Read obolo Asaya 8 Bible Online

Asaya 8 - obolo bible

Asaya 8

¹Okumugwem onenitumu inyi emi ibe, “Mọnọ akpa uwot ge òmimin, mè sa uti ikpa riọọn̄ ubọk ge me lek ibe, ‘Ìkup inyi Mayeri Salali Yas Baji.’[6]

²Mâgwen Uraya ogwu ngwugwa mè Jekaraya gwun̄ kè Jeberekaya kubọk ebi ata-ikọ ìgbegbe utoon̄-ejit inyi lek n̄a.”

³Nnenigọọk ogwu enenwaan̄ nriran òrere nwa n̄a ilaak, ininin̄ owot, mè iman gwun̄ enerieen̄. Okumugwem onenibe emi, “Nyi gwun̄ ya erieen̄, Mayeri Salali Yas Baji.

⁴Mije, sabum gwun̄ yi môniriọọn̄ ubọk ekibe, ‘Nte n̄a,’ mè ‘Nga n̄a,’ ogwu ubọọn̄ Asiria îra ikwọọk otutuuk inu ubọọn̄ ebi Damasikọs, mè ifum inu ebi Sameria me akọn̄, isan̄a isa ifo.”

⁵Okumugwem onenikpọk itumu si inyi emi ibe,

⁶“Mije, ebi ene mîjit mun̄ okwaan̄ Silowa òkilibi ususuk, mè isi ikinwọọn̄ unwọọn̄ melek ogwu ubọọn̄ Rejin mè gwun̄ kè Remaliya,

⁷eya orọ, Ogwukaan̄-ene mônisa ogbururu mè unye ukot mun̄ okwaan̄ Yuferetis, òrere ogwu ubọọn̄ Asiria mè mgbugbo urum akọn̄ kan̄, inu. Mun̄ ya ìbowuwuku ichit otutuuk okolo kan̄ geelek, mè ibaak imeen̄ otutuuk agba agan̄ iba kan̄.

⁸Mun̄ ya môgbuku mege inigwook me Juda, mè ibaak imeen̄, mè ibene isaba iraka, mè imeen̄ Juda ire ebek. Owu Imanuwen, mun̄ ya môbaak imeen̄ otutuuk ijọn̄ kwun̄, ibene me agan̄ ge isi ichak me agan̄ keyilọ!”

⁹Enyi ebi ido geelek, ìdimi akọn̄, mêkpukpuku enyi igwook! Enyi ebi ido ìkup me ujọn̄ọ ere, ìgban̄ utọn̄! Ìbem lek akọn̄, mêkpukpuku enyi igwook! Iin̄, ìbem lek akọn̄, mêkpukpuku enyi igwook!

¹⁰Ìtọt otitọt! Ire, ìkpokeke. Ìnin̄ oru ìkana! Ire, ìbokwakwala igwook, mije, Awaji òwa melek kiji.

¹¹Okumugwem ìsasa me ikpele unye kan̄ itaba emi ubọk me utọn̄ ibe emi nkagọọk ife chi ìrọ inu ema ekirọ, mè itumu inyi emi ibe,

¹²“Inu geelek ife chi egwenbe ibe ìre oru mkpan̄-ene, owu kagọọk ìgwen otutuuk cha oru mkpan̄-ene. Katetet ukpook me lek inu ema ekitet ukpook me lek, kafefieek si owot me lek inu ema ekifieek owot me lek.

¹³Okumugwem Ogwukaan̄ Inyọn̄ mè Ijọn̄ ke enyi ebesun̄ me mbuban; ọmọ ke enyi ebekitet ukpook me lek, ọmọ ke enyi ebekifieek owot me lek.

¹⁴Ọmọ môre Uwu Mbuban, mè ire ewuuk òkitọbọ ene ukot isa inyi ebi Ijeren mè ebi Juda, mè ire si uga ewuuk òkida ene itọbọ me ijọn̄. Me lek ebi Jeruselem, ọmọ môre ukọọk, mè ire si ufe inyi ema.

¹⁵Owuwa ene mêtọbọ ukot me lek ewuuk cha, mè inan̄a irọn̄, mè ikpukpuku igwook, ema mêrọn̄ ufe, mêtetet ema ije.”

¹⁶Kat ikọ nriran ya gba bọp sun̄, mè chit ikan ya sun̄ me etete ebi udun̄ n̄a.

¹⁷Mâkup ikikpọ Okumugwem, ogwu òdada isi kan̄ isan̄a me lek ebi uwu kè Jekọp, ikpọchieen̄ n̄a ìkup me lek kan̄.

¹⁸Kpọ emi gwu, emi melek nsabọn Okumugwem onyibe emi. Me etete ebi Ijeren, eji ìre inu ijejeen̄ mè uyeke inu ònan̄a me ubọk Okumugwem Ogwukaan̄ Inyọn̄ mè Ijọn̄, ogwu òkiluk me inyọn̄ ogoon̄ Sayọn.

¹⁹Ire ebi ene iria enyi ibe esi eweek inu eriọọn̄ me ubọk ebi nriran ekwukwu jom-jòm mè ubọk ebi yọk-ofia ebi ìkitumu ikọ me nuunuun̄ ida mè ida ògegele cha, ìre ìkagbe ibe ebi ene mêsi lek Awaji kiban̄ isi iweek iriọọn̄? Sà ìre ebejeje ikisi ido inu ofolek ebi ìkup me ugwem me ubọk ebi ìkwakwaan̄?

²⁰Ema efo lek ikan mè ikọ nriran. Ire ema kpetumu ikọ ikpọ me lek ikọ keyi, ìsibi ibe ke utoon̄ kpunu me emen ikọ kiban̄.

²¹Ema mêsa ufieejit mè uraafiọọn̄ ikititeek ikana otutuuk inyọn̄ ijọn̄. Uraafiọọn̄ isitet ema inin̄ lek, ema mênanaan̄ ejit, mè ifieek otu inyi ogwu ubọọn̄ kiban̄ melek Awaji kiban̄. Mè ìre ema ebene chieen̄ ikpọ inyọn̄,

²²mè ìre ema egele chieen̄ isiki ikpọ ijọn̄, inu ema ebemun̄ ìre ujaralek mè udun mè ufieejit eyi uyọrọlek. Mêlililaba ema itap me emen uga ekpuk udun.