Read obolo Lib 5 Bible Online

Lib 5 - obolo bible

Lib 5

¹“ ‘Ire igwen ene me ata-ikọ me lek inu eyi îsabe chieen̄ kan̄ imun̄, mè ìre eyi îriọọn̄be, ene ya ojijit itutumu ikọ òfo me lek inu ya, ene ya îrọ ijo inu, ufialek inu ya môtoon̄ ọmọ me ibot.

²“ ‘Ire ene ichak ubọk me lek inu òkichaka ene mbuban me lek, kubọk nkwukwu anam oron òkaan̄ mbuban me lek, mè ìre nkwukwu anam uwu òkaan̄ mbuban me lek, mè ìre nkwukwu inu òkinyinyọnọ me ijọn̄ eyi òkaan̄ mbuban me lek, me ikariọọn̄ge, mè ikana ogwu òkaan̄ mbuban me lek, ene ya îrọn̄ ikan.

³“ ‘Ire ene ichak ubọk me lek inu ògbaan̄ me lek ebilene eyi òkaan̄ mbuban me lek, eyi môkọtbe ichaka ọmọ mbuban me lek, me ikariọọn̄ge, mè iyaka iniriọọn̄ me mgburudun̄ ibe ke mbuban îchaka ọmọ me lek, ene ya îrọn̄ ikan.

⁴“ ‘Ire si ene ikpọkpọ inyan̄a ibot ikeya, ìkakaan̄ ekiket, mè ikpọkpọ imuman otu itumu, me ikariọọn̄ge, ibe ke ọmọ môrọ inu ge, mè ìre ijo inu mè ìre ata inu, kubọk otutuuk ebilene ekirọ, mè iyaka iniriọọn̄ me mgburudun̄ ibe ke îlọ, ene ya îrọn̄ ikan, ikerere me lek ikọ ge me etete ikọ cha.

⁵“ ‘Ene geelek òrọrọn̄ ikan me lek inu chi geelek, ene ya môfuk ijo kan̄ me lek inu cha geelek îrọbe ilọ,

⁶mè isa orie arọọn̄ ge mè ìre uman ebot ge inigwa ngwugwa awọ inyi Okumugwem mije ijo inu ya îrọbe. Ogwu ngwugwa mônenisa anam ya igwa ngwugwa isa irọ esuuk me ibot ene ya, mije ijo inu ya îrọbe.

⁷“ ‘Ire ubọk ene ya ìkasoon̄ gwun̄ arọọn̄, ene ya môkọt isa ekerekwukwu iba, mè ìre bọn elesia iba, inu, inyi mêsa igwa ngwugwa awọ inyi Okumugwem mije ijo kan̄. Mêsa ge igwa ngwugwa ijo inu, mè isa ge keyilọ igwa ngwugwa ewọwọp iriọk inyi Okumugwem.

⁸Ene ya môsa unọn iba cha ijet ogwu ngwugwa. Ogwu ngwugwa mônenidasi igwa ngwugwa ijo inu. Môyaka ebek unọn ya, ire, ìkpoyaka ifieek,

⁹mè inisa eje ònan̄a me lek unọn ya inyan igwook me agba owot ntook ngwugwa ya, mè inikana eje eyi òsik me emen unọn ya igwook me ebon ntook ya. Eyi ìre ngwugwa ijo inu.

¹⁰Ogwu ngwugwa mônenisa unọn eyi òso iba ya igwa ngwugwa ewọwọp iriọk igọọk me ubọk ekirọ, mè isa me ikeya irọ esuuk me ibot ene ya, inyi Okumugwem itele inyi ene ya.

¹¹“ ‘Ire ubọk ene ya ìkasoon̄ ekerekwukwu iba mè ìre bọn elesia iba, ene ya môkọt isa iko atalek akpa ekọkọk iba inigwa ngwugwa ijo inu ya. Kpebetap aran̄ me lek akpa ekọkọk ya, kpebetatap si mgbe farankinsens me lek, mije, îre ngwugwa ijo inu ke îre.

¹²Ene ya môsa akpa ekọkọk ya ijet ogwu ngwugwa, ogwu ngwugwa mônenigwọ ijot akajit ubọk ge, kubọk okpọkọ emen akpan, mè isa isi iwọp ikana oduku òkibubaan̄ olu me inyọn̄ ntook ngwugwa igbaalek ngwugwa ukan̄ egwabe inyi Okumugwem.

¹³Sa me ikeyi, ogwu ngwugwa mônenirọ esuuk me ibot ene ya, Okumugwem mônenitele inyi ene ya. Inu geelek òsisik me lek inu esabe igwa ngwugwa ya, ìkup inyi ogwu ngwugwa, ike îkupbe me lek ngwugwa akpa geelek.’ ”

¹⁴Okumugwem onenitumu inyi Mosis ibe,

¹⁵“Ire ene irọ inu ikagbege me lek inu òkup mbuban inyi Okumugwem me ikariọọn̄ge, mè isa me ikeya irọ ijo inu, ene ya môgwa ngwugwa awọ inyi Okumugwem. Môsa ikpoko alata okuket eyi môsobe otu ewe orie arọọn̄ kpunube ìroon̄ me lek, igọọk me ubọk itọ-inu eyi Uwu Mbuban, inigwa ngwugwa awọ inyi Okumugwem.

¹⁶Ene ya môkpe useen̄ me lek inu òkup mbuban ya eyi îrọbe inu ikagbege me lek, mè ikpe si irek ge me irek go itoon̄ me inyọn̄ isa inyi ogwu ngwugwa. Ogwu ngwugwa mônenisa orie arọọn̄ ya igwa ngwugwa awọ isa irọ esuuk me ibot ene ya. Okumugwem mônenitele inyi ene ya.

¹⁷“Ire ene irọ inu ge me etete inu echi Okumugwem otọbe ibe ekarọ me ikariọọn̄ge, ene ya îrọn̄ ikan. Ijo inu kan̄ ìtoon̄ ọmọ me ibot.

¹⁸Ene ya môsa arọọn̄ eyi kpunube ìroon̄ geege me lek, eyi òsoso otu ewe kan̄, inigwa ngwugwa awọ. Ogwu ngwugwa mônenisa anam ya igwa ngwugwa isa irọ esuuk me ibot ene ya mije ijo inu eyi îrọbe me ikariọọn̄ge, inyi Okumugwem itele inyi.

¹⁹Ngwugwa ya ìre ngwugwa awọ, mije, awọ îtet ene ya me isi Okumugwem.”