Read obolo Jeri 1 Bible Online

Jeri 1 - obolo bible

Jeri 1

¹Echichi ìre ikọ echi Jerimaya gwun̄ kè Ilikiya, ene ge me lek ebi ngwugwa ìkup me Anatọt me ijọn̄ ebi otoko kè Benjamin, otumube.

²Okumugwem ìtumu ikọ inyi ọmọ me òso akọp mè acha ita me lek mkpulu kè Josaya gwun̄ kè Amọn ogwu ubọọn̄ Juda.

³Okumugwem îtumu si ikọ inyi ọmọ otutuuk mgbọ Jioyakim gwun̄ kè Josaya orebe ubọọn̄ me Juda, inire òta onyan̄ go me òso akọp mè acha ge me lek mkpulu kè Jedikaya gwun̄ kè Josaya ogwu ubọọn̄ Juda, mgbọ ekpulube ebi Jeruselem me usun̄ akọn̄.

⁴Mgbọ ya, Okumugwem onenitumu inyi emi ibe:

⁵“Sabum nnibobot owu me emen akpa gwun̄ nga kwun̄, nriọọn̄ owu isan̄a; sabum enimaman owu, nra isusun̄ owu me mbuban isan̄a; ǹsasa owu irọ ogwu nriran inyi ido geelek.”

⁶Nnenifọọk ibe: “Jei Ogwukaan̄-ene Okumugwem, emi ǹkariọọn̄ ìtumu ikọ, emi ìre sọntitiik gwun̄.”

⁷Ire, Okumugwem obebe emi, “Katumu ibe ke owu ìre sọntitiik gwun̄. Mije, ebi geelek mâriabe owu isi lek, lek kè ebiba ke owu obosi. Ikọ geelek mâtọbe ibe owu òtumu, eya ke owu obotumu.

⁸Katet ukpook me isi kiban̄. Emi òwa melek kwun̄, mânyan̄a owu isibi. Emi Okumugwem ntumu.”

⁹Okumugwem oneninyana ubọk kan̄ ichak emi me otu, mè ibe emi, “Kpọ, nra itap ikọ n̄a me otu kwun̄.

¹⁰Cherekeyi, ngobo owu ito me otuchieen̄ ido geelek mè ama ubọọn̄ geelek, ibe owu òjibi òto, mè ògbugbọ ògwook; ibe owu ògwak, mè òjijaka òsan̄a, mè ònama, mè òwop.”

¹¹Okumugwem onenido emi ibe: “Jerimaya, keke ke omun̄?” Mfọfọọk ibe, “Mmun̄ otu agọọk uti alimọn ge.”

¹²Okumugwem otutumu inyi emi ibe, “Owu omun̄ itat, mije, emi ǹgwọgwọk chieen̄ ikikpọ[1] ikọ n̄a ibe irọ iso.”

¹³Okumugwem okpọkpọk ido emi òso mgbọ iba ibe: “Keke ke omun̄?” Mfọfọọk ibe, “Mmun̄ otin̄ ge òkirariak, òkọkọọn̄ isi inan̄a me agan̄ inyọn̄.”

¹⁴Okumugwem obebe emi: “Ùrioon̄ mônan̄a me agan̄ inyọn̄ igbuku igwook me lek otutuuk ebi ìluk me lek ijọn̄ yi.

¹⁵Kpọ, emi mânigween̄ otutuuk ebi ama ubọọn̄ agan̄ inyọn̄ cha ibe enu. Emi Okumugwem ntumu. “Ebi ubọọn̄ kiban̄ cha mênu iniyiyik ogboon̄ ubọọn̄ kiban̄ me otu isotu otunchit geelek me Jeruselem; ema mêgban ikana mgban ama ya okokop, mè igban si ikana otutuuk ama geelek me ido Juda.

¹⁶Mâfieek oyerebet n̄a inyi ebi n̄a ofolek otutuuk inu ikpak geelek ema erọbe, mije ema ejitbe emi, mè isi ikiwọp nsensi inyi ebi kè ofifi awaji, mè ikitọbọ ebum inyi inu ubọk kiban̄ orombe.

¹⁷“Tobo ekwut nye me ebon, mè nan̄a keke! Inu geelek ntọbe inyi owu, tumu nyi ema. Kafieek owot me isi kiban̄, inyi nkarọ owot ifieek owu me isi kiban̄.

¹⁸Cherekeyi, nrọ owu òkana òre ama mgban ònyenye, mè atà okwukwut, mè mgban ekwe, inyi owu òkeke òda otutuuk lek ijọn̄ yi, mè ebi ubọọn̄ Juda, mè ebi ibot, mè ebi ngwugwa, mè otutuuk ebi lek ijọn̄ yi.

¹⁹Ema mêtim owu akọn̄ me lek, ire, kpebenye lek igak owu, mije, emi òwa melek kwun̄, mânyan̄a owu isibi. Emi Okumugwem ntumu.”