Read obolo Lib 13 Bible Online

Lib 13 - obolo bible

Lib 13

¹Okumugwem onenitumu inyi Mosis mè Erọn ibe,

²“Ire ǹrọọn̄ igwook ene me akpalek, mè ìre ifọ, mè ìre orukan̄ òkirọ akpalek ene itana okuket, eyi môkọtbe ikana orukan̄ inyakpa, mêsa ene ya ijet Erọn ogwu ngwugwa, mè ìyaka ire ene ge me lek ebi bọn, ebi ngwugwa, inyi igwuun̄ chieen̄ ikpọ.

³Ogwu ngwugwa ya isigwuun̄ chieen̄ ikpọ ǹrọọn̄ cha me akpalek ene ya, mè imun̄ ibe ke inwọọn̄ òkup me etete ǹrọọn̄ cha îkana okuket, mè imun̄ si ibe ke ere ǹrọọn̄ cha îdọk igak inyọn̄ akpalek òkukup ikana ǹrọọn̄ cha, ǹrọọn̄ cha ìre ǹrọọn̄ inyakpa. Ogwu ngwugwa isimun̄ ikeya, mônenitumu isibi ibe ke mbuban îchaka me lek ene ya.

⁴Ire ere ya itana, mè ìkadọk ìgak otutuuk ere òkukup ikana, mè ire inwọọn̄ òkup me ere ya ìkakana isọọn̄ isọọn̄, ogwu ngwugwa ya môchit ene ya isan̄a me etete ebi ene mege usen jaaba.

⁵Me òso usen jaaba, ogwu ngwugwa ya môkpọk iruk chieen̄ ikpọ akpalek ogwu ene ya. Ire ǹrọọn̄ ya ikup ubọk yaage, ìkataka ìwele ìgak ike îwuukbe lek ikup, ogwu ngwugwa ya môkpọk ichit ogwu orukan̄ ya isan̄a me etete ebi ene ofifi usen jaaba si.

⁶Me òso ofifi usen jaaba ya, ogwu ngwugwa ya môyaka ikpọk iruk chieen̄ ikpọ akpalek ene ya. Ire imun̄ ibe ke ǹrọọn̄ ya òkita, ke ìkayaka ìwele, ogwu ngwugwa ya môtumu isibi ibe ke ene ya ìkakaan̄ mbuban me lek, ke ìkare orukan̄ inyakpa okup ene ya me lek. Ogwu orukan̄ ya môneniwọọk ofọnti kan̄ isi igwọk, mè ikana ogwu ikakaan̄ge mbuban me lek.

⁷Ire ǹrọọn̄ ya iyaka inichak iwele me mgbọ ogwu ngwugwa owuukbe lek ikpọ isan̄a mè ibe ke ene ya ìkakaan̄ mbuban me lek, mêyaka ikpọk isa ene ya inu me isi ogwu ngwugwa ofifi mgbọ.

⁸Ogwu ngwugwa mônenigwuun̄ chieen̄ ikpọ. Ire imun̄ ibe ke ǹrọọn̄ ya îchak iwele me atikọ, môtumu isibi ibe ke mbuban îchaka me lek ene ya. Orukan̄ ya ìre inyakpa.

⁹“Ene geelek orukan̄ inyakpa okupbe me lek, mêsa ene ya ijet ogwu ngwugwa.

¹⁰Ogwu ngwugwa môneniruk chieen̄ ikpọ akpalek ene ya. Ire imun̄ ibe ke ǹrọọn̄ òkup ene ya me lek ìtatana okuket, mè imun̄ ibe ke ǹrọọn̄ ya îrọ ibe inwọọn̄ òkup ikana me ere ya ikana isọọn̄ isọọn̄, mè imun̄ si ibe ke unan òkup me ere ya ìkup isi njijoon̄ njijoon̄,

¹¹ogwu ngwugwa ya môneniriọọn̄ ibe ke orukan̄ ya ìre inyakpa. Mije keya, mônenitumu isibi ibe ke mbuban îchaka me lek ene ya. Ìkpochit ene ya isan̄a me etete ebi ene, mije, îkpọk mbum ibe ke orukan̄ ya ìre inyakpa.

¹²“Ire ǹrọọn̄ ya igwook ichit otutuuk akpalek ene ya, ibene me ibot ire ukot, mè ichit si otutuuk ere geelek ogwu ngwugwa ya okọtbe imọọn̄ me akpalek ene ya,

¹³ogwu ngwugwa ya môkpọk iruk chieen̄ ikpọ lek ene ya. Ire imun̄, me atikọ, ibe ke ǹrọọn̄ ya îkpọk ichit otutuuk lek ene ya, ogwu ngwugwa ya môtumu isibi ibe ke ene ya ìkakaan̄ mbuban me lek, ke mbuban ìkayaka ìchaka me lek ene ya, mije, otutuuk lek ene ya îkana okuket.

¹⁴Ire, mgbọ geelek chieen̄ ǹrọọn̄ cha otakabe, mè ikup isi njijoon̄ njijoon̄, ene ya ìkatana, mbuban îchaka me lek.

¹⁵Ogwu ngwugwa isimun̄ njijoon̄ ufuk me emen ǹrọọn̄ ya, môtutumu isibi ibe ke mbuban îchaka me lek ene ya, mije, njijoon̄ ufuk ya ìre mbuban inu. Ǹrọọn̄ ya îkana inyakpa.

¹⁶Ire ufuk òkup njijoon̄ njijoon̄ ya iyaka inigwu ikom ikana okuket okuket, ene ya môsa lek kan̄ isi ijeen̄ ogwu ngwugwa.

¹⁷Ogwu ngwugwa mônenikpọk iruk chieen̄ ikpọ lek ene ya. Ire imun̄ ibe ke chieen̄ ǹrọọn̄ cha îbene ikitana okuket, môtumu isibi ibe ke ogwu ene ya ìkakaan̄ mbuban me lek. Ene ya mônenikana ogwu òtatana.

¹⁸“Ire okporotu itibi ene me lek, mè ita,

¹⁹me mgburudun̄, enenimun̄ ǹrọọn̄ okuket, mè iyaka ire ǹrọọn̄ okuket òninin̄ sọn̄ araran̄ me akpat ere okporotu ya otabe me lek ene ya, ene ya môsa lek kan̄ isi ijeen̄ ogwu ngwugwa.

²⁰Ire ogwu ngwugwa ikpọ lek ene ya, mè imun̄ ibe ke ere ya okporotu orọbe mè ita îyaka idọk igak ere òkukup ikana ọmọ, mè imun̄ si ibe ke inwọọn̄ òkup me ere ya îkana isọọn̄ isọọn̄, ogwu ngwugwa ya môtumu isibi ibe ke mbuban îchaka me lek ene ya, ke ǹrọọn̄ ya ìre ǹrọọn̄ inyakpa. Mije, îre orukan̄ inyakpa ire eya òbebene me lek ene ya, me ere mgbọ okporotu ya orọbe mè ita.

²¹Ire, ire ogwu ngwugwa ya imun̄ ibe ke inwọọn̄ òkup me ere ya ìkakana okuket, ke ere ya si ìkadọk ìgak akpa òkukup ikana ọmọ, mè imun̄ si ibe ke ere ya ìyaka inikup joon̄, ogwu ngwugwa môchit ene ya isan̄a me etete ebi ene mege usen jaaba.

²²Ire ǹrọọn̄ ya ìkiyayat iwele me akpalek ene ya igak ike îkupbe me adasi, ogwu ngwugwa ya môtumu isibi ibe ke mbuban îchaka me lek ene ya, mije, ǹrọọn̄ ya ìre ǹrọọn̄ inyakpa.

²³Ire, ire imun̄ ibe ke chieen̄ ere ya ìkanwene, ke ìkayat si ìwele ìgak ike îkupbe me adasi, inu ya ìre gaalek oka akpat ere okporotu orọbe, mè ita isan̄a. Eya orọ, ogwu ngwugwa môtumu isibi ibe ke ene ya ìkakaan̄ mbuban me lek.

²⁴“Ire ukan̄ itaka ene me akpalek, akpat ere ya onenikup lek ge araran̄, lek ge okuket, mè ìyaka ire okuket isi ge,

²⁵ogwu ngwugwa môkpọ ene ya lek. Ire inwọọn̄ òkup me ere ya ikana isọọn̄ isọọn̄, mè akpat ere ya idọk igak akpa òkukup ikana ere ya, orukan̄ inyakpa ire eya òbebene me akpat ukan̄ ya me lek ene ya. Ogwu ngwugwa ya môtumu isibi ibe ke mbuban îchaka me lek ene ya, mije, orukan̄ ya ìre inyakpa.

²⁶Ire, ire ogwu ngwugwa ikpọ, mè imun̄ ibe ke inwọọn̄ ere ya ìkakana okuket, mè imun̄ si ibe ke ere ya ìkadọk ìgak akpa òkukup ikana ọmọ, ke ere ya ìkup joon̄, ogwu ngwugwa môchit ene ya isan̄a me etete ebi ene mege usen jaaba.

²⁷Me òso usen jaaba ya, ogwu ngwugwa môkpọk ikpọ ene ya lek. Ire imun̄ ibe ke ere ya ìkiyayat iwele me akpalek ene ya, ogwu ngwugwa ya môtumu isibi ibe ke mbuban îchaka me lek ene ya, mije, orukan̄ ya ìre inyakpa.

²⁸Ire, ire imun̄ ibe ke chieen̄ ere ya ìkanwene, ke ìkayat si ìwele ìgak ike îkupbe me adasi, mè imun̄ si ibe ke chieen̄ ere ya ìkup joon̄, inu ya ìre gaalek akpat ere ukan̄ otakabe. Eya orọ, ogwu ngwugwa môtumu isibi ibe ke ene ya ìkakaan̄ mbuban me lek.

²⁹“Ire ǹrọọn̄ igwook ogwu enerieen̄ mè ìre ogwu enenwaan̄ me ibot mè ìre mferek,

³⁰ogwu ngwugwa môgwuun̄ chieen̄ ikpọ ene ya lek. Ire ere ǹrọọn̄ ya okupbe idọk igak akpa òkukup ikana ọmọ, mè inwọọn̄ òkup me ere ya ikup unwan unwan, mè isiik ukut, ogwu ngwugwa ya môtumu isibi ibe ke mbuban îchaka me lek ene ya, mije, orukan̄ ya ìre mfem, mè ire si inyakpa eyi ibot mè ìre eyi mferek.

³¹Ire, ire ogwu ngwugwa inigwuun̄ chieen̄ ikpọ ǹrọọn̄ eyi mfem ya me lek ene ya, mè imun̄ ibe ke ere ǹrọọn̄ ya ìkadọk ìgak akpa òkukup ikana ọmọ, mè imun̄ si ibe ke inwọọn̄ ofifit ìkakup me ere ya, ogwu ngwugwa ya môchit ene ya isan̄a me etete ebi ene mege usen jaaba.

³²Me òso usen jaaba, ogwu ngwugwa môkpọk ikpọ ene ya lek. Ire imun̄ ibe ke ǹrọọn̄ ya ìkawele ìgak ubọk îkupbe me adasi, ke inwọọn̄ òkup me ere ya ìkakup unwan unwan, mè imun̄ si ibe ke ere ya ìkadọk ìgak akpa òkukup ikana ọmọ,

³³ene ya môkwọkọ ijeek isan̄a me ibot, mè ikwọkọ si ifet otu kan̄. Ire, ìkpokwọkọ ere mfem ya okupbe. Ogwu ngwugwa ya mônenichit ene ya isan̄a me etete ebi ene ofifi usen jaaba si.

³⁴Me òso usen jaaba ya, ogwu ngwugwa môkpọk iruk chieen̄ ikpọ mfem ya. Ire imun̄ ibe ke ìkataka ìwele ìgak ike îwuukbe lek ikup, ke ìkadọk si chieen̄ ìgak akpa òkukup ikana ọmọ, mônenitumu isibi ibe ke ene ya ìkakaan̄ mbuban me lek. Ene ya mônenigwọk ekwut mè ofọnti îtapbe me lek, mè ikana ogwu ikakaan̄ge mbuban me lek.

³⁵“Ire, ire mfem ya iyaka iniyat iwele me mgbọ ogwu ngwugwa owuukbe lek itumu isibi ibe ke ene ya ìkakaan̄ mbuban me lek,

³⁶ogwu ngwugwa môkpọk ikpọ ene ya lek. Ire mfem ya itaka iwele me atikọ, ogwu ngwugwa ikayaka ìweek idadasi imun̄ inwọọn̄ òkup unwan unwan me ere ya. Ene ya ìkatana.

³⁷Ire, ire ogwu ngwugwa isa chieen̄ kan̄ ikpọ ere ya, mè imun̄ ibe, me nkeek kan̄, ke mfem ya ìkup ike îwuukbe lek ikup, ke inwọọn̄ ofifit îtibi me ere ya, ìsibi ibe ke ene ya ìkakaan̄ mbuban me lek. Eya orọ, ogwu ngwugwa môtumu isibi ibe ke ene ya ìkakaan̄ mbuban me lek.

³⁸“Ire ikaan̄ ogwu enerieen̄, mè ìre ogwu enenwaan̄, akpat okuket otọọn̄be ikana me akpalek,

³⁹ogwu ngwugwa ikpọ ene ya lek. Ire akpat ere cha ikup joon̄, îre asabọn ilọp obum isibi me akpalek ene ya. Ene ya ìkakaan̄ mbuban me lek.

⁴⁰“Ire ijeek ilak me ibot ogwu enerieen̄, eyiyi ìre ǹlak ibot ikike. Ene ya ìkakaan̄ mbuban me lek.

⁴¹Ire ijeek ene ya ilak me agan̄ isi gaalek, eyiyi ìre gaalek ǹlak ibot egbọ isi. Ene ya me lek kan̄ ìkakaan̄ mbuban me lek.

⁴²Ire, ire ene ya ikaan̄ ǹrọọn̄ okuket òkup sọn̄ araran̄ me ibot agan̄ ijeek olakbe ita ya, mè ìre me agan̄ isi, mè ìre me eden̄ ibot, îre orukan̄ inyakpa ire eya òbubum isibi me ibot ene ya me ere ijeek ya olakbe ita.

⁴³Ogwu ngwugwa môkpọ ene ya lek. Ire inu cha òwuwut me ibot agan̄ isi, mè ìre me eden̄ ibot ere ijeek olakbe ya itana okuket mè igwa si sọn̄ araran̄ me lek, kubọk orukan̄ inyakpa,

⁴⁴ene ya ìre ogwu inyakpa. Eya orọ, mbuban îchaka ọmọ me lek. Ogwu ngwugwa môtumu isibi ibe ke mbuban îchaka ogwu enerieen̄ ya me lek, mije ǹrọọn̄ ya eyi òkup ọmọ me ibot.

⁴⁵“Ogwu orukan̄ inyakpa geelek ìbokitap ǹgwak ofọnti, mè ikisun̄ ijeek kan̄ jakajakajaka, mè ikichit isi kan̄ ibene me otu kan̄ isi ire mferek. Mgbọ geelek îkije me oniin̄, môkitaan̄ ukpo itumu ibe, ‘Ǹkatana! Ǹkatana!’

⁴⁶Otutuuk mgbọ inyakpa ya okupbe ene ya me lek, ọmọ ìbore ogwu mbuban ochakabe me lek. Ìbokup ọmọ gaalek me udun̄ ama, inan̄a me etete ebi ene.

⁴⁷“Ire mbubeek[2] itibi me lek ofọnti inwọọn̄ anam mè ìre ofọnti lilin̄,

⁴⁸mè ìre ekwut geelek elọlọk mè echi ekpakpa eyi esabe inwọọn̄ anam mè ìre lilin̄ ilọk, mè ìre me lek ikpa anam, mè ìre me lek inu esabe ikpa anam irọ,

⁴⁹ire mbubeek òkup chieen̄ njijoon̄ inwan̄ njijoon̄ inwan̄ mè ìre araran̄ ikup me lek ikpa anam, mè ìre me lek ekwut geelek elọlọk mè echi ekpakpa eyi esabe inwọọn̄ anam mè ìre lilin̄ ilọk, mè ìre inu geelek esabe ikpa anam irom, îre mbuban mbubeek. Mêsa isi ijeen̄ ogwu ngwugwa.

⁵⁰Ogwu ngwugwa môruk chieen̄ ikpọ mbubeek ya, mè inyi ida ibe echit inu mbubeek ya okupbe me lek usen jaaba.

⁵¹Me òso usen jaaba ya, ogwu ngwugwa môkpọk ikpọ mbubeek ya òkup me lek ofọnti ya mè ìre me lek ekwut geelek elọlọk mè echi ekpakpa eyi esabe inwọọn̄ anam mè ìre lilin̄ ilọk, mè ìre me lek ikpa anam ya, mè ìre me lek inu geelek esabe ikpa anam irom. Ire iyat iwele igak ike îkupbe me adasi, îre mbuban mbubeek obum isibi me lek inu ya. Eya orọ, mbuban îchaka me lek inu ya.

⁵²Mije keyi, ebewọwọp ofọnti ya mè ìre ekwut geelek elọlọk mè echi ekpakpa eyi esabe inwọọn̄ anam mè ìre lilin̄ ilọk, mè ìre otutuuk inu geelek esabe ikpa anam irom eyi mbubeek ya ogwookbe me lek. Ebetatap ukan̄ me lek iwọp itaka iriọk.

⁵³“Ire ogwu ngwugwa ya ikpọ, mè imun̄ ibe ke mbubeek ya ìkayat ìwele ìgak ubọk îkupbe me adasi me lek ofọnti ya mè ìre me lek ekwut geelek elọlọk mè echi ekpakpa eyi esabe inwọọn̄ anam mè ìre lilin̄ ilọk, mè ìre me lek otutuuk inu cha geelek esabe ikpa anam irom,

⁵⁴mônyi ida ibe egwọk inu ya mbubeek okupbe me lek, mè echit esun̄ ofifi usen jaaba.

⁵⁵Isigwọk inu ya isan̄a, ire ogwu ngwugwa iyaka inikpọ si lek inu ya, mè imun̄ ibe ke mbubeek ya ìkanwene isi kan̄, ubọk geelek ibe ke ìkayat si ìwele ìgak ike îwuukbe lek ikup, ebetatap ukan̄ iwọp inu ya, inyi itaka iriọk. Mbubeek ya îra itaka ofọnti ya me agan̄ isi, mè ìre me agan̄ udun̄. Eya orọ, ebewọwọp me ukan̄.

⁵⁶Ire, ire ogwu ngwugwa imun̄ ibe ke mbubeek ya îgwọk inan̄a me lek inu ya mgbọ egwọkbe, ogwu ngwugwa ya môgwaka ere mbubeek ya okupbe isan̄a me lek ofọnti ya mè ìre me lek ikpa anam ya mè ìre me lek ekwut geelek elọlọk mè echi ekpakpa eyi esabe inwọọn̄ anam mè ìre lilin̄ ilọk.

⁵⁷Ire, me mgbọ egwọkbe ofọnti ya isan̄a, ire mbubeek ya ikpọk isibi si me lek ofọnti ya, mè ìre me lek ekwut geelek elọlọk mè echi ekpakpa eyi esabe inwọọn̄ anam mè ìre lilin̄ ilọk, mè ìre me lek inu esabe ikpa anam irom ya, ebetatap ukan̄ iwọp inu ya geelek mbubeek okupbe me lek itaka iriọk.

⁵⁸Ire igwọk ofọnti ya, mè ìre ekwut geelek elọlọk mè echi ekpakpa eyi esabe inwọọn̄ anam mè ìre lilin̄ ilọk, mè ìre inu esabe ikpa anam irom ya, mè ire mbubeek ya inan̄a isan̄a me lek, mêkpọk igwọk si ofifi mgbọ. Sa me ikeya, inu ya mônenitana, mbuban ìkpoyaka ichaka me lek.”

⁵⁹Echichi ore ikan òbokikpulu mbubeek òkup me lek ofọnti inwọọn̄ anam mè echi lilin̄ mè echi elọlọk mè echi ekpakpa, mè otutuuk inu geelek esabe ikpa anam irom. Ikan kechi ke ebesa ikitumu isibi ibe ke ema mîtana, mè ìyaka ire ke mbuban îchaka ema me lek.