Read obolo Lib 3 Bible Online

Lib 3 - obolo bible

Lib 3

¹“ ‘Ire ene ibonigwa ngwugwa esuuk, mè ibosa eriembuuk, eyi orie mè ìre uman, inigwa ngwugwa ya, ene ya môsa anam eyi kpunube ìroon̄ geege me lek inigwa ngwugwa ya me isi Okumugwem.

²Ene ya môtoon̄ ubọk kan̄ me ibot anam ya, mè ikpan̄ anam ya me isotu Atanga Chinichini. Bọn kè Erọn ebi ngwugwa mênenisa eje anam ya itọp igwook ikana me lek otutuuk agba owot ntook ngwugwa ya,

³mè inisa otutuuk okpọn̄ òkakana otutuuk inu geelek òkup me emen owot anam ya ichit, mè echi òkup me lek inu emen owot cha, iniwọp me inyọn̄ ntook ya kubọk ngwugwa ukan̄ inyi Okumugwem.

⁴Môsan̄a si ichip iba òkup me okwut ebon anam ya mè okpọn̄ òkup me lek ichip cha, mè isan̄a si ejit anam ya mè akwaan̄ òkakana ichit ejit ya, isa igbaalek ichip kan̄ cha.

⁵Bọn kè Erọn mêneniwọp inu chi ikana oduku me inyọn̄ ntook ngwugwa. Mêsa inu chi itoon̄ me inyọn̄ inu ngwugwa ewọwọp iriọk eyi òwuwuuk lek ikup me inyọn̄ iye òkup me lek ukan̄ ya, mè igbaan̄ ema otutuuk iwọp ikana oduku òkibubaan̄ olu. Eyi ìre ngwugwa ukan̄ òkidun̄u utop olu eyi òkibele Okumugwem ejit.

⁶“ ‘Ire ene ya ibosa arọọn̄ mè ìre ebot inigwa ngwugwa esuuk inyi Okumugwem, môkọt isa orie mè ìre uman eyi kpunube ìroon̄ geege me lek inigwa ngwugwa ya.

⁷Ire gwun̄ arọọn̄ ke ene ya obosa inigwa ngwugwa, môsa inu me isi Okumugwem,

⁸mè itoon̄ ubọk kan̄ me ibot anam ya, mè igwu anam ya me isi Atanga Chinichini. Bọn kè Erọn mênenisa eje gwun̄ arọọn̄ ya itọp igwook ikana me lek otutuuk agba owot ntook ngwugwa ya.

⁹Mêsan̄a usini okpọkọ me lek anam ngwugwa esuuk ya, òrere okpọkọ emen akpan, isa igwa ngwugwa ukan̄ inyi Okumugwem. Okpọkọ echi ebesan̄a ìre okpọn̄ arọọn̄ ya eyi òkup me igbo edim kan̄ ere òkup ufuk ufuk. Mêfieek otutuuk edim arọọn̄ ya iriaak me lek ukwuuk udun̄ kan̄, mè isan̄a si okpọn̄ òchichit inu emen owot kan̄, mè otutuuk okpọn̄ òkup me lek inu geelek òkup me emen owot kan̄,

¹⁰melek ichip iba òkup me okwut ebon kan̄ mè okpọn̄ òkup me lek ichip cha. Mêsan̄a si ejit anam ya mè akwaan̄ òkakana ichit ejit ya, isa igbaalek ichip kan̄ cha.

¹¹Ogwu ngwugwa mônenibọkọ okpọkọ emen akpan chi iwọp ikana oduku òkibubaan̄ olu me inyọn̄ ntook ya kubọk inorie esabe igwa ngwugwa ukan̄ inyi Okumugwem.

¹²Ire ebot ke ene ya obosa inigwa ngwugwa, môsa inu me isi Okumugwem,

¹³mè itoon̄ ubọk kan̄ me ibot anam ya, mè igwu anam ya me isi Atanga Chinichini. Bọn kè Erọn mênenisa eje gwun̄ ebot ya itọp igwook ikana me lek otutuuk agba owot ntook ngwugwa ya.

¹⁴Mêsan̄a okpọkọ emen akpan me lek anam ngwugwa esuuk ya isa igwa ngwugwa ukan̄ inyi Okumugwem. Okpọkọ cha ìre okpọn̄ òchichit inu emen owot kan̄, mè otutuuk okpọn̄ òkup me lek inu geelek òkup me emen owot kan̄,

¹⁵melek ichip iba òkup me okwut ebon kan̄ mè okpọn̄ òkup me lek ichip cha. Mêsan̄a si ejit anam ya mè akwaan̄ òkakana ichit ejit ya, isa igbaalek ichip kan̄ cha.

¹⁶Ogwu ngwugwa mônenibọkọ okpọkọ emen akpan chi iwọp ikana oduku òkibubaan̄ olu me inyọn̄ ntook ya kubọk inorie esabe igwa ngwugwa ukan̄ òkidun̄u utop olu eyi òkibele Okumugwem ejit. Otutuuk okpọn̄ ìkup inyi Okumugwem.

¹⁷“ ‘Me ukot kinyi geelek, me ere geelek enyi mêlukbe, ogwu Ijeren geege ikalululuk ìrie eje mè ìyaka ire okpọn̄ mgbọ geege. Eyi ìre ikan òbokup isi ire ukot geelek.’ ”