Read obolo Lib 25 Bible Online

Lib 25 - obolo bible

Lib 25

¹Mgbọ Mosis okupbe me inyọn̄ ogoon̄ Saina, Okumugwem onenitumu inyi ibe

²itumu inyi ebi Ijeren ibe, “Mgbọ enyi isinin̄ inyọn̄ ijọn̄ ya eyi emi mbanyi enyi, ijọn̄ ya si môkaan̄ isiki-efuuk isasa imin Okumugwem.

³Acha gweregwen ke enyi ebekiwop inu me uko kinyi, mè ikirọkọ mfut uko, mè ikititiin̄ isun̄ me uwu isun̄-inu. Acha gweregwen si ke enyi ebekikpaan̄ lek olik gerep me uko gerep kinyi, mè ikigbeme mfut kiban̄, mè ikititiin̄ isun̄ inyi lek kinyi.

⁴Ire, òso acha jaaba ìbore Acha Mbuban eyi itap-efuuk inyi ijọn̄ ya. Acha ya ìbore acha isiki-efuuk eyi òbonyi Okumugwem umin. Me acha ya, enyi kpebewop inu geege me inyọn̄ ijọn̄ ya, enyi kpebekpaan̄ si lek olik gerep geege me uko gerep kinyi.

⁵Ofifi si, mfut uko geelek òkup me lek kan̄ itibi, ikarọkọ ìtitiin̄ ìsun̄. Gerep geelek òtoto me lek olik gerep cha echi enyi kpekpaan̄ lek, ikagbeme ìtitiin̄ ìsun̄, mije, acha ya ìbore Acha Mbuban eyi itap-efuuk inyi ijọn̄ ya.

⁶Ire, inu geelek ijọn̄ ya môsan̄abe isibi me Acha Mbuban ya ìbore inorie inyi enyi mè ebi usun̄ kinyi ebirieen̄ mè ebibaan̄, mè ebi ikwaan̄ kinyi mè ebi ichen ìluk me etete kinyi,

⁷mè anam kinyi geelek, mè anam oron geelek òkup me inyọn̄ ijọn̄ kinyi. Inu geelek òkup me lek kan̄ itibi isibi me ijọn̄ ya ìbore inorie inyi enyi.

⁸“Enyi mêfuk Acha Mbuban jaaba, eyi òrere acha jaaba mgbọ jaaba. Otutuuk otu ifuk acha cha mônenisibi akọp acha ini mè onaan̄ge.

⁹Me òso akọp usen me onyan̄ jaaba me òso akọp acha ini mè onaan̄ge ya, enyi mêwut otita unye unye. Me usen ya, òrere Usen Irọ-esuuk, ida otita ìbokitataan̄ me ere geelek me otutuuk inyọn̄ ijọn̄ kinyi.

¹⁰Enyi mêsun̄ òso akọp acha go ya me mbuban, mè inyi otutuuk ebi geelek ìluk me inyọn̄ ijọn̄ kinyi utelelek. Acha ya ìbore acha ijọk utelelek inyi enyi. Ene geelek ònyanyam ijọn̄ ebi uwu kiban̄ môgwu ikom ifo inyọn̄ ijọn̄ ebi uwu kiban̄ ya. Ogwu geelek enyambe me usun̄ môgwu ikom ifo ototun̄ ukan̄ kan̄.[10]

¹¹Òso akọp acha go ya ìbore acha ijọk utelelek inyi enyi. Enyi kpebewop inu geege. Inu geelek òtitibi me lek kan̄, kpeberọkọ ititiin̄ me uwu isun̄-inu. Ikeya si, gerep geelek eyi kpekpaan̄ lek, kpebegbeme ititiin̄ me acha ya.

¹²Mije, acha ya ìbore acha ijọk utelelek, mè ire si acha òkup mbuban isa inyi enyi. Inorie enyi eberie ìre inu òtibi me lek kan̄ me ijọn̄ ya.

¹³“Me acha ijọk utelelek yi, ene geelek môgwu ikom ifo inyọn̄ ijọn̄ ebi uwu kiban̄ eyi înyambe.[11]

¹⁴“Eya orọ, ire ogwu Ijeren inyam ijọn̄ inyi ogwu Ijeren ogbo kan̄, mè ìyaka ire, ire ogwu Ijeren ibọkọ ijọn̄ me ubọk ogwu Ijeren ogbo kan̄ ilep, ge ikafeen̄ ge.

¹⁵Ogwu òbolep ijọn̄ me ubọk ogwu melek kan̄ môfuk iriọọn̄ otu ifuk acha òraraka me lek acha ijọk utelelek. Ikeya si, ogwu òbonyam ijọn̄ ya si ìbotumu ewe kan̄ ikpọ me lek otu ifuk acha ijọn̄ ya obokup itibi mfut sabum ofifi ijọk utelelek.

¹⁶Otu ewe ijọn̄ ya môbene, ire acha òsisik iwa, mè igele, ire acha òsisik ìkawa. Mije, ebenyam ijọn̄ ya ikpọ me lek otu ifuk mgbọ ebewop mfut mè irọkọ me inyọn̄ ijọn̄ ya.

¹⁷Ene geege ikafeen̄ ogwu melek kan̄. Ire, ìkitet ukpook me lek Awaji kinyi. Mije, emi nre Okumugwem Awaji kinyi.

¹⁸“Ìkirọ otutuuk orọmijọn̄ n̄a, mè ìkigbala chieen̄ ìkisun̄ ikan n̄a, inyi enyi mêluk me inyọn̄ ijọn̄ ya me utelelek.

¹⁹Mgbọ ya si, ijọn̄ ya mônenisan̄a chieen̄ mfut kan̄ geelek isibi inyi enyi erie, mè erie ejot owot. Enyi mêneniluk si me inyọn̄ ijọn̄ ya me utelelek.

²⁰Usini mgbọ, enyi mêkidido lek kinyi ibe ìre keke ke enyi eberie me òso acha jaaba, me ere enyi kpewop inu geege, kperọrọkọ si inu geege.

²¹Emi mâria ugbana n̄a igwook enyi me lek enenen me òso acha gweregwen, ire lek, inorie ijọn̄ ya môsan̄abe isibi me acha ge ya gaalek môwa iso inorie îkisan̄a isibi acha ita.

²²Mgbọ enyi mêkiwop mfut me inyọn̄ ijọn̄ ya me òso acha jeeta, îre oka inorie eyi òso acha gweregwen ya ke enyi ebekirie. Enyi mêrie oka inorie ya si mege ire mgbọ enyi mêwopbe mfut me uko me òso acha onaan̄ge, mè irọkọ.

²³“Ire, ijọn̄ ya, ene geege ìkpobonyanyam ifieek ewe mgbọ geege, mije, ijọn̄ ya ìre eyi n̄a. Ofifi si, enyi ìre gaalek ebi ichen, mè ebi ìnenigọọk emi igbaan̄ iluk.

²⁴Me otutuuk ere mânyibe enyi me ìrot, ìmun̄ ibe ke ijọn̄ geelek enyambe môyaka ika igọọk ogwukaan̄ me unen, ke ijọn̄ ya ìkpobia me ubọk ogwu òlelep.

²⁵“Ire ogwu Ijeren irọn̄ ugbọọri, mè inyam ijọn̄ kan̄ mije una-lek, ogwu ngwan̄ ogwu ògbegbe irerie ìrot kan̄, môkọt inifaka ijọn̄ ngwan̄ kan̄ ya isibi.

²⁶Ire ene ya ìkakaan̄ ogwu òbokọt ifaka ijọn̄ ya isibi, mè ire ubọk kan̄ iyaka inisoon̄ me mgburudun̄,

²⁷ene ya môfuk otu ifuk acha òsisik sabum ofifi acha ijọk utelelek, mè iyaka ikpoko echi mfut ònan̄a me ijọn̄ ya mosibibe me otu ifuk acha cha ikpe inyi ogwu òlelep ijọn̄ ya, mè ibọkọ ijọn̄ kan̄.

²⁸Ire, ire ìkakọt ìkaan̄ ikpoko ìbosa ikpe me otu ifuk acha òsisik cha, ijọn̄ ya môbia me ubọk ogwu òlelep mege ire ofifi acha ijọk utelelek, mgbọ ekiyaka inu geelek ijet ebikaan̄. Mgbọ ya ke ijọn̄ kan̄ môyaka ika igọọk ọmọ.

²⁹“Ire ene inyam uwu kan̄ me emen ama ewakbe mgban ikana, ene ya îkaan̄ unen ifafaka uwu kan̄ ya isibi, mege ire mgbọ acha ge môrakabe itoon̄ me lek. Me etete acha ya, ene ya môkọt ifaka uwu kan̄ isibi.

³⁰Ire, ire ene ya ìkakọt ìfaka uwu kan̄ ya ìsibi sabum acha ya onita, uwu ya eyi òkup me ama ewakbe mgban ikana ya îbia inyi ogwu òlelep melek ebi bọn ire ukot kiban̄ geelek. Kpebeyaka isa inyi ogwukaan̄ me acha ijọk utelelek geege.

³¹Ire, uwu geelek òkup me ama eyi kpewak mgban ikana, mêmọnọ kubọk uwu òkup me emen uko. Ogwukaan̄ môkọt inifaka isibi mgbọ geelek. Acha ijọk utelelek isi ire, mêyaka uwu elepbe me ama òkup ikeya inyi ogwukaan̄.

³²“Ire, ebi otoko kè Libai mîkaan̄ unen ifafaka uwu kiban̄ ema enyambe isibi mgbọ geelek me ama kiban̄.

³³Inu geelek ogwu otoko kè Libai okaan̄be, mè ìre uwu òkup me emen ama ewakbe mgban ikana, mêkọt ifaka isibi, mè ikọt si iyaka inyi ogwukaan̄ me acha ijọk utelelek. Mije, uwu geelek ogwu otoko kè Libai okaan̄be me ama kiban̄ geelek, eya ore ìrot eyi kan̄ me etete otutuuk ebi Ijeren.

³⁴Ire, ijọn̄ ere anam okitaka mbubet echi òkukup ikana ama ebi otoko kè Libai geelek, kpebenyam kubọk ge. Mije, ijọn̄ geelek òkup ikeya ìre ìrot ebi otoko kè Libai ire mgbọ geelek.

³⁵“Ire ogwu Ijeren ogbo kwun̄ irọn̄ ugbọọri, ìkayaka ìkọt ìkpọ chieen̄ me lek kan̄, owu tap ubọk nyi ene ya kubọk owu môtapbe inyi ogwu ichen mè ìre ogwu ògọgọọk owu igbaan̄ iluk, inyi ene ya ikọt iluk me etete kinyi.

³⁶Ire ofọọk ikpoko inyi ogwu òkup ikeya, kabọkọ oruru geege ìtoon̄ me inyọn̄, kabọbọkọ inu geege ìsaba ìraka otu ifuk ikpoko onyibe ene ya. Inu geelek oborọ melek ene ya, rọ me ukpook Awaji kwun̄, mije, ugwem ngwan̄ kwun̄ ìkup me ubọk kwun̄.

³⁷Kafọọk ikpoko kwun̄ ìnyi ogwu òkup ikeya ìsa ìweek oruru. Kanyinyi si ene ya inorie kwun̄ ìsa ìweek urot.

³⁸Emi nre Okumugwem Awaji kinyi ogwu òsasan̄a enyi isibi me inyọn̄ ijọn̄ ido Ijipiti, inyi mâsa ijọn̄ ebi Kenan ikana inyi enyi, mè inire Awaji kinyi.

³⁹“Ire ogwu Ijeren ogbo kwun̄ irọn̄ ugbọọri, mè inisa lek kan̄ itap owu me ubọk ibọkọ ikpoko, mè ikana usun̄ isa inyi owu, karọ inyi ọmọ isi ikwaan̄ inyi owu kubọk ogwu usun̄.

⁴⁰Kpan̄asi ikeya, mọnọ ọmọ kubọk ogwu obọkọbe me ọkọ, mè ìyaka ire ogwu ichen ònunu inigọọk owu iluk sọnja mgbọ. Ene ya môgọọk owu isi ikwaan̄ mege ire acha ijọk utelelek,

⁴¹mè ininan̄a itele owu ifo. Ọmọ mè ebi bọn mênan̄a ifon ika igọọk ebi otoko kiban̄ mè ijọn̄ ebi nte nte kan̄.

⁴²Mije, otutuuk ebi Ijeren ìre ebi usun̄ n̄a, ebi emi nsan̄abe isibi me ido Ijipiti. Eya orọ, kpebekinyanyam ema kubọk ebi usun̄.

⁴³Kasa me unye ubọk ìkpulu ogwu Ijeren. Kpan̄asi ikeya, rọ ọmọ inu me lek me irak ukpook Awaji kwun̄.

⁴⁴“Ire enyi ibelep usun̄ ebirieen̄ mè ìre usun̄ ebibaan̄, enyi mêlep inan̄a me etete ebi ofifi ido chi ìkukup ikana enyi.

⁴⁵Enyi mêkọt ilep si ebi usun̄ inan̄a me etete ebi ofifi ido ebi ìgọgọọk enyi igbaan̄ iluk, mè bọn otoko kiban̄ ebi emaan̄be me inyọn̄ ijọn̄ kinyi, inyi ema enekana ebi enyi ekaan̄be.

⁴⁶Enyi mêkọt iyaka ema inyi bọn kinyi me ìrot mgbọ enyi isikwaan̄, inyi ema enere inu-nkaan̄ kiban̄. Ife cha ebere usun̄ inyi enyi ire mgbọ geelek. Ire, ebi Ijeren ebi ngwan̄ kinyi, enyi kpebesa unye ubọk mè tukutuku ikpulu ene geege me etete kiban̄.

⁴⁷“Ire ogwu ichen mè ìre ogwu ògọgọọk enyi iluk sọnja mgbọ inibọọn̄ ubọọn̄, mè ire gwun̄ owot Ijeren ogwu ògbọgbọọn̄ inisi inyam lek kan̄ inyi ogwu ichen ya òbọbọọn̄ ubọọn̄, mè ìre ogwu ototun̄ ukan̄ ogwu ichen ya,

⁴⁸ogwu ugbọọn̄ ogwu Ijeren ya îkaan̄ unen iyayaka ifaka lek kan̄ isibi me uwu usun̄ ya. Eya orọ, ene ge me etete ebi ngwan̄ kan̄ môkọt inifaka ọmọ isibi me uwu usun̄ ya.

⁴⁹Ngwan̄ ogwu ute mè ìre gwun̄ ngwan̄ ogwu ute, mè ìyaka irere ofifi ene ogwu òje me owot iman ogwu ute, môkọt inifaka ọmọ isibi me uwu usun̄ ya. Ire inu iyaka inije ijaan̄ me lek kan̄ me mgburudun̄, ọmọ me lek kan̄ môkọt ifaka lek kan̄ isibi me uwu usun̄ ya, mè inan̄a ifo me utelelek.

⁵⁰Ọmọ melek ogwu òlelep ọmọ ya mênigbaan̄ ifuk otu ifuk acha bene me mgbọ înyambe lek kan̄ si re ofifi acha ijọk utelelek. Ikpoko ìbokpe isa ilep lek kan̄ isibi me uwu usun̄ ya, ebefuk igọọk me otu ifuk ikpoko ekikpe ogwu ikwaan̄ ebọkọbe me ọkọ igọọk me otu ifuk acha ya ema efukbe.

⁵¹Ire acha òsisik sabum acha ijọk utelelek imalek iwa, ọmọ môyaka usini me lek ikpoko esabe ilep ọmọ ya ikpe, igọọk me otu ifuk acha òsisik.

⁵²Ire, ire otu ifuk acha òsisik sabum acha ijọk utelelek ya ìkayaka ìwa, mêfuk ifuk ikpoko ìbokpe igọọk me otu ifuk acha òsisik, inyi ikpe.

⁵³Ogwu òlelep ogwu Ijeren ya ìbomọnọ ọmọ kubọk ogwu egwegwen me ọkọ, ìkposa unye ubọk mè tukutuku ikikpulu ọmọ, me chieen̄ kinyi.

⁵⁴Ire, ire kpefaka ene ya isibi me oniin̄ òkup ikeyi, acha ijọk utelelek isi ire, mêtele inyi ifo, ọmọ melek bọn kan̄.

⁵⁵Mije, îre emi ke otutuuk ebi Ijeren ekisi ikwaan̄ inyi. Ema ìre ebi usun̄ n̄a, ebi emi nsan̄abe isibi me ido Ijipiti. Emi nre Okumugwem Awaji kinyi.”