Read obolo Asaya 7 Bible Online

Asaya 7 - obolo bible

Asaya 7

¹Mgbọ Ayaji gwun̄ kè Jotam gwun̄ kè Ujaya orebe ogwu ubọọn̄ Juda, Rejin ogwu ubọọn̄ Aram melek Peka gwun̄ kè Remaliya, ogwu ubọọn̄ Ijeren, enenijibi akọn̄ inu ibenitim me lek ama Jeruselem, ire, ema kpekọt.

²Etip onenilook ebi uwu kè Debit ibe, “Urum akọn̄ ebi Aram mîgbaan̄ itọbọ melek ebi Iferem.” Etip ya osisisik ejit ogwu ubọọn̄, mè isisik si ejit ebi kan̄. Ema ekekinyen̄e kubọk uti okinyen̄e me oron mgbọ efet okiwut ibieen̄.

³Okumugwem onenitumu inyi Asaya ibe, “Ngwa, owu melek gwun̄ kwun̄ Seya Jasup,[3] ìsibi ìsi ìchichini Ayaji me ibot okolo ebubum ònan̄a me òkpuku mun̄ eyi agan̄ inyọn̄ òkup me lek uga oniin̄ ekije ifo lek oron igwọk-ekwut.

⁴Osire, tumu nyi ọmọ ibe, ‘Gwọk chieen̄, mè tet lek kaan̄. Katet ukpook. Kafieek owot me lek mgbidim ebon uti iba chi òkisibi oduku me lek sa me lek uga unaan̄-ejit kè Rejin mè ebi Aram mè eyi gwun̄ kè Remaliya.

⁵Ebi Aram mè ebi Iferem melek gwun̄ kè Remaliya mîtọt ijo otitọt ikeme owu. Ema ekibe,

⁶“Eji enejibi akọn̄ esi lek ebi Juda, mè egwak ama kiban̄ egwook, mè eji eche ama cha enyi lek kiji, mè esa gwun̄ kè Tabeli eto ubọọn̄ me ama ya.”

⁷Ire, Ogwukaan̄-ene Okumugwem ìtumu ibe, “ ‘Otitọt kiban̄ ìkpokeke, inu ya ìkporọrọ si.

⁸Mije, ama ibot ebi Aram ìre Damasikọs, ogwu ibot ama Damasikọs ìre Rejin. Ire me lek ebi Iferem, akọp acha gweregwen mè go me isi, mêkpukpuku ebi Iferem igwook; ema kpebeyaka ikọt ikeke kubọk ido.

⁹Ama ibot ebi Iferem ìre Sameria, ogwu ibot ama Sameria ìre gwun̄ kè Remaliya. Ire enyi kpekeke inye me ichechieek kinyi, ukot kinyi ìkponye me ijọn̄.’ ”

¹⁰Okumugwem onenikpọk itumu si inyi Ayaji ibe,

¹¹“Do Okumugwem Awaji kwun̄ ibe ijeen̄ owu inu ijejeen̄. Do ibe ijeen̄ me ere òdọdọk ichit, mè ìyaka ire me ere òbebene ichit.”

¹²Ayaji ofọfọọk ibe, “In̄-in̄, emi m̀kpado. M̀kpatọ Okumugwem ikpọ!”

¹³Asaya onenibe ọmọ, “Enyi ebi uwu kè Debit, ìriọọn̄ ubọk ìnọ! Enyi mîrọ ibe efuuk ita ebilene me owot kpai, ìkajot enyi. Ìre enyi ebeyaka inirọ ibe efuuk ita Awaji n̄a me owot si?

¹⁴Eya orọ, Ogwukaan̄-ene me lek kan̄ mônyi enyi inu ijejeen̄. Ìkpọ, obaak enenwaan̄ ikariọọn̄ge enerieen̄[4] mônin̄ owot, mè iman gwun̄ enerieen̄, mè igwen gwun̄ ya Imanuwen.[5]

¹⁵Mgbọ gwun̄ ya isimin ire lek môriọọn̄be ubọk ekijit ijo inu, mè ikigobo ata inu, ìbokirie abak òsibi me lek mun̄ ebe òjijin melek aran̄ akwọọk gaalek.

¹⁶Mije, sabum gwun̄ yi môniriọọn̄ ike ekijit ijo inu mè ikigobo ata inu, ido ebi ubọọn̄ iba cha enyi ekitet ukpook me lek môkpukpuku igwook.

¹⁷Okumugwem môria mgbọ ikpele ufialek inu me lek kwun̄, mè ebi kwun̄, mè ebi uwu nte kwun̄. Okumugwem ìboria ogwu ubọọn̄ Asiria inu, inyi initap enyi ufialek me lek. Ojelek mgbọ ufialek òkup ikeya ìkararak ìkup karake ebi Iferem efieekbe inan̄a me lek ebi Juda.”

¹⁸Me mgbọ ya, Okumugwem môwut ofi igween̄ ebi kè ananjin ìkikup me agan̄ inyọn̄ ibot okwaan̄ ebi Ijipiti, mè igween̄ si ebi kè akwọọk ìkiluk me lek ijọn̄ ebi Asiria.

¹⁹Ema mênu me urum me urum, mè inisusọn ichit agba okolo òkup ngigo ngigo cha, mè agbagba ewuuk geelek, mè lek ukpak geelek mè ere geelek ebi kè anam ekisi inwọ mun̄.

²⁰Me mgbọ ya, Ogwukaan̄-ene môsa akwaan̄ îbọkọbe me ọkọ me usaba okwaan̄, òrere ogwu ubọọn̄ Asiria, ikwọkọ enyi ijeek itana me ibot, mè ikwọkọ si inwọọn̄ ukot kinyi inọọn̄, mè ikwọkọ si ifet otu kinyi irọt.

²¹Me mgbọ ya si, ene ge ìbokọt isun̄ uman gwun̄ eriembuuk ge mè uman arọọn̄ iba gaalek me ògat ugwem.

²²Anam chi mêkinyi mun̄ ebe iwa iso eyi ene ya môsabe ikirọ abak mun̄ ebe òjijin ikirie. Ebi geelek ìsisik me lek ijọn̄ yi ebekirie abak mun̄ ebe òjijin melek aran̄ akwọọk.

²³Me mgbọ ya, ere geelek obop olik gerep okitibi, eyi otu ewe kiban̄ orebe obop ikpoko alata okuket, abọm egbe mè ukpak gaalek oboyaka inikitibi me ere ya.

²⁴Ebi ene mêkikaan̄ oraan̄ mè ogbaan̄ me ubọk isa ikinu me lek ijọn̄ yi, mije, otutuuk lek ijọn̄ yi ìbore abọm egbe abọm egbe mè ukpak ukpak.

²⁵Inyọn̄ orioon̄ geelek ere mgbọ ekisa urọk ibak ijọn̄ iwop inu, ukpook abọm egbe mè ukpak ìkpoyaka ichieek ibe enyi esi lek. Ere cha ìbokana ere ebi kè eriembuuk ekibọm urie, mè ere ebi kè arọọn̄ ekijak me ukot ikana ikiweek inorie.