Read obolo Lib 2 Bible Online

Lib 2 - obolo bible

Lib 2

¹“ ‘Ene geelek òbogwa ngwugwa akpa inyi Okumugwem, môsa akpa ekọkọk iriọk inigwa ngwugwa ya, mè itap aran̄ me lek, mè isa si mgbe utop olu ònan̄a me lek uti farankinsens itoon̄ me inyọn̄,

²mè inisa ijet bọn kè Erọn ebi ngwugwa. Ogwu ngwugwa mônenigwọ ubọk ge me lek akpa ekọkọk ya etapbe aran̄ me lek, mè ikpulu otutuuk mgbe farankinsens ya igbaalek, mè iniwọp ikana oduku me inyọn̄ ntook ya, kubọk okpọkọ emen akpan. Eyi ìre ngwugwa ukan̄, eyi òkidun̄u utop olu òkibele Okumugwem ejit.

³Inu geelek òsisik me lek ngwugwa akpa ya ìbokup inyi Erọn mè ebi bọn. Eyi ìre inu òkup mbuban ichit ònan̄a me lek ngwugwa ukan̄ eyi Okumugwem.

⁴“ ‘Ire ene ibonigwa ngwugwa akpa eyi fituru ewọpbe me emen orioon̄ fituru, ene ya môsa atalek akpa ekọkọk òjajaan̄ irọ fituru unin̄i unin̄i eyi kpetap olat me lek, mè isa aran̄ igwa me lek, mè irọ si nchicha kpetap olat me lek, mè isa aran̄ ichiọọk me lek, isa inigwa ngwugwa ya.

⁵Ire ibosa uchieen̄ item akpa ekọkbe ya isa inigwa ngwugwa ya, ene ya môsa aran̄ olifu igwa me lek akpa ya. Ire, ìkpotap olat si me lek.

⁶Ene ya môkpukpuku inorie akpa ya, mè inigwook aran̄ me lek. Eyi ìre ngwugwa akpa.

⁷Ire ibotem akpa ekọkbe ya me otin̄ isa inigwa ngwugwa, môsa atalek akpa ekọkbe ijaan̄ mè itap aran̄ me lek inigwa ngwugwa ya.

⁸Ene ya mônenisa ngwugwa akpa ya eyi etembe me esese oniin̄ chi inigwa inyi Okumugwem. Ene ya môsa akpa etembe ya ijet ogwu ngwugwa. Ogwu ngwugwa mônenibọkọ akpa etembe ya, mè isa inu initoon̄ me inyọn̄ ntook ngwugwa,

⁹mè inikpọkọ sọntiik me lek okpukpuk akpa ya, kubọk okpọkọ emen akpan, mè itap ukan̄ iwọp ikana oduku òkibubaan̄ olu, inyi ire ngwugwa ukan̄ òkidun̄u utop olu eyi òkibele Okumugwem ejit.

¹⁰Inu geelek òsisik me lek ngwugwa akpa ya ìbokup inyi Erọn mè ebi bọn. Eyi ìre inu òkup mbuban ichit ònan̄a me lek ngwugwa ukan̄ eyi Okumugwem.

¹¹“ ‘Ekalululuk ìtap olat me lek ngwugwa akpa geege ebegwa inyi Okumugwem. Mije, otutuuk inu geelek etapbe olat, mè ìre aran̄ akwọọk me lek, kpebewọp ikana oduku kubọk ngwugwa ukan̄ inyi Okumugwem.

¹²Mêkọt isa inu etapbe olat mè ìyaka ire aran̄ akwọọk me lek inigwa ngwugwa adasi mfut inyi Okumugwem. Ire, kpebesa inu chi geege igwa ngwugwa ewọwọp iriọk me inyọn̄ ntook ngwugwa kubọk ngwugwa òkidun̄u utop olu.

¹³Ikalọlọ ikekitap uchi me lek otutuuk ngwugwa akpa geelek. Ikachieek ibe uchi eyi inyan̄a-ibot Awaji kinyi inan me lek ngwugwa akpa kinyi. Ìkitap uchi me lek otutuuk ngwugwa kinyi geelek.

¹⁴“ ‘Ire enyi ibenigwa ngwugwa akpa eyi adasi mfut inyi Okumugwem, mêsa nsek akpa ewọpbe me ukan̄ mè ikpukpuku inigwa ngwugwa ya.

¹⁵Mêtap aran̄ me lek akpa ewọwọp ya, mè itap si mgbe utop olu ònan̄a me lek uti farankinsens me lek, mije, îre ngwugwa akpa ke îre.

¹⁶Ogwu ngwugwa mônenigwọ okpọkọ emen akpan me lek akpa ekpukpukube ya melek aran̄ ya, igbaalek otutuuk mgbe farankinsens ya, iwọp, kubọk ngwugwa ukan̄ inyi Okumugwem.