi kan̄ enenikeek mgbọ ukot ikaan̄ ya, mgbọ Mosis osabe ebi kiban̄ isibi me Ijipiti, mè ikitaan̄ ukpo ibe, “Mọmọ ogwu òsasa ema isaba okwaan̄, melek ogwu òkikpukpo urum arọọn̄ kan̄? Mọmọ ogwu òtoto Ekwukwu Mbuban kan̄ itele me etete ebi kan̄?

¹²Mọmọ ogwu òraria ubọk mgbugbo kan̄ òkakaan̄ unye me lek ibe ikup me agan̄ ubọk ulom kè Mosis? Mọmọ ogwu òcheche mun̄ irek iba me isi kiban̄, isa irọ etip kan̄ itaan̄ ire mgbọ ikakaan̄ge itata?

¹³Mọmọ ogwu òsasa ema ije itibi irem okwaan̄, ema ejeje ukaan̄-lek ukaan̄-lek kubọk inyinya oje me emen èwê, kpetọbọ ukot me lek inu geege?”

¹⁴Ema eje kubọk eriembuuk ikikwala isiki me lek iteke ijọn̄, Ekwukwu Okumugwem okekirọ ibe ema esiki efuuk. Ikeya ke owu osa ebi kwun̄ ije, mè isa me ikeya ikaan̄ erieen̄ òkup mgbugbo inyi lek kwun̄.

¹⁵Kup me emen inyọn̄ siki chieen̄ kpọ, mè kup me ere mbuban mè ere mgbugbo olukbe ya mun̄ lek. Mọmọ ulọk kwun̄ mè unye kwun̄ ya? Owu otet nnwọn udọk udọk ejit kwun̄ mè nsan kwun̄ ikaan̄ me lek kiji.

¹⁶Ire, owu ore Nte kiji. Ebereyam ìkariọọn̄ eji isi, Ijeren ìkariọọn̄ ogwu eji erebe; ire, owu Okumugwem ore Nte kiji, erieen̄ kwun̄ karake akat ìre Ogwu Òfaka eji Isibi.

¹⁷Okumugwem, keke orọ otelebe ibe eji eje elọ oniin̄ kwun̄, mè irọ ejit kiji inye, ufuna eji ekayaka ìkitet ukpook me lek kwun̄? Gwu kom na, sa mije ebi ikwaan̄ kwun̄, ebi otoko cha echi owu okaan̄be me ìrot.

¹⁸Sọnja mgbidim mgbọ gaalek ke ebi kwun̄ ekaan̄ ere mbuban kwun̄, ire, me mgbọ keyi, ebi ochicha kiji ejajak ere mbuban kwun̄ ikpukpuku igwook.

¹⁹Eji mîkana ikup kubọk ebi owu òkararak ìkpulu karake ukot ikaan̄. Eji eyaka inikup kubọk ebi ebi ene kperarak ikigwen ibak erieen̄ kwun̄.