Read obolo Asaya 65 Bible Online

Asaya 65 - obolo bible

Asaya 65

¹“Ebi kpedodo emi ke emi mkpọk mbum lek n̄a inyi, ebi kpeweweek emi, ema eweek emi imun̄. Ido ìkakigwegwen erieen̄ n̄a ke emi ntumu inyi ibe, ‘Kpọ emi ire eyi, kpọ emi ire eyi.’

²Bene me ewelegwe fit egwe, emi ǹkiwewele ubọk n̄a inyi ebi ife unye-ibot, ebi ìkije me oniin̄ echi ikatatge, mè ikilibi igọọk inu òkup ema me ekiket.

³Ema ekirọ emi inu unaan̄-ejit mgbọ geelek, isi mè isi, mè ikigwa ngwugwa me emen uko, mè ikiwọp nsensi me inyọn̄ ntook okpungwu.

⁴Ema ekisiki ikweek irek me etete udọn̄-ufuun̄ me oron ekwukwu, mè ikitop chieen̄ otutuuk eririeen̄ me ere nlelet; ema ekitaka okodi, emen otin̄ kiban̄, mun̄ usun̄ anam òkaan̄ mbuban me lek ojot.

⁵Ema ekibe, ‘Kpebe si kup me lek kwun̄; kaje ìgbet emi lek, inyi nkachaka owu mbuban me lek!’ Ife ìkup ikecha ìre oduku òkikaba emi emen inwọm, mè ikinaan̄ emi ejit kubọk ukan̄ òkisak, ibene me ewelegwe ifit egwe.

⁶Ìkpọ, egege isun̄ me isi n̄a; emi m̀kpariaan̄ ere, ire, m̀bakpekpe ema òjot òjot; m̀bafufuk mkpukpe ijo inu kiban̄ igwook ema me inyọn̄ ukot.

⁷Mâfuk mkpukpe ijo inu kinyi mè echi ebi nte nte kinyi inyi enyi. Emi Okumugwem ntumu. Ebi nte nte kinyi mîwọp nsensi me inyọn̄ ogoon̄, mè ikpaka ibot inyi emi me inyọn̄ orioon̄. M̀batọtọ mkpukpe ijo inu cha ema erọbe iraka òjot òjot, mè iben igwook ema me inyọn̄ ukot.”

⁸Okumugwem ìtumu ibe ikeyi: “Ìkire, isimun̄ ibe ke mun̄ îsik me emen njọ gerep, ebi ene mîra ibe, ‘Kajijaka, ke îkaan̄ inu mêmọnọbe me lek,’ ikeya si ke mbarọ me lek ebi ikwaan̄ n̄a; emi m̀kpajijaka otutuuk kiban̄ isan̄a kpai.

⁹Mâsan̄a bọn owot iman isibi me owot iman kè Jekọp, mè isan̄a ebi ìbenikaan̄ ogoon̄ n̄a me ìrot isibi me owot iman kè Juda; ebi ngobobe inyi lek n̄a ebekaan̄ ogoon̄ n̄a cha me ìrot, ere ya si ke ebi ikwaan̄ n̄a ebeluk.

¹⁰Me lek ebi n̄a ebi ìkiweek emi, Sarọn môre ere urum ebot mè arọọn̄ kiban̄ obokitaka mbubet, iteke Akọ môrere ere urum eriembuuk kiban̄ obokililam.

¹¹“Ire, enyi ebi ìjijit emi Okumugwem, mè iwuuk ogoon̄ mbuban n̄a, mè isi ito ikasi inyi Gadi, òrere awaji òkinyi ene atisi, mè ikigwa miin̄ ijot ekpen̄ isa inyi Meni, òrere awaji òkikpọ chieen̄ me ònu-me-isi.

¹²Emi ndọmọ oge akọn̄ isun̄ iban enyi me mgbọ ònu me isi kinyi, otutuuk kinyi mêgele ikwuun̄, inyi ekpan̄ enyi etutọmọ; mije, ngwen enyi, enyi kpebọkọ otu, ntumu ikọ inyi enyi, enyi kpegban̄ utọn̄. Enyi ekirọ ijo inu me isi n̄a, inu emi nkamage, eya ke enyi ekima ikekirọ.”

¹³Eya orọ, Ogwukaan̄-ene Okumugwem ìtumu ibe ikeyi: “Ìkpọ, ebi ikwaan̄ n̄a mêkirie, ire, enyi mêkiran̄ ọfiọọn̄; ebi ikwaan̄ n̄a mêkinwọ, ire, enyi mêkirak ebek; ebi ikwaan̄ n̄a mêkinwọọn̄ unwọọn̄, ire, esip obokitet enyi.

¹⁴Ìkpọ, ebi ikwaan̄ n̄a mêkikọt okwa, bak me lek unwọọn̄ òkup ema me ejit; ire, enyi ebekitaan̄ ukpo, inan̄a me lek uga ufieejit òkup enyi me ejit, mè ikito ito, bak me lek ejit kinyi okpukpukube igwook.

¹⁵Enyi isikwaan̄ iraka, erieen̄ kinyi môkana inu ebi emi ngobobe inyi lek n̄a ebekisa ifieek otu inyi ene; Ogwukaan̄-ene Okumugwem môrọ enyi ekwaan̄ esan̄a, ire, mônyi ebi ikwaan̄ kan̄ esese erieen̄.

¹⁶Ogwu geelek òbotan̄a ugbana inyi lek kan̄ me inyọn̄ ijọn̄ yi, ìbokisa Awaji atikọ itan̄a ugbana; ogwu òbonyan̄a ibot me inyọn̄ ijọn̄ yi, ìbokisa Awaji atikọ inyan̄a ibot. Mije, mêwuuk ufialek mgbọ òraraka cha, ufialek cha si ìbolelet me chieen̄ n̄a.

¹⁷“Ìkpọ, emi gwa ǹkirom ayaya isinyọn̄ mè ayaya linyọn̄. Kpebeyaka ikeek inu echi òraraka cha, inu cha si, ìkaboninin̄ si ene geege me ekiket.

¹⁸Ire, ìbele ejit, mè ìnwọọn̄ unwọọn̄ ìre mgbọ geelek me lek inu mbarom, mije, mârom Jeruselem, inyi ire inu ubelejit, mè irom ebi kan̄, inyi ere inu unwọọn̄.

¹⁹Mânwọọn̄ unwọọn̄ me ibot Jeruselem, mè ibele ejit me lek ebi n̄a; okput ito mè ida ukpo, kpebeyaka inọ me emen kan̄ ofifi.

²⁰“Nsek gwun̄ òboluk egwe inen mè inen gaalek, mè ìre ogwu ugane ogwu kpolukbe acha ugwem kan̄ iso, ìkpoyaka ikup me emen kan̄. Ogwu môlukbe efit acha, mè ikwu, ebemọnọ ibe ogwugwa ìkwu nsek nsek; ogwu ìkaluk ìso efit acha ge, ebefuk ogwugwa kubọk ogwu efieekbe otu inyi.

²¹Ema mênama uwu, mè iluk me emen; ema mêwop uko gerep, mè irie mfut kan̄.

²²Ema kpebeyaka ikinama uwu, mè ebi ofifi ife èneluk me emen, kpebeyaka ikiwop uko, inyi ebi ofifi ife enerie. Mije, ike uti okifuk ugwem, ikeya si ke ebi n̄a ebekifuk ugwem; ebi emi ngobobe inyi lek n̄a mêluk ujọn̄ọ ugwem, mè ikirie utop ubọk ikwaan̄ kiban̄.

²³Ema kpebekwook ukwook ichep, kpebekimaan̄ bọn ijo isi; ema mêre ebi Okumugwem ogbanabe, ema mè ebi owot iman kiban̄.

²⁴Sabum ema mênigwegwen emi, mfọọk otu; ema mêkitutumu ikọ me otu, nnọ isan̄a.

²⁵Ibo oron mè gwun̄ arọọn̄ mêkigbaan̄ ikup ikirie inorie, egbe àtat môkitaka mbubet kubọk eriembuuk, achiaan̄ ijọn̄ môre inorie inyi ijijinu. Ema kpebeyaka ikisak ene geege unan, kpebekpakpan̄ si ene geege me otutuuk lek ogoon̄ mbuban n̄a.”