Read obolo Lib 20 Bible Online

Lib 20 - obolo bible

Lib 20

¹Okumugwem onenitumu inyi Mosis ibe

²itumu inyi ebi Ijeren ibe, “Ogwu Ijeren geelek, mè ìre ogwu ichen ogwu òluk me etete ebi Ijeren, òsasa ene ge me lek ebi bọn inyi ibe esa egwa ngwugwa enyi Molek, ebekpakpan̄ ene ya. Ebi ama ebeteteen̄ ewuuk isa itọbọ ene ya ikpan̄.

³Emi me lek n̄a mâyaka isi ikweek ogwu òkup ikeya, mè ifieek ọmọ isan̄a me otu ifuk ebi n̄a. Mije, eyi ene ya osabe ogwu gwun̄ inyi Molek, ene ya îfifila Uwu Mbuban n̄a, mè ichaka si mbuban me lek erieen̄ n̄a òkup me mbuban.

⁴Ire ebi ama imun̄ ogwu òsasa gwun̄ kan̄ inyi Molek isan̄a, mè idaan̄ chieen̄ kiban̄ isan̄a me lek, mè itele ikpakpan̄ ene ya,

⁵emi me lek n̄a mâkana isi ikweek ogwu ene ya mè ebi ototun̄ ukan̄ kan̄, mè isan̄a ọmọ mè otutuuk ebi melek kan̄ ekibubat ikana ikigọọk isi ikiriaak Molek cha isan̄a me otu ifuk ebi kiban̄.

⁶“Ene geelek òkibubat ikana isi lek ebi nriran ekwukwu jom-jòm mè ìre ebi yọk-ofia ikisi ido ido-inu me ubọk kiban̄, mâkana isi ikweek ogwu òkup ikeya, mè ifieek ọmọ isan̄a me otu ifuk ebi kiban̄.

⁷“Ìsun̄ lek kinyi esese ìnyi emi, mè ìkup me mbuban, mije, emi nre Okumugwem Awaji kinyi.

⁸Ìkirọ otutuuk orọmijọn̄ n̄a, mè ìkiluk ugwem ìkpọ me lek orọmijọn̄ cha. Emi nre Okumugwem ogwu òkisun̄ enyi me mbuban.

⁹“Ene geelek òfefieek otu inyi ogwu ute mè ìre ogwu uga, ekpakpan̄. Ogwu ute mè ogwu uga ke îfieek otu inyi. Eya orọ, eje kan̄ ìbotoon̄ ọmọ me ibot.

¹⁰“Ire enerieen̄ igan nwa ofifi ene, mè ìre ìgan nwa ogwu melek kan̄, ekpakpan̄ ogwu enerieen̄ ya melek ogwu enenwaan̄ ya.

¹¹“Ire enerieen̄ igọọk nwa ogwu ute ilaak, ene ya îmun̄ njak ogwu ute. Eya orọ, ekpakpan̄ ogwu enerieen̄ ya melek ogwu enenwaan̄ ya. Eje kiban̄ ìbotoon̄ ema me ibot.

¹²“Ire enerieen̄ igọọk nwa ogwu gwun̄ ilaak, ekpakpan̄ ogwu enerieen̄ ya melek ogwu enenwaan̄ ya. Ema mîchaka mbuban. Eje kiban̄ ìbotoon̄ ema me ibot.

¹³“Ire enerieen̄ igọọk ofifi enerieen̄ ogbo kan̄ ilaak ilaak enerieen̄ mè enenwaan̄, ema ene iba mîlọ ijọn̄. Ekpakpan̄ ema ene iba. Eje kiban̄ ìbotoon̄ me ibot kiban̄.

¹⁴“Ire enerieen̄ igbaan̄ gwun̄ melek ogwu uga ido me lek nwa, eya ìre bukubuku nlilọ. Ebetatap ukan̄ iwọp ogwu enerieen̄ ya melek ebibaan̄ iba cha ikọọk, inyi bukubuku nlilọ ikayaka ìkup me etete kinyi.

¹⁵“Ire enerieen̄ igọọk anam ilaak, ekpakpan̄ ogwu enerieen̄ òkup ikeya, mè ekpan̄ si anam ya.

¹⁶“Ire enenwaan̄ isa lek kan̄ inyi anam geelek igọọk ọmọ ilaak, ekpakpan̄ ogwu enenwaan̄ ya melek anam ya. Ekatele ibe ema egat ugwem. Eje kiban̄ ìbotoon̄ ema gaalek me ibot.

¹⁷“Ire enerieen̄ ido ogwu ngwan̄ enenwaan̄, òrere gwun̄ ogwu uga mè ìyaka ire gwun̄ ogwu ute, me lek nwa, ema ene iba emumun̄ njak kiban̄, eya ìre inu esip. Eya orọ, me isi otutuuk ebi kiban̄, mêsan̄a ema isan̄a me otu ifuk ebi kiban̄. Mije ogwu enerieen̄ ya omun̄be njak ngwan̄ kan̄ enenwaan̄, mkpukpe ijo inu kan̄ ìbotoon̄ ọmọ me ibot.

¹⁸“Ire enerieen̄ igọọk enenwaan̄ òkup me irek ebibaan̄ ilaak, ogwu enerieen̄ ya îkpọk mbum inu òkup me okwu. Ogwu enenwaan̄ ya si îben inu òlelet me lek kan̄ iwele. Eya orọ, ebegbagbaan̄ ema ene iba isan̄a isan̄a me otu ifuk ebi kiban̄.

¹⁹“Kamun̄ njak ngwan̄ nte kwun̄ enenwaan̄ mè ìre ngwan̄ nga kwun̄ enenwaan̄, mije, eya ìre iwuwuwọlọ owot ulọk. Ijo inu kinyi ìbotoon̄ enyi ene iba me ibot.

²⁰“Ire enerieen̄ igọọk nwa ngwan̄ ogwu ute mè ìre nwa ngwan̄ ogwu uga ilaak, ene ya îmun̄ njak ngwan̄ ogwu ute mè ìre ngwan̄ ogwu uga ya. Ijo inu kiban̄ ìbotoon̄ ema ene iba me ibot. Ema mêkana òra otutuuk ugwem kiban̄, kpebekaan̄ mfut geege òbochieek erieen̄ kiban̄ mgbọ ema isikwaan̄.

²¹“Ire enerieen̄ ibọkọ nwa ogwu ngwan̄, eya ìre filafila. Ogwu enerieen̄ ya îmun̄ njak ogwu ngwan̄. Eya orọ, ọmọ melek ogwu enenwaan̄ ya mêkana òra me otutuuk ugwem kiban̄.

²²“Ìkirọ otutuuk orọmijọn̄ n̄a, mè ìkisun̄ ikan n̄a mgbọ geelek, mè ìkiluk ugwem ìgọọk me lek kiban̄, inyi ijọn̄ ere mbasa enyi isi itap ibe enyi eluk ikajit enyi.

²³Ikarọ orọmijọn̄ ebi ido cha ebi nkilap isan̄a inyi enyi enebọkọ ijọn̄ kiban̄, mije, îre orọmijọn̄ cha ke ema ekirọ eyi òjọjọ emi ejit me lek kiban̄.

²⁴Ire, ǹkitumu inyi enyi ibe ke ijọn̄ kiban̄ ìbonire eyi kinyi me ìrot. Emi mâkana ata ijọn̄ ya òkisibi anam mè mfut uti inyi enyi, inyi inire eyi kinyi. Emi nre Okumugwem Awaji kinyi ogwu òtatap esese me etete kinyi melek ebi ofifi ido geelek.

²⁵“Eya orọ, enyi mêtap si esese me etete anam mè ofut echi òkaan̄ mbuban me lek, mè echi ìkakaan̄ mbuban me lek, inyi enyi ekafifila lek kinyi sa me lek anam mè ofut mè inu òkinyinyọnọ me ijọn̄ echi nsan̄abe isun̄ esese me isi kinyi kubọk echi òkakaan̄ mbuban me lek.

²⁶Ìkup me mbuban ìnyi emi, mije, emi Okumugwem, emi ǹkup me mbuban. Emi ǹsasan̄a enyi me etete otutuuk ido geelek isun̄ esese, inyi enyi enekana ebi n̄a.

²⁷“Enerieen̄ geelek mè ìre enenwaan̄ geelek me etete kinyi ogwu òrere ogwu nriran ekwukwu jom-jòm, mè ìre ogwu ikwaan̄ ekwukwu jom-jòm, ekpakpan̄ ojelek ogwu òkup ikeya. Esasa ewuuk etọbọ ekpan̄. Eje kan̄ ìbotoon̄ ọmọ me ibot.”