Read obolo Lib 19 Bible Online

Lib 19 - obolo bible

Lib 19

¹Okumugwem onenitumu inyi Mosis ibe

²itumu inyi otutuuk ebi Ijeren ibe, “Ìkup me mbuban, mije, emi, Okumugwem Awaji kinyi, ǹkup me mbuban.

³“Ene geelek ikinyi ogwu uga mè ogwu ute ulibi. Ikalọ si ikekisun̄ Usen Mbuban n̄a. Emi nre Okumugwem Awaji kinyi.

⁴“Ikatele emi, mè ìsi ìkitọbọ ebum ìnyi ebi kè mkpọmfaka geege. Ikasasa si alata ìtọkọ awaji geege ìnyi lek kinyi, mije, emi nre Okumugwem Awaji kinyi.

⁵“Mgbọ enyi isikigwa ngwugwa esuuk inyi Okumugwem, ìkigwa ngwugwa ya ìtat, inyi Okumugwem ikibọkọ itap me ibot kinyi.

⁶Enyi mêrie inu ngwugwa ya me usen yaage egwabe ngwugwa ya, mè irie si me ofit iwele kan̄. Inu geelek òsisik ire òso usen ita, ebewọwọp me ukan̄ itaka ikọọk.

⁷Irerie inu ngwugwa ya me òso usen ita ìre mbuban inu. Okumugwem ìkpobọkọ itap.

⁸Ogwu geelek òrerie inu ngwugwa ya me òso usen ita, nrọ-nlọ ya ìtoon̄ ene ya me ibot, mije, îchaka mbuban me lek inu òkup me mbuban inyi Okumugwem. Ebesasan̄a ene ya isan̄a me otu ifuk ebi kiban̄.

⁹“Mgbọ enyi isikirọkọ mfut uko me ijọn̄ kinyi, ikakirọkọ mfut òkup me agba otu utọn̄ ijọn̄ uko kinyi. Ikakirọọn̄ si ten̄eten̄e mfut cha òkiyaak igwook me ijọn̄ mgbọ ekirọkọ mfut me uko.

¹⁰Me uko gerep kinyi, enyi isigbeme mfut mgbọ ge isi ichak me ibot, ikayaka ìkigwu ìkom òso mgbọ iba ìsi ìkiweek echi òlọlọ enyi chieen̄. Mfut gerep geelek òrọrọn̄ igwook me ijọn̄ ọmọ gaalek, ikakirọọn̄. Ìkitele inyi echicha ikup inyi ebi ugbọọn̄ mè ebi ichen ebi ìluk me etete kinyi. Emi nre Okumugwem Awaji kinyi.

¹¹“Kachiin̄ inọ. Kakan̄ ataak. Kafiaan̄ ogwu melek kwun̄.

¹²“Kasa erieen̄ n̄a ìnyan̄a ibot ataak, mè ìsa me ikeya ìchaka mbuban me lek erieen̄ Awaji kwun̄. Emi nre Okumugwem.

¹³“Karọ ìkeme ogwu melek kwun̄. Kachiin̄ inọ afa. Katet ikpoko ogwu ikwaan̄ kwun̄ ìkaan̄ me urieek ìwele egwe.

¹⁴“Kafieek otu ìnyi ogwu ìnan. Kato inu ìsaba oniin̄ ogwu ǹnàan̄. Ire, tet ukpook me lek Awaji kwun̄. Emi nre Okumugwem.

¹⁵“Kafieek nlilọ oyerebet ìnyi ene geege. Kasa me ejit njijin ìfieek oyerebet ìnwọn ogwu ugbọọn̄. Kasa me ulibi-chieen̄ ìfieek oyerebet ìnwọn ogwu ilile. Sibi unen oyerebet nyi ogwu melek kwun̄.

¹⁶“Kasa ene ìnyam ewe ìkana me etete ebi kinyi. Karọ inu geege eyi môsakbe ibot ogwu melek kwun̄. Emi nre Okumugwem.

¹⁷“Kacha ngwan̄ kwun̄ me emen ejit kwun̄. Gana ikọ nyi ọmọ isi mè isi me òjot òjot atikọ, inyi owu okagọọk me lek kan̄, mè ìrọ ijo inu.

¹⁸“Karọ ene geege me etete ebi kinyi useen̄ inu, kabeben si ọmọ me ejit ikọ. Ire, ma ogwu melek kwun̄ kubọk omabe lek kwun̄. Emi nre Okumugwem.

¹⁹“Kirọ otutuuk orọmijọn̄ n̄a. Me etete anam kwun̄, kasa ofifi chieen̄ anam ìsi ìtoon̄ esese chieen̄ anam. Ikeya si, kagbaan̄ chieen̄ mfut iba ìwop me uko ge. Ofifi si, ekwut egwabe esese inu iba isa ichak, kasa ìchim ofọnti ìtap.

²⁰“Ire ene itet usun̄ enenwaan̄ ikaan̄ ibodo, mè ìkakpe mkpukpe me ibot, inyi ikaan̄ lek kan̄, mè ire ofifi ene inigọọk ogwu enenwaan̄ ya ilaak, mêsulu ema ebi ìlaak ilaak cha osusut, ire, kpebekpan̄ ema, mije, ogwu usun̄ ya ìkakaan̄-nu lek kan̄.

²¹Ogwu enerieen̄ ogwu òlaak ogwu usun̄ ya môsa orie arọọn̄ ge inu me isotu Atanga Chinichini, inyi esa egwa ngwugwa awọ me ibot kan̄ enyi Okumugwem.

²²Ogwu ngwugwa mônenisa arọọn̄ ya igwa ngwugwa awọ me isi Okumugwem, mè isa me ikeya irọ esuuk me ibot ene ya mije ijo inu îrọbe. Okumugwem mônenitele inyi ene ya.

²³“Mgbọ enyi isinin̄ inyọn̄ ijọn̄ ya mbanyi enyi, mè iwop uti òkito mfut ekirie, enyi kpeberie mfut uti ya adasi acha ita. Me otutuuk acha ita cha, enyi mêmọnọ mfut uti ya okito kubọk inu òkaan̄ mbuban me lek.

²⁴Me òso acha ini kan̄, otutuuk mfut uti ya ìbokup me mbuban inyi Okumugwem kubọk inyinyi eyi enyi esabe inwọọn̄ unwọọn̄ me isi Okumugwem.

²⁵Me òso acha go kan̄, enyi mênenirie mfut kan̄. Sa me ikeyi, uti ya mônenikito mfut ogbogbo inyi enyi. Emi nre Okumugwem Awaji kinyi.

²⁶“Kataka anam geege melek eje me emen. Kado ido-inu, katet ǹcha.

²⁷“Kakwọkọ ijeek ìsan̄a me agba ibot kwun̄. Kakpakpaan̄ si otu utọn̄ ifet otu kwun̄.

²⁸“Kaseke lek kwun̄ ìbak mije ogwu òkwukwu. Kagege si nki geege me akpalek kwun̄ mije ogwu òkwukwu. Emi nre Okumugwem.

²⁹“Kasa gwun̄ kwun̄ enenwaan̄ ìtap òje oyet, mè ìsa me ikeya ìchaka ọmọ mbuban me lek, inyi ugwem òje oyet ikajot inyọn̄ ijọn̄ kinyi. Ire owu orọ, ijo barabat môjot inyọn̄ ijọn̄ kinyi.

³⁰“Kisun̄ Usen Mbuban n̄a, mè kafifila Uwu Mbuban n̄a. Emi nre Okumugwem.

³¹“Kasi lek ebi nriran ekwukwu jom-jòm ìsi ìdo inu. Kasisi si lek ebi yọk-ofia ibe ekpa ufialek kwun̄ enyi owu. Ire owu osi lek ife chi, owu môfifila lek kwun̄ bak me lek kiban̄. Emi nre Okumugwem Awaji kinyi.

³²“Nan̄a keke nyi ogwu isọọn̄ okupbe me ibot ulibi. Nyi ogwu ugane umin, mè tet ukpook me lek Awaji kwun̄. Emi nre Okumugwem.

³³“Katutuku ogwu ichen ònunu inigọọk iluk me inyọn̄ ijọn̄ kinyi.

³⁴Mọnọ ogwu ichen òluk me etete kinyi kubọk gwun̄ owot. Ma ọmọ kubọk omabe lek kwun̄, mije, îkaan̄ mgbọ enyi erebe ebi ichen me ido Ijipiti. Emi nre Okumugwem Awaji kinyi.

³⁵“Kafeen̄ ene geege me ubọk owu osabe ikitọ inu inyi ene, me ujọn̄ọ mè ulobo mè uwa.

³⁶Kisa okwukwut itọ-inu òtatat, mè ewuuk òlolobo ikem, mè alala òmimin iso, mè iko òsoso ikeke kitọ inu nyi ene. Emi nre Okumugwem Awaji kinyi ogwu osasan̄a enyi isibi me inyọn̄ ijọn̄ ido Ijipiti.

³⁷“Kirọ otutuuk orọmijọn̄ n̄a, mè kisun̄ ikan n̄a mgbọ geelek, mè kiluk ugwem gọọk me lek kiban̄. Emi nre Okumugwem.”