Read obolo Asaya 9 Bible Online

Asaya 9 - obolo bible

Asaya 9

¹Ire, ufieejit ìkpoyaka ikup inyi ebi mgbọ ìkup me emen uyọrọlek. Ike Okumugwem okpọbe ebi ìluk me lek ijọn̄ ebi otoko kè Jebulọn mè lek ijọn̄ ebi otoko kè Nafitali ilọ chieen̄ me adasi mgbọ, ikeya si, me mgbọ òkinu me isi, Okumugwem môsa umin inyi Galili ere ebi kpere ebi Ju ekiluk, òrere ijọn̄ òkup me lek oniin̄ agba okwaan̄, me usaba agan̄ okwaan̄ Jodan.

²Ebi ìkije me emen udun, mîmun̄ ikpele utoon̄; ebi ìkiluk me lek ijọn̄ ere uga ekpuk udun okupbe, utoon̄ îra itoon̄ ema me lek.

³Owu orọ ibe ido ya iwele owot, mè irọ ibe ubelejit kan̄ imin; ema ekibele ejit me isi kwun̄ kubọk ekibele ejit mgbọ ekirọkọ uko, mè ike ebi akọn̄ ekibele ejit mgbọ ekiche inu efumbe me akọn̄.

⁴Owu ofaan̄ mkpọn esabe ibọp ema, mè ifeme ema ulobo akpan òkikeme ema isan̄a me oguga; owu obọkọ njijan̄ ekisa isut ema isan̄a me ubọk ogwu òkitutuku ema, kubọk orọbe me mgbọ otimbe ikpan̄ ebi Midian.

⁵Me atikọ, otutuuk ikpukot ebi akọn̄ etapbe isa inu akọn̄, mè ofọnti akọn̄ cha eje ojotbe lek, otutuuk cha, ebewọwọp, ema ebekana iye ebekisa isọk ukan̄.

⁶Mije, mîman gwun̄ inyi eji, mînyi eji gwun̄ enerieen̄; mkpulu ìbotoon̄ ọmọ me oguga, erieen̄ ebekigwen ọmọ ìre, Ogwu Nteme Òkup Mgbugbo, mè Awaji Òkaan̄ Unye, mè Ute Mgbọ Geelek, mè Ogwu Mkpulu Esuuk.

⁷Mkpulu kan̄ môwele owot enenen, ìkpokaan̄ okputut, esuuk òbokup me mkpulu kan̄, ìkpokaan̄ okputut. Ọmọ ìboraka inyọn̄ ogboon̄ ubọọn̄ kè Debit ikup, mè ikup me ibot mkpulu kè Debit, mè irọ irek ubọọn̄ ya ikeke inye, mè itet si ikaan̄ inye, sa me unen oyerebet mè ata irọrọ, ibene me mgbọ ya mege ire mgbọ geelek. Ikpele ulọk Okumugwem Ogwukaan̄ Inyọn̄ mè Ijọn̄, oborọ ibe inu yi irọ.

⁸Ogwukaan̄-ene îria etip ijet ebi uwu kè Jekọp, etip ya osisi irọn̄ me Ijeren.

⁹Otutuuk ebi Ijeren mêriọọn̄ inu ofolek etip ya, ebi otoko kè Iferem mè ebi ìluk me Sameria otutuuk, ebi ìkigumu lek, mè ikibene oguga itumu ibe,

¹⁰“Mîgbugbọ uwu okpungwu igwook, ire, eji mêsa ewuuk ebabala ikpọk inama; mîchon uti sikamọ igwook, ire, eji mêsa uti olik inwene ema.”

¹¹Eya orọ, Okumugwem îtap unye me lek ebi ochicha kè Rejin, ibe enetim ekpan̄ ema; îrieen̄ ebi oriara kiban̄ itap me oniin̄, ibe enu akọn̄ me lek kiban̄.

¹²Îria ebi Aram inan̄a me agan̄ mbum-ura, mè iria ebi Filisia inan̄a me agan̄ ichep-ura, inyi enechili otu ebook emeen̄ ebi Ijeren. Ire, ubọk geelek ibe ke otutuuk inu chi îrọ iso, unaan̄-ejit Okumugwem ìkasiki si, Okumugwem ìkpọkpọ ibene ubọk kan̄ ifo inyọn̄ ikiweek isusulu si ema osusut.

¹³Ire, ebi Ijeren kpegwu ikom isi lek ogwu òsusulu ema osusut, ema kpeweweek si Okumugwem Ogwukaan̄ Inyọn̄ mè Ijọn̄.

¹⁴Eya orọ, Okumugwem môgbaan̄ ibot mè edim ifieek isan̄a me lek ebi Ijeren, mè igbaan̄ si nlak asaak melek osùkut isọp igwook egwe yaage.

¹⁵Ebi ugane mè ebi ilile ere ibot ya, ebi nriran ìkijeen̄ inu ataak ere edim ya.

¹⁶Ebi ìkisa ife chi ije mîsa ema ije ilọ oniin̄, mije keya, ebi ema ekisa ije mînin̄ wọlọwọlọ isan̄a kpai.

¹⁷Eya orọ, ejit Ogwukaan̄-ene ìkpoyaka itop me lek nsabọn irieen̄ kiban̄, ìkpokaan̄ ejit nsan me lek ebi kpà-nte kiban̄ mè ebi nwakpa kiban̄; mije, ene geege ìkayaka ìriọọn̄ Awaji, ekirọ inu ikpak ikpak, ikọ otu kiban̄ ìkire mbubut mbubut. Ire, ubọk geelek ibe ke otutuuk inu chi îrọ iso, unaan̄-ejit Okumugwem ìkasiki si, Okumugwem ìkpọkpọ ibene ubọk kan̄ ifo inyọn̄ ikiweek isusulu si ema osusut.

¹⁸Me atikọ, inu ikpak ife chi ekirọ ìkisak kubọk ukan̄; îtaka abọm egbe mè ukpak iriọk, mè inwọ asabọn uti òkup me oron isan̄a kpai, mè ikibumu oduku ikat ibene ifo inyọn̄.

¹⁹Sa me lek uga unaan̄-ejit Okumugwem Ogwukaan̄ Inyọn̄ mè Ijọn̄, inyọn̄ ijọn̄ môtaka ita me ukan̄, ebi ene mêkana iye mêsabe isọk ukan̄; kpunu ogwu òbotele ibe ogwu ngwan̄ inwọnọ.

²⁰Ema mêkpulu inorie me agan̄ ulom imeen̄, ire, uraafiọọn̄ ìbokpọkpọ ikitaka ema; ema mêrie inorie inan̄a me agan̄ ujit, ire, owot ìkpojot ema. Ene geelek môtaka ogwu gwun̄;

²¹ebi Manasi mêtaka ebi Iferem, ebi Iferem mêtataka ebi Manasi; ema mêgbagbaan̄ isi itaka ebi Juda. Ire, ubọk geelek ibe ke otutuuk inu chi îrọ iso, unaan̄-ejit Okumugwem ìkasiki si, Okumugwem ìkpọkpọ ibene ubọk kan̄ ifo inyọn̄ ikiweek isusulu si ema osusut.