Read obolo Lib 16 Bible Online

Lib 16 - obolo bible

Lib 16

¹Mgbọ bọn ebirieen̄ iba kè Erọn ekwaan̄be iraka mije ema esabe esese ukan̄ ije igbet me isi Okumugwem, Okumugwem onenitumu ikọ melek kè Mosis.

²Okumugwem ìtumu inyi Mosis ibe, “Tumu nyi ngwan̄ kwun̄ Erọn ibe ikakpọkpọ ìkitibi ìraka ekwut mgban ya ìkinin̄ emen Ere Òkup Mbuban Ichit me isi ogboon̄ nsan[3] òkup me inyọn̄ otu okop inyan̄a-ibot ya mgbọ geelek òneme ọmọ, inyi ikakwu. Mije, îre me inyọn̄ ogboon̄ nsan òkup me inyọn̄ okop inyan̄a-ibot ya ke nkisibi ikeke kubọk oduku inyọn̄.

³“Sabum Erọn mônije inin̄ Ere Òkup Mbuban Ichit ya, môsa gwun̄ orie eriembuuk ge inu, eyi môsabe igwa ngwugwa ijo inu, mè isa si orie arọọn̄ ge eyi môsabe igwa ngwugwa ewọwọp iriọk igbaalek inu.

⁴Môtap àwurukù mbuban eyi irak esabe lilin̄ irọ, mè itap ekwut-edim mgbidim ukot, esabe si lilin̄ irọ, isa ikwek akpalek kan̄, mè itobo fanti lilin̄, mè ikwuun̄ okpibot lilin̄ me ibot. Otutuuk ofọnti chi ìre ofọnti òkup mbuban. Eya orọ, Erọn môken mun̄ igwọk akpalek kan̄ sabum ònotap ofọnti chi.

⁵Me mgbọ ìbonin̄ ere ya, ebi Ijeren mênyi ọmọ gwun̄ orie ebot iba echi môsabe igwa ngwugwa ijo inu, mè inyi ọmọ si orie arọọn̄ ge eyi môsabe igwa ngwugwa ewọwọp iriọk.

⁶“Erọn mônenisa orie eriembuuk ya igwa ngwugwa ijo inu me ibot kan̄, isa irọ esuuk me ibot kan̄ mè ibot ebi ototun̄ ukan̄ kan̄.

⁷Mônenitet bọn orie ebot iba cha isa isi, inyi esi ekeke me isi Okumugwem me otu isotu Atanga Chinichini,

⁸mè iniroon̄ nriroon̄ me ibot ebot iba cha, isa iweek iriọọn̄ eyi òkup inyi Okumugwem mè eyi ikana-ibot.[4]

⁹Erọn mônisa ebot eyi òkup inyi Okumugwem igwa ngwugwa ijo inu,

¹⁰mè itele ibe ebot ikana-ibot ya ikeke, mè ugwem me lek, me isi Okumugwem, inyi esa erọ esuuk, mè iniria ọmọ ifo emen èwê kubọk ebot ikana-ibot.

¹¹“Erọn mônenisa orie eriembuuk ya inu, eyi ìbosa igwa ngwugwa ijo inu me ibot kan̄ isa irọ esuuk me ibot kan̄ mè ibot ebi ototun̄ ukan̄ kan̄, mè inikpan̄,

¹²mè inilọbọ mbubuuk ukan̄ òkup me inyọn̄ ntook ya me isi Okumugwem itap ijot alala ilọbọ-ukan̄, mè inigwọ nsensi utop olu, eyi ekọkbe ikpukpuku, ijot ubọk kan̄ mgbọ iba isa igbaalek ije itibi iraka ekwut mgban ya inin̄ emen Ere Òkup Mbuban Ichit.

¹³Me ere ya, mônenigwook nsensi ya me inyọn̄ mbubuuk ukan̄ ya me isi Okumugwem, oduku nsensi ya môneniduku ichit ogboon̄ nsan òkup me inyọn̄ okop inyan̄a-ibot ya bùk, inyi Erọn ikamọọn̄ ogboon̄ nsan ya, mè ìkwu.

¹⁴Erọn mônenijiin̄ otubọk ilaka-aran̄ kan̄ me emen eje eriembuuk ya, mè isa inyan me inyọn̄ ogboon̄ nsan ya me agan̄ isi, mè inyan si me ijọn̄ me isi kan̄ mgbọ jaaba.

¹⁵“Eya isiraka, Erọn mônenikpan̄ ebot ya ebesa igwa ngwugwa ijo inu me ibot otutuuk ebi Ijeren, mè isa eje kan̄ itibi iraka ekwut mgban ya, mè isa inyan me inyọn̄ ogboon̄ nsan ya, mè inyan si me isi kan̄, kubọk îrọbe si me lek eje eriembuuk ya.

¹⁶Sa me ikeyi, Erọn mônenirọ esuuk me lek Ere Òkup Mbuban Ichit, mije mbuban òchaka me lek ebi Ijeren mè mije unye-ibot kiban̄ mè otutuuk ijo inu geelek ema erọbe. Ubọk yaage ke ìborọ si me lek Atanga Chinichini eyi òkup me etete kiban̄, mije mbuban òchachaka ema me lek.

¹⁷Ene geege ìkpokup me Atanga Chinichini ya bene me mgbọ Erọn mônin̄be isi irọ esuuk me emen Ere Òkup Mbuban Ichit ya mege ire mgbọ mônan̄abe isibi. Ikeya ke Erọn môrọ esuuk me ibot kan̄ mè ibot ebi uwu kan̄ mè ibot otutuuk ebi ido Ijeren.

¹⁸“Erọn môneninan̄a isibi isi lek ntook nsensi òkup me isi Okumugwem, mè irọ esuuk me lek, mè inisa usini eje eriembuuk ya mè eje ebot ya ichak me lek iko ini òkup me lek ntook ya.

¹⁹Môsa otubọk kan̄ ijiin̄ me emen eje ya, mè isa inyan me inyọn̄ ntook ya mgbọ jaaba. Sa me ikeyi, Erọn mônenigwọk lek ntook ya, inyi mbuban òje me ubọk ebi Ijeren ita me lek ntook ya, inyi ikup me mbuban.

²⁰“Erọn isirọ esuuk isan̄a me lek Ere Òkup Mbuban Ichit, mè lek Atanga Chinichini, mè lek ntook nsensi, mônenitaba ebot òkup me ugwem ya inu,

²¹mè initoon̄ ubọk iba kan̄ me ibot ebot ya, mè inifuk ijo otutuuk ebi ido Ijeren mè otutuuk inu ikpak kiban̄ mè otutuuk unye-ibot kiban̄ itoon̄ me ibot ebot ya, mè iniria ebot ya ifo emen èwê sa me ubọk ogwu enerieen̄ ogwu esan̄abe isibi ibe isa ebot ya ije.

²²Ogwu enerieen̄ ya mônenisa ebot ya ifo emen èwê. Ebot ya môbeben otutuuk ijo inu ebi ido Ijeren me ibot kan̄ isa ije ifo emen èwê ere ònọnọọn̄.

²³“Erọn môneninu me Atanga Chinichini ya, mè iwọọk otutuuk ofọnti lilin̄ cha îtapbe mgbọ înin̄be Ere Òkup Mbuban Ichit ya isan̄a me lek, mè ijuuk ema itele me ere ya,

²⁴mè iken mun̄ igwọk lek kan̄ me ere ge òkup mbuban, mè initap ofọnti kan̄, mè ininan̄a isibi isi igwa ngwugwa ewọwọp iriọk me ibot kan̄, mè igwa si ngwugwa ewọwọp iriọk me ibot otutuuk ebi ido Ijeren, mè irọ esuuk me ibot kan̄ mè ibot otutuuk ebi Ijeren,

²⁵mè iniwọp okpọn̄ ngwugwa ijo inu cha ikana oduku me inyọn̄ ntook ngwugwa ya.

²⁶“Ogwu enerieen̄ òsasa ebot ikana-ibot ya iban inyi ije ichep me emen èwê, môgwọk ofọnti kan̄, mè iken mun̄ sabum ònoje ònin̄ emen ama.

²⁷Orie eriembuuk ya mè gwun̄ orie ebot ya esabe igwa ngwugwa ijo inu cha, echi esabe eje kiban̄ inin̄ emen Ere Òkup Mbuban Ichit isi irọ esuuk ya, mêsa anam kiban̄ mè ikpa kiban̄ mè ifin emen owot kiban̄ isibi ifo udun̄ ama isi itap ukan̄ iwọp ikọọk.

²⁸Ogwu òtatap ukan̄ iwọp anam cha môgwọk ofọnti kan̄, mè iken mun̄ igwọk akpalek kan̄ sabum ònoje ònin̄ emen ama.

²⁹“Eyi ìre ikan òbokup inyi enyi ire ukot geelek. Me òso akọp usen me onyan̄ jaaba me acha geelek, enyi ebi bọn owot mè ebi ichen geelek ìluk me etete kinyi, enyi otutuuk ene mêjin otu, ene geege ìkporọ ikwaan̄ geege.

³⁰Mije, îre me usen keyi ke eberọ esuuk me ibot kinyi, isasa igwọk enyi lek mije otutuuk ijo inu kinyi me isi Okumugwem, inyi mbuban ita enyi me lek.

³¹Usen ya ìre Usen Mbuban eyi itap-efuuk inyi enyi. Otutuuk ene mêjin otu. Eyi ìre ikan òbokukup ire ukot geelek.

³²Ogwu ngwugwa ogwu etọkọbe aran̄ me ibot, mè ifaka irek ikwaan̄ ogwu ute itap me ubọk, obofaka mfaka yi. Ogwu ngwugwa ya ìbotap ofọnti lilin̄ cha, òrere ofọnti mbuban.

³³Ogwu ngwugwa ya môrọ esuuk me lek Ere Òkup Mbuban Ichit, mè lek Atanga Chinichini, mè lek ntook ngwugwa, mè irọ si esuuk me ibot ebi ngwugwa, mè ibot otutuuk ebi ido Ijeren.

³⁴“Eyi ìbore ikan mgbọ geelek inyi enyi. Ebekirọ esuuk me ibot ebi Ijeren mgbọ ge me acha mije otutuuk ijo inu kiban̄ geelek.” Mosis orọrọ otutuuk inu chi ike Okumugwem onyibe ọmọ ida ibe irọ.