Read obolo Lib 26 Bible Online

Lib 26 - obolo bible

Lib 26

¹Okumugwem onenitumu ibe, “Ikarom mkpọmfaka geege ìnyi lek kinyi, mè ìre inu geelek ekọkọ. Ikabebene si ewuuk mfaka geege ìgwuun̄ ìsa ìrọ awaji, ikayiyik si ewuuk erọkọbe inu me lek me ere geege me inyọn̄ ijọn̄ kinyi. Ikatọbọ si ebum ìnyi inu chi geege. Mije, emi nre Okumugwem Awaji kinyi.

²“Ìkisun̄ Usen Mbuban n̄a, mè ikafifila Uwu Mbuban n̄a. Emi nre Okumugwem.

³“Ire enyi ikiluk ugwem igọọk me lek orọmijọn̄ n̄a, mè ìkigwuun̄ chieen̄ ikirọ ikọ ntọbe me irek geelek,

⁴mâkinyi enyi ibot me mgbọ kan̄, mè ikirọ inyi ijọn̄ kinyi itibi inu ijaan̄, mè ikirọ si inyi otutuuk uti geelek òtibi me inyọn̄ ijọn̄ kinyi ikito mfut kiban̄ me mgbọ me mgbọ.

⁵Mfut uko kinyi môkiwa enenen, ire lek, enyi mêkpọkpọ ikirọkọ inu me uko abayaage ire mgbọ enyi mêbenebe ikigbeme aya mfut gerep, mè ikpọkpọ ikigbeme mfut gerep mege ire mgbọ enyi mêyakabe ikiwop aya mfut me uko. Enyi mêkirie inorie kinyi, mè ikirie ijot owot, mè ikiluk si me inyọn̄ ijọn̄ kinyi me utelelek.

⁶“Mânyi enyi esuuk me inyọn̄ ijọn̄ kinyi. Enyi mêkilaak me utelelek, kpunu inu geege òbotap enyi ukpook me lek. Mârieen̄ otutuuk ijo anam geelek isan̄a me inyọn̄ ijọn̄ kinyi. Ene geege ìkpoben akọn̄ inu me inyọn̄ ijọn̄ kinyi.

⁷Kpan̄asi ikeya, îre enyi ebekibeben akọn̄ igọọk ebi ochicha kinyi, mè ikitim ikpan̄ ema.

⁸Enyi ene go mêtim akọn̄ ikpan̄ efit ebi ochicha kinyi. Enyi efit ene mêtim akọn̄ ikpan̄ akọp obop ebi ochicha kinyi.

⁹“Mâgọọk enyi ikeke, mè ikpọ enyi chieen̄ ijaan̄. Mârọ si inyi enyi emumana, mè ewa enenen me otu ifuk. Mârọ otutuuk inyan̄a-ibot n̄a iso melek kinyi.

¹⁰Enyi mêkirie inorie oka acha me otu, mêbebene ikirọkọ echi ayaya. Enyi mênenikisan̄a inorie oka acha isibi me uwu isun̄-inorie, inyi emun̄ irek etap echi aya acha.

¹¹Mânama ere iluluk n̄a me etete kinyi, m̀kpajọ ejit me lek kinyi.

¹²Emi mâkup melek kinyi mgbọ geelek, mè ire Awaji kinyi, enyi mêrere si ebi n̄a.

¹³Emi nre Okumugwem Awaji kinyi, ogwu òsasan̄a enyi isibi me ido Ijipiti, inyi enyi ekayaka ìre usun̄ ìnyi ema. Emi nsọp enyi ọgbọn usun̄ isan̄a me ebek, inyi enyi ekekọt ebene isi eje ije.

¹⁴“Ire, ire enyi kpegban̄ utọn̄ inyi emi, mè kperọ otutuuk ikọ chi ntọbe,

¹⁵mè ire enyi ijit isusun̄ orọmijọn̄ n̄a, mè ijọ ejit me lek ikan n̄a, mè enyi kperọ ikọ ntọbe, mè isa me ikeya ififila inyan̄a-ibot n̄a melek kinyi,

¹⁶me atikọ, inu mbarọ enyi ìre ikeyi: Mâtap uga ukpook mè nriki igak enyi lek, mè inyi enyi orukan̄ òkijet ene ita, mè orukan̄ òkibak uga ukan̄ ichit ene lek, mè ikifiat ene chieen̄ isan̄a, mè ikijijit ene ugwem isan̄a kpai. Mfut geelek enyi mêwopbe me uko kinyi, enyi ebekiwowop ichep, mije, îre ebi ochicha kinyi ebekirie otutuuk inorie uko kinyi.

¹⁷Mâkana isi n̄a ikweek enyi, mè irọ ibe ebi ochicha kinyi etim akọn̄ ekpan̄ enyi. Ebi oriara kinyi ebekikpulu enyi, enyi mêkekilibi mkpat akọn̄ me mgbọ kpunu ogwu òkigọọk enyi.

¹⁸“Ire enyi kpegban̄ si utọn̄ inyi emi me irak otutuuk osusut kechi, mârọ inyi osusut kinyi iyok mgbọ jaaba igak adasi mgbọ, mije ijo inu kinyi.

¹⁹Mâsulu enyi osusut, mè isulu ijo ugumulek kinyi cha ikpọk ita kpai. Mârọ inyi isinyọn̄ me ido kinyi ichat inye kubọk okwukwut, inyi ibot geege ikarep, mè irọ si inyi ijọn̄ kinyi ichat inye kubọk ekwe, inyi inu geelek enyi mêwopbe ikatibi kubọk ge.

²⁰Otutuuk unye ikwaan̄ geelek enyi mêsibe me inyọn̄ ijọn̄ kinyi ìbore ikike, ijọn̄ kinyi ìkposibi inu geege, otutuuk uti geelek òkup me inyọn̄ ijọn̄ kinyi ìkpoto mfut geege.

²¹“Ire enyi ikpọkpọ itet lek inye ikije ikeme emi, mè ijit igbagban̄ utọn̄ inyi emi, mâkpọk isọkọ osusut kinyi, inyi iyok mgbọ jaaba si igak ubọk îkupbe mgbọ keyi, igọọk me lek ike ijo inu kinyi osabe ikup.

²²Mâria ijo anam oron itap me etete kinyi, inyi enekpan̄ nsabọn kinyi, mè enyi ekana ebi ìnan bọn. Anam chi si mêchim anam kinyi ikpan̄ isan̄a, mè irọ inyi enyi ese me otu ifuk, mè isa me ikeya irọ otutuuk oniin̄ emen ama kinyi inọọn̄.

²³“Ire otutuuk osusut kechi ìkasuuk enyi lek ìnyi emi, mè ire enyi ikpọkpọ itet lek inye si ikije ikeme emi,

²⁴emi me lek n̄a mâje si ikeme enyi mije ijo inu kinyi, mè isulu enyi osusut ònyenye mgbọ jaaba igak eyi enyi ewuukbe lek ibọkọ.

²⁵Mâria akọn̄ itap me ido kinyi, isa isulu enyi osusut òkekem me useen̄ enyi efifilabe inyan̄a-ibot n̄a. Akọn̄ isililaba enyi itap me emen ama kinyi ere enyi ebesi ilet lek, mâneniria ikpele ijo orukan̄ eyi kpebekọt igwa itap me etete kinyi. Sa me ikeya, mêneniyaka enyi itap me ubọk ebi ochicha kinyi.

²⁶Mâchit oniin̄ geelek enyi ekisa ikaan̄ inorie irie ikinye lek isan̄a kpai. Inorie mônan enenen, ire lek, akọp ebibaan̄ mêgbaan̄ itap otutuuk fituru ebi akọp ototun̄ ukan̄ kiban̄ eberie iwọp me emen orioon̄ fituru ge gaalek. Ema isiwọp isan̄a, mênenikiben irọọn̄ iche otubọk otubọk, inyi enyi ekọt elaka ubọk me otu. Enyi isirie isan̄a, môkup kubọk enyi kpererie.

²⁷“Ire osusut kechi ìkakọt ìrọ inyi enyi egban̄ utọn̄ enyi emi, mè enyi ikpọkpọ si ikije ikeme emi,

²⁸mgbọ ya ke emi me lek n̄a mâninaan̄ ejit uyok uyok, mè ikirọ inu melek kinyi uyọt uyọt mije ijo inu kinyi, mè isa me ikeya isulu enyi osusut òfefieek mgbọ jaaba igak otutuuk kechilọ.

²⁹Mgbọ ya, enyi mêkitet nsabọn kinyi ebirieen̄ mè nsabọn kinyi ebibaan̄ ikpan̄ itaka mije uraafiọọn̄.

³⁰M̀bagwagwak otutuuk isi-ijọn̄ kinyi cha, mè igbugbọ ntook nsensi cha enyi enamabe ikisa ifaka awaji ura kinyi cha igwook, mè ikpan̄ enyi isan̄a, mè ikpulu nkwukwu kinyi ititiin̄ ibene me inyọn̄ nkwukwu mkpọmfaka kinyi cha, mè ijọ ejit me lek kinyi.

³¹M̀bagwagwak otutuuk ama kinyi isan̄a kpai, mè igbugbọ si otutuuk ere mbuban cha enyi enamabe inyi emi igwook. M̀kpayaka ikigban̄ utop olu ngwugwa kinyi cha enyi ekigwa inyi emi.

³²Emi me lek n̄a mâjijaka inyọn̄ ijọn̄ kinyi isan̄a kpai, ire lek, môke ebi ochicha kinyi ebi ìluk me inyọn̄ ijọn̄ ya chieen̄ enenen.

³³Mâyiyala enyi, mè ililaba enyi isi igwook me ido òkup esese esese, mè iwọọk oge akọn̄ n̄a isa igọọk enyi, mè ijijaka ijọn̄ kinyi, mè igwak otutuuk ama kinyi ikana ǹrioon̄.

³⁴Mgbọ ya, ijọn̄ ya mônenikaan̄ owuwa acha isiki-efuuk, me otutuuk acha cha enyi mêkupbe me ido ebi ochicha kinyi. Ijọn̄ kinyi mônenikaan̄ òjot òjot isiki-efuuk eyi kan̄.

³⁵Otutuuk mgbọ ijọn̄ kinyi môlaakbe ukpọk, ijọn̄ ya mônenikaan̄ isiki-efuuk ya eyi ikakọtge ìkaan̄ me mgbọ isiki-efuuk cha enyi ekiluk me inyọn̄ ijọn̄ ya.

³⁶“Ebi kinyi ebi mêkupbe me ògat ugwem me ama ebi ochicha kinyi cha, m̀batatap ema ukpook owot igak emen, ire lek, ida efet ikike òkiwut isisik inwan̄ me otu oron môtap ema ekot ugwem me ukot, mè irọ inyi ema elibi ekot kubọk ke îre oge akọn̄ ke ekisa igọọk ema. Ema mêkililiin̄, mè ikirurọn̄ọ me ijọn̄ me mgbọ kpunube ogwu ògọgọọk ema.

³⁷Ge môlibi itọbọ ge kubọk mgbọ ekilibi ekot mkpat akọn̄, me mgbọ kpunube ogwu òkililaba ema. Enyi kpebekọt ikeke ida ebi ochicha kinyi kubọk ge.

³⁸Enyi mêchieen̄ ita me etete ebi ofifi ido. Ijọn̄ ebi ochicha kinyi môrie enyi.

³⁹Ebi kinyi ìsisik me ama cha mêtak ita me inyọn̄ ijọn̄ ebi ochicha kinyi mije ijo inu kinyi. Ema mêjet si ita mije ijo inu ebi nte nte kiban̄.

⁴⁰“Ire, ire ema iyaka inifuk ijo kiban̄, mè ifuk si ijo ebi nte nte kiban̄, mije ugwem isi iba ema ekaan̄be me lek n̄a mè ijeje ikeme eyi ema ejebe ikeme emi,

⁴¹eyi òrọrọ inyi emi me lek n̄a si ǹje ǹkeme ema, mè ǹrieen̄ ema ǹtap me etete ebi ofifi ido, ire ema iyaka ininọ lek, mè inwene ejit, mè ibọnọ lek, mè irọ inu ògbegbe ibe ema erọ mije ijo kiban̄,

⁴²mgbọ ya, emi mâkeek inyan̄a-ibot eyi nnyan̄abe melek kè Jekọp mè eyi nnyan̄abe melek kè Ajiki, mè eyi nnyan̄abe melek kè Ebereyam, mè ikeek ijọn̄ ya.

⁴³Ire, ema mêdasi iyaak itele ijọn̄ ya, inyi ijọn̄ ya ilaak ukpọk, mè ikaan̄ òjot òjot isiki-efuuk me ike mgbọ cha echi ema kpebekup. Ema mênenikpe mkpukpe ijo inu kiban̄, ògak ge, mije ikan n̄a ema ejitbe, mè orọmijọn̄ n̄a eyi ema echabe.

⁴⁴“Ire, ubọk geelek îkupbe ikeya, mgbọ ema mêkupbe me ido ebi ochicha kiban̄, emi m̀kpajit ema itele, m̀kpajọ ejit me lek kiban̄. Emi m̀kpabakpan̄ ema isan̄a kpai, inyi inyan̄a-ibot n̄a melek kiban̄ ikafiat ìsan̄a isi ge. Mije, emi ìre Okumugwem Awaji kiban̄.

⁴⁵Ire, mije kiban̄, mâkeek inyan̄a-ibot nnyan̄abe melek ebi nte nte kiban̄, ebi nsan̄abe isibi me ido Ijipiti me chieen̄ owuwa ebi ofifi ido, inyi ǹnenre Awaji kiban̄. Emi nre Okumugwem.”

⁴⁶Echichi ore orọmijọn̄ mè ikan mè nteme echi Okumugwem onyibe Mosis me inyọn̄ ogoon̄ Saina, echi òbokikpulu irọrọ Okumugwem geelek melek ebi Ijeren.