Read obolo Asaya 66 Bible Online

Asaya 66 - obolo bible

Asaya 66

¹Okumugwem ìtumu ibe ikeyi: “Emen inyọn̄ ìre ogboon̄ ubọọn̄ n̄a, sà linyọn̄ ore inu ibene ukot n̄a. Mọmọ uwu obonama inyi emi? Ere owa obore ere itap efuuk n̄a?

²Îre ubọk n̄a orom otutuuk inu chi, sa me ikeya ke ema eninan̄a ikup. Emi Okumugwem ntumu! “Ogwu emi mbakpọ chieen̄ me isi ìre: ogwu òsisiki lek, mè ikifieek ejit me emen ekwukwu kan̄, ogwu isinọ ikọ n̄a, îra ikiran.

³Ire, ogwu òkpan̄ eriembuuk isa igwa ngwugwa inyi emi, ìbobet lek ìkpan̄ ene; ogwu òsa gwun̄ arọọn̄ igwa ngwugwa, ìbobet lek ìyaka ebek ibo; ogwu ògwa ngwugwa akpa, ìbobet lek ìsa eje okodi igwa ngwugwa; ogwu òwop nsensi isasa irọ inu ǹkeek, ìbobet lek ìkitọbọ ibot inyi mkpọmfaka. Ema mîgobo oniin̄ eyi ubọk kiban̄, òchichaka inu kiban̄ cha okitop ema me lek.

⁴Eya orọ, emi mbagobo ufialek ufialek inyi ema; inu ema ekifieek owot me lek, echicha ke mbasa ijet ema. Mije, mgbọ ngwenbe ema, kpunu ogwu òbọbọkọ emi otu; mgbọ ntumube ikọ, kpunu ogwu ògbagban̄. Ema mîrọ ijo inu me chieen̄ n̄a, inu echi emi ǹkakima, echicha ke ema ekima ikekirọ.”

⁵Enyi ebi ìkinọ ikọ Okumugwem mè ikiran, ìgban̄ ikọ Okumugwem: “Ebi ngwan̄ kinyi cha ebi ìchacha enyi, mè irieen̄ enyi isibi mije erieen̄ n̄a, ekitumu ibe, ‘Kè Okumugwem ibọkọ itọn̄, inyi eji emun̄ unwọọn̄ kinyi nu!’ Ire, esip môtet ema.

⁶Ìgban̄ ubọk ama okiriak, ìgban̄ okput me Uwu Mbuban! Îre Okumugwem okitap okput ya; ìkikpe ebi oriara kan̄ mkpukpe ògbegbe ema.

⁷“Sabum uman kan̄ onibebene, îmaman gwun̄ isan̄a; sabum ufiak uman onitetet, îman gwun̄ enerieen̄.

⁸Ekene orak inọ inu òkup ikeya? Ekene orak imun̄ mbet lek inu kecha? Ìre mêkọt iman ido egwe ge gaalek, sà ìre mêkọt isan̄a ido isibi mgbọ yaage? Ire, mgbọ yaage uman otetbe Sayọn, imamaan̄ bọn kan̄ igwook.”

⁹Awaji kinyi ìbe, “Ìre mâkpọ ebi n̄a ire mgbọ uman, mè ijit ibe ekaman? Sà ìre mâchit akpa gwun̄ me mgbọ nsabe ebi n̄a ije mege inire imaman?

¹⁰Otutuuk kinyi ebi ìmama Jeruselem, ìgọọk ọmọ ìnwọọn̄ unwọọn̄, mè ìbele ejit mije kan̄; otutuuk kinyi ebi ìfefieek ejit me ibot kan̄, ìnwọọn̄ unwọọn̄ enenen melek kan̄.

¹¹Mije, owot kinyi môjot me emen kan̄, kubọk mun̄ ebe uga okijot gwun̄ owot; enyi mêkaan̄ si ukarajit me emen kan̄, kubọk ebe ejit uga okikat gwun̄ ejit. Ike otu ebe uga okinyi gwun̄ inu geelek îweekbe òjot òjot, ikeya si ke enyi ebekaan̄ inu geelek enyi eweekbe òjot òjot me emen kan̄.”

¹²Mije, Okumugwem ìtumu ibe ikeyi: “Emi gwa ǹkiria esuuk òkigbuk kubọk okwaan̄ ijet Jeruselem, inu ubọọn̄ ebi ido geelek òkigbugbọ inu kubọk agbugbuk ibot mun̄; mênyi enyi ebe, mè ibeen̄ enyi me agba nkan̄, mè itoon̄ enyi me inyọn̄ ukot, mè ikigọọk enyi ifit ifit.

¹³Ike uga okikat gwun̄ ejit, ikeya si ke emi me lek n̄a mbakat enyi ejit me Jeruselem.”

¹⁴Mgbọ enyi isimun̄ inu yi, ejit kinyi môbele, otu ukwuuk kinyi môkekisek kubọk mbubet; unye Okumugwem mônenisibi utoon̄ inyi ebi ikwaan̄ kan̄, ire, ebi ochicha kan̄ mênenimun̄ uga unaan̄-ejit kan̄.

¹⁵Ìkpọ, Okumugwem òkinu melek ukan̄, uji akọn̄ kan̄ ìbet lek efet egwijo. Môsa uyok-ejit igbugbọ unaan̄-ejit kan̄ igwook, mè isa alọm ukan̄ ikan̄-inu inyi ebi ene.

¹⁶Okumugwem môsa ukan̄ mè isa oge akọn̄ isibi oyerebet me ibot otutuuk ebilene; ebi Okumugwem obokpan̄ mêwa enenen.

¹⁷Okumugwem ìtumu ibe, “Ebi ìgwọgwọk lek, mè isun̄ lek kiban̄ me mbuban, mè isi inin̄ emen uko igọọk mkpọmfaka òkup me eden̄ uko ya, mè isi ikitaka anam okodi, mè ikpi, mè ofifi òchichaka inu geelek, ema mêgbaan̄ ikwaan̄ ita.

¹⁸“Bak me lek ubọk ikwaan̄ kiban̄ mè ekiket kiban̄, kpọ emi gwa ǹkinu inenititiin̄ otutuuk ebi ido geelek mè ebi otu usem geelek, inyi ema enu, mè enemun̄ ujamgbugbo n̄a.

¹⁹“Mâsun̄ inu ijejeen̄ me etete kiban̄, mè iria usini ebi mênwọnọbe isi igwook me ido geelek, me Tasis, mè Libia, mè Lidia (ebi ìkigbala ubọk isook oraan̄), mè Tubali, mè Giris, mè lek achọ cha òkup me ujọn̄ọ ere, ebi kpenọnọ etip n̄a, kpemumun̄ si ujamgbugbo n̄a. Ire, ema ebekikpakpa ujamgbugbo n̄a inyi ebi ido geelek.

²⁰Ema mêsa otutuuk ebi ngwan̄ kinyi inan̄a me otutuuk ido geelek ika inu me ogoon̄ mbuban n̄a me Jeruselem, kubọk inu ngwugwa isa inyi Okumugwem. Okumugwem ìbe ke ebesa ema me inyọn̄ inyinya, mè emen uji akọn̄, mè uji ekpirikpo, mè inyọn̄ inyinya mgbidim ukot, mè aligọ, ika inu. Ebesa ema inu kubọk ebi Ijeren ekiben inu ngwugwa me emen akpan ikakaan̄ge mbuban me lek isa ikinu me Uwu Mbuban Okumugwem.

²¹Okumugwem ìbe, ‘Emi mâgobo usini kiban̄ si ibe ere ebi ngwugwa mè ebi otoko kè Libai.’

²²“Ike ayaya isinyọn̄ mè ayaya linyọn̄ eyi emi mbarọ ebekeke inye me isi n̄a, ikeya si ke erieen̄ kinyi mè owot iman kinyi obokeke inye. Emi Okumugwem nkitumu.

²³Bene me ijọk Aya Onyan̄ ge si re ofifi, mè bene me Usen Mbuban ge si re ofifi, otutuuk ebilene mêkinu initọbọ ebum me isi n̄a. Emi Okumugwem ntumu.

²⁴“Ema mêkinan̄a isibi, mè isi ikikpọ nkwukwu ebi ìkpakpaka ibot inyi emi. Mije, ebi kè mkput ìkirie ema kpebekwaan̄; ukan̄ òkitaka ema ìkaboniin̄. Otutuuk ebilene isiraka, mè ibene chieen̄ itoon̄ me lek nkwukwu ife cha, ìbogwogwook ema ijo mbiribọ me lek.”