Read obolo Lib 6 Bible Online

Lib 6 - obolo bible

Lib 6

¹Okumugwem onenitumu inyi Mosis ibe,

²“Ire ene irọ ijo inu, mè ije ilọ me isi Okumugwem sa me ikakan̄ ataak inyi ogwu melek kan̄ me lek inu îsabe itap ọmọ me ubọk, mè ìre inu înyibe ọmọ ibe isun̄, mè ìyaka ire ìchichiin̄ inu ene ya me unye, mè ìre ìsasa me ugana-chieen̄ ibọkọ inu me ubọk ogwu melek kan̄ me lek inu ema egbaan̄be irọ, ene ya îrọn̄ ikan.

³Ofifi kan̄, ire ene imun̄ inu òchechep, mè imọnọ, mè inikan̄ ataak ibe ke ọmọ ìkamun̄, mè inyan̄a ibot itoon̄ me inyọn̄ ataak ya, mè ìre ìyaka irọrọ si ofifi ojelek ijo inu òkup ikecha echi ebi ene ekirọ, ene ya îrọn̄ ikan.

⁴Ire ene irọ ilọ me oniin̄ ge me lek oniin̄ kechi, mè iniriọọn̄ ibe ke ọmọ îrọn̄ ikan, ene ya môyaka inu ya îchiin̄be me unye inyi ogwukaan̄, mè ìre eyi îsabe ugana-chieen̄ itet ene ibọkọ, mè ìre inu esabe itap ọmọ me ubọk, mè ìre inu ògagak ene ichep eyi îmun̄be mè imọnọ,

⁵mè ìre inu înyan̄abe ibot eyi ataak ibọkọ. Ene ya môyaka inu ya ikpe inyi ogwukaan̄, mè ikpe si irek ge me irek go itoon̄ me inyọn̄. Ene ya ìbosa otutuuk inu cha inikpe inyi ogwukaan̄ me usen ìbogwa ngwugwa awọ kan̄.

⁶Ene ya ìbosa arọọn̄ ge kpunube ìroon̄ geege me lek, eyi òsoso otu ewe kan̄, ijet ogwu ngwugwa, inyi isa igwa ngwugwa awọ inyi Okumugwem mije nrọ-nlọ kan̄.

⁷Ogwu ngwugwa mônenisa arọọn̄ ya igwa ngwugwa isasa irọ esuuk me ibot ene ya, inyi Okumugwem itele inyi ene ya me lek inu cha geelek îrọbe mè isa me ikeya irọn̄ ikan.”

⁸Okumugwem onenitumu inyi Mosis ibe,

⁹“Nyi Erọn mè ebi bọn ikan ofolek ike ebekisa igwa ngwugwa ewọwọp iriọk. Inu ngwugwa ewọwọp iriọk ìbokup me inyọn̄ abọt me inyọn̄ ntook ngwugwa bene me otu ikakwun̄ mege iwele egwe. Ukan̄ inyọn̄ ntook ngwugwa ya si ìbokilolomo mgbọ geelek.

¹⁰Ogwu ngwugwa mônenitap ofọnti inyọn̄ kan̄ eyi lilin̄, mè initap ekwut-edim lilin̄ isa ikwek akpalek kan̄, mè inisi ikpulu ntọn̄ eyi ukan̄ ngwugwa ewọwọp iriọk ya òkup me inyọn̄ ntook ya isan̄a igwook me ijọn̄ me agba lek ntook ya,

¹¹mè inisi inwene lek, mè itap ofifi ofọnti, mè iniben ntọn̄ ya isibi udun̄ ere m̀gba-ǹgwele ukan̄ ya isi ifiin̄ me ere ikakaan̄ge mbuban me lek.

¹²Ukan̄ òkup me inyọn̄ ntook ngwugwa ya ìbokilolomo mgbọ geelek, kpebetele inyi iniin̄ mgbọ geege. Me ewelegwe geelek, ogwu ngwugwa môkitap iye me lek ukan̄ ya inyi ikilomo, mè ikiwọp okpọn̄ ngwugwa esuuk me inyọn̄ kan̄.

¹³Ukan̄ ìbokpọkpọ ikilolomo mgbọ geelek me inyọn̄ ntook ngwugwa ya, kpebetele inyi iniin̄ kubọk ge.

¹⁴“Ikan kechi obokikpulu ngwugwa akpa. Bọn kè Erọn mêsa inu ngwugwa ya inigwook me isi ntook ngwugwa, me isi Okumugwem,

¹⁵mè inigwọ akpa ekọkbe ya melek aran̄ mè mgbe farankinsens òje me lek ngwugwa akpa ya ijot ubọk ge, kubọk okpọkọ emen akpan, mè iniwọp eya ikana oduku me inyọn̄ ntook ya inyi Okumugwem, inyi idun̄u utop olu òkibele Okumugwem ejit.

¹⁶Erọn mè ebi bọn eberie eyi òsisik. Ire, kpebetap olat me lek. Ema ebekup me ere òkup mbuban irie, me emen oyet egep Atanga Chinichini.

¹⁷Kpebetap olat me lek akpa ekọkọk ya isa irọ fituru. Eyiya ìre uche nchebe inyi ema inan̄a me lek ngwugwa ukan̄ egwabe inyi emi. Mije inorie ya orebe inu esabe igwa ngwugwa ijo inu mè ngwugwa awọ, îre inu òkup mbuban ichit.

¹⁸Îre bọn ebirieen̄ owot iman kè Erọn gaalek ebekirie inu òsisik me lek ngwugwa ukan̄ egwabe inyi Okumugwem. Eyi ìre ikan òbokup ire ukot kinyi geelek. Ene geelek òbochak ubọk me lek inu ngwugwa ya ìbore ogwu òkup me mbuban.”

¹⁹Okumugwem onenitumu inyi Mosis ibe,

²⁰“Ngwugwa eyi Erọn mè ebi bọn ebesa inu me isi Okumugwem me usen ebetọkọ ema aran̄ me ibot ìre ikeyi: Ene ge ge me etete kiban̄ môsa iko atalek akpa ekọkọk iba inu kubọk ngwugwa akpa eyi ekigwa mgbọ geelek. Môsa iko ge me lek igwa ngwugwa me ewelegwe, mè isa iko ge keyilọ igwa ngwugwa me ikakwun̄.

²¹Mêrọ fituru ya me emen uchieen̄, mè itap aran̄ me lek, mè igbaan̄ ifuku item ibet, mè inikpukpuku, mè isa inigwa ngwugwa òkidun̄u utop olu eyi òkibele Okumugwem ejit.

²²Ogwu ngwugwa ogwu etọkọbe aran̄ me ibot me etete bọn kè Erọn, ogwu òbonibọkọ irek kan̄, obogwa ngwugwa ya. Eyi ìre Ikan Okumugwem òbokup ire mgbọ geelek. Mêwọwọp otutuuk inu ngwugwa ya itaka iriọk me ukan̄.

²³Ngwugwa akpa geelek ebi ngwugwa egwabe me ibot kiban̄, kpeberie inu geege ònan̄a me lek. Ebewọwọp otutuuk itaka iriọk me ukan̄.”

²⁴Okumugwem onenitumu inyi Mosis ibe,

²⁵“Nyi Erọn mè ebi bọn ebirieen̄ ikan kechi ofolek ngwugwa ijo inu. Îre me isi Okumugwem, me ere ekigwu anam ngwugwa ewọwọp iriọk, ke ebegwu si anam ngwugwa ijo inu, mije, ngwugwa keyi ìre ngwugwa òkup mbuban ichit.

²⁶Ogwu ngwugwa ogwu ògwagwa ngwugwa yi oborie inu ngwugwa yi. Ìbokup me oyet egep Atanga Chinichini, me ere òkup mbuban, irie inorie òsisik me lek ngwugwa yi.

²⁷Ene geelek, mè ìyaka ire inu geelek òchachak me lek ufuk anam esabe igwa ngwugwa ya môkana inu òkup mbuban. Ofọnti geelek eje anam ya ochakbe me lek, ebekup me ere òkup mbuban igwọk ofọnti ya.

²⁸Otin̄ ibat geelek esabe item anam ngwugwa yi, ebebubum. Ire esa otin̄ ekwe item, ebekwukwuk lek otin̄ ya itana, mè inisa mun̄ ilaak.

²⁹Otutuuk ebirieen̄ ìnan̄a me owot iman ebi ngwugwa eberie inu ngwugwa keyi, mije, îre inu òkup mbuban ichit ke îre.

³⁰Ire, anam ngwugwa ijo inu geelek esabe eje kan̄ inu me Ere Mbuban me Atanga Chinichini, isasa inirọ esuuk, kpebetaka, ebewọwọp itaka iriọk.