Read obolo Lib 10 Bible Online

Lib 10 - obolo bible

Lib 10

¹Ene iba me lek bọn ebirieen̄ kè Erọn, Nadabu mè Abiyu, enenimọnọ ngigọ nsensi ge ge, mè itap ukan̄ me emen, mè inigwọ nsensi itap me emen ikiwọp isa inyi Okumugwem. Ire, ukan̄ ya ema etapbe me emen ngigọ kiban̄ cha ìre esese ukan̄, ìkare ukan̄ Okumugwem onyibe ida ibe esa enu me isi kan̄.

²Mgbọ yaage, ukan̄ onanan̄a me isi Okumugwem isibi, mè itaka ema ene iba ikọọk, ema ekwakwaan̄ me ere ya, me isi Okumugwem.

³Mosis onenitumu inyi Erọn ibe, “Ke inu Okumugwem otumube ya ire eyi! Okumugwem ìtumu ibe, ‘Me etete ebi ìgbegbet emi lek, emi m̀bakukup me mbuban! Me chieen̄ otutuuk ebi ene, emi m̀bakakaan̄ umin!’ ” Otu ochichit Erọn, ìkakọt ìsan̄a amọn.

⁴Mosis onenigwen Misayen mè Elisapan, bọn ebirieen̄ kè Ujiyen ngwan̄ nte kè Erọn, mè itumu inyi ema ibe, “Ìna ìniben nkwukwu bọn ngwan̄ nte kinyi ìsibi me ere mbuban ìsa ìfo udun̄ ama.”

⁵Ema enunu, mè initet nkwukwu ife cha me lek ofọnti kiban̄, mè iben ema isa isibi ifo udun̄ ama, ike Mosis onyibe ema ida.

⁶Mosis onenitumu inyi Erọn mè ebi bọn ebirieen̄ iba, Elieja mè Itama, ibe, “Ikatele ibe ijeek ibot kinyi igwugwaka, ikagwagwak si ofọnti me lek kinyi ìfieek ejit. Ire enyi irọ, enyi mêkwaan̄. Unaan̄-ejit Okumugwem si mônenirọn̄ ikeme otutuuk ido ebi Ijeren. Ire, ebi ngwan̄ kinyi, ìrere otutuuk ebi Ijeren, mêkọt ifieek ejit, mè ito ito inyi ebi Okumugwem oriabe ukan̄ itaka ikpan̄.

⁷Ìmun̄ ibe ke enyi kpenan̄a me Atanga Chinichini yi isibi, inyi enyi ekakwaan̄. Mije, aran̄ Okumugwem òwa me ibot kinyi.” Ema erọrọ si ike Mosis otumube.

⁸Okumugwem onenitumu inyi Erọn ibe,

⁹“Owu mè bọn kwun̄, ikanwọ unye miin̄ geege, ikanwọnwọ si miin̄ geege òkisa ene, me mgbọ enyi ebenin̄ Atanga Chinichini, inyi enyi ekakwaan̄. Eyi ìre ikan òbokup ire ukot kinyi geelek.

¹⁰Ikanwọ miin̄ òkisa ene, inyi enyi mêkọtbe iriọọn̄ esese òkup me etete inu òkup mbuban mè inu òchachaka mbuban, mè iriọọn̄ si esese òkup me etete inu eyi ikatanage me isi Okumugwem mè eyi òtatana,

¹¹inyi enyi mêkọtbe ikijeen̄ ebi Ijeren otutuuk ikan echi Okumugwem onyibe ema inan̄a me ubọk kè Mosis.”

¹²Mosis onenitumu inyi Erọn melek bọn ebirieen̄ iba kan̄ ìsisik me ugwem, Elieja mè Itama, ibe, “Ìmọnọ inorie ngwugwa akpa òsik me lek inu esabe igwa ngwugwa ukan̄ inyi Okumugwem, mè irie fituru eyi kpunube olat me lek ya me agba lek ntook ngwugwa, mije, îre inorie òkup mbuban ichit.

¹³Ìrie inorie ya me ere òkup me mbuban, mije, eyi ìre uche kwun̄ mè eyi bọn kwun̄ me lek ngwugwa ukan̄ egwabe inyi Okumugwem. Îre ikeyi ke Okumugwem onyi emi ida ibe erọ.

¹⁴Ire, owu mè bọn kwun̄ ebirieen̄ mè bọn kwun̄ ebibaan̄ ebetaka ngọ ejit mè ukot anam ngwugwa ewuwuwum. Echichi ìre uche kwun̄ mè uche bọn kwun̄ ònan̄a me lek ngwugwa esuuk ebi Ijeren egwabe. Enyi ebekup me ere òkup me mbuban itaka anam cha.

¹⁵Owut ukot anam ngwugwa geelek ebenebe ifo inyọn̄ mè ngọ ejit anam geelek esabe igwa ngwugwa ewuwuwum inyi Okumugwem, eyi òje me lek okpọn̄ esabe igwa ngwugwa ukan̄, mêsa inu, inyi ewuwum kubọk ngwugwa ewuwuwum me isi Okumugwem. Okpọkọ anam kechichi ìkup inyi owu. Eyi ìre ikan òbokup me ukot geelek, ike Okumugwem onyibe ida.”

¹⁶Mosis onenido inu ofolek ebot ngwugwa ijo inu ya, mè iweek iriọọn̄ ibe ke ewọwọp ebot ya ikọọk. Mosis onanaan̄ ejit enenen inyi Elieja mè Itama, bọn ebirieen̄ kè Erọn ebi ìsisik, mè igana inyi ema ibe,

¹⁷“Ìre keke orọ enyi kpetaka anam ngwugwa ijo inu ya? Kè enyi ètaka anam ya me ere òkup me mbuban, mije, anam ya ìre anam òkup me mbuban ichit. Ìre enyi kperiọọn̄ ibe ke esa anam ya inyi enyi, inyi enyi esa esan̄a awọ me ibot otutuuk ido ebi Ijeren, mè esa me ikeya etutuku ijo kiban̄ esan̄a me isi Okumugwem?

¹⁸Eyi kpesa eje ebot ya inu me Ere Mbuban me emen Atanga Chinichini, me atikọ, kè enyi ètaka ebot ya me ere mbuban, ike nnyibe enyi ida.”

¹⁹Erọn onenifọọk Mosis ibe, “Kpọ, me cherekeyi, ebi ene mîsa ngwugwa ijo inu kiban̄ mè ngwugwa ewọwọp iriọk kiban̄ inu me isi Okumugwem. Ire, ojelek inu òkup ikeyi onenisibi si inyi emi. Ire marie inorie ngwugwa ijo inu me cherekeyi, ìre kè ònwọn me isi Okumugwem ni?”

²⁰Mgbọ Mosis onọbe ikọ ya Erọn otumube, ijojot ọmọ owot.