Read obolo Jeri 10 Bible Online

Jeri 10 - obolo bible

Jeri 10

¹Enyi ebi uwu kè Ijeren, ìgban̄ ikọ Okumugwem otumube inyi enyi.

²Okumugwem ìtumu ibe ikeyi: “Ikakween̄ inu ebi ofifi ido ekirọ; ikafieek owot me lek nke nke inu òkirọ me akpabin inyọn̄, mije, îre inu chi okifieek owot ebi ofifi ido.

³Orọmijọn̄ ife cha ìre inu ikike; uti echobe me oron ito, ke ogwu òkọ inu osa otut ikọ ikana mkpọmfaka.

⁴Enenisa alata okuket mè alata araran̄ ibala lek, mè isa abaracha mè omimin igon itet ikaan̄, inyi ikawuwọk.

⁵Mkpọmfaka kiban̄ cha kpekitumu ikọ, ekup kubọk ògbalatasuk me emen uko osisem; ekibebeen̄ ema isa ikije, mije, ema kpekije ije. Ikafieek owot me lek mkpọmfaka chi; kpebekọt isak ene unan, kpebekọkọt si irọ ata inu geege.”

⁶Jei Okumugwem, kpunu ogwu òbet lek kwun̄; owu omin enenen, erieen̄ kwun̄ si îmin enenen, mè ikaan̄ unye.

⁷Jei Ogwu Ubọọn̄ ebi ido geelek, ìre ekene kpotet ukpook me lek kwun̄ ni? Eyi ìre inu ògbegbe owu. Me etete otutuuk ebi ìriọọn̄ inu me ido geelek, mè ama ubọọn̄ kiban̄ geelek, kpunu ogwu òbet lek kwun̄.

⁸Ema otutuuk ene etututun, mè ibubut; îre mkpọmfaka ikike ekọkọ ojeen̄ ema inu.

⁹Alata okuket ebọn̄be ikup akpakpa, echi esabe me Tasis inu, mè alata araran̄ esabe me Ufaji inu, echi ogwu usọ ikwaan̄ mè ogwu usọ alata erombe, mè inichim ekwut oluku oluku mè ekwut irio irio itap; otutuuk cha ìre ubọk ikwaan̄ ebi usọ ikwaan̄.

¹⁰Ire, Okumugwem ore Awaji me atikọ; ọmọ ore Awaji òkup me ugwem mè Ogwu Ubọọn̄ mgbọ ikakaan̄ge itata. Ọmọ isinaan̄ ejit, linyọn̄ ìkisisisik; kpunu ido geege òkikọt ikeke ida uyok uyok unaan̄-ejit kan̄.

¹¹“Tumu nyi ema ibe ikeyi: ‘Awaji cha, echi ikarege ema erom inyọn̄ mè ijọn̄, ebejijijaka ema isan̄a kpai. Ema ebetata isan̄a me linyọn̄ mè irak isinyọn̄.’ ”

¹²Ire, îre Awaji osa unye kan̄ irom lek ijọn̄, mè isa iriọọn̄-inu kan̄ itet linyọn̄ ikeke inye, mè isa ngobo-ntet kan̄ itaba akpabin inyọn̄ inyana.

¹³Ọmọ isisook ida, mun̄ îra idimi me akpabin inyọn̄; ọmọ okirọ oduku inyọn̄ inan̄a me okputut linyọn̄ ibene. Ọmọ okiria omumen-inyọn̄ melek ibot inu, mè ikisan̄a efet me uwu isun̄-inu kan̄ isibi.

¹⁴Me chieen̄ kan̄, otutuuk ebilene ìre tuntun, kpekaan̄ ifuk-ibot; ogwu usọ alata geelek îkirie esip mije mkpọmfaka îrombe, mije, inu ebobot kan̄ ya ìre ofiaan̄, kpunu efuuk ugwem geege me emen kiban̄.

¹⁵Ema ìre inu ikike, ekup inyi ochak; mgbọ osusut kiban̄ isire, ema mêchieen̄ ita.

¹⁶Awaji ogwu òre Uche kè Jekọp ìkabet lek echichi; mije, ọmọ orom otutuuk inu geelek; Ijeren ìre otoko îsabe irọ ìrot kan̄. Okumugwem Ogwukaan̄ Inyọn̄ mè Ijọn̄ ore erieen̄ kan̄.

¹⁷Enyi ebi ìluk me Jeruselem, ama ekpabe mbin akọn̄ ikana, ìtitiin̄ nroon̄ uwu kinyi ìbem lek ìnanan̄a isibi me inyọn̄ ijọn̄ kinyi.

¹⁸Mije, Okumugwem ìtumu ibe ikeyi: “Ìkpọ, me mgbọ keyi, mânitọọn̄ ebi ìluk me lek ijọn̄ yi ifiin̄; mâsa ukwook inikeme ema, inyi eweek ema emun̄ etet.”

¹⁹Ebi ama Jeruselem etataan̄ ukpo ibe, “Môfieek inyi eji bak me lek unan kiji! Chieen̄ unan kiji kpekọt igwa ita! Ire, eji etumu inyi lek kiji ibe, ‘Eyi ìre orukan̄ kiji, eya orọ, eji mêkat ejit ibeme.’

²⁰Mîjijaka uwu ọfọ kiji isan̄a; mîsọp otutuuk olik kan̄ igwook. Bọn kiji ebirieen̄ mîyat itele eji, kpeyaka ikup; ene geege ìkasik ogwu môbenebe uwu ọfọ kiji igwuun̄, mè ìre ikpulu ekwut ukwek uwu ọfọ cha ijeen̄.”

²¹Ebi òkpukpo arọọn̄ mîtutun, ema kpeweek Okumugwem; eya orọ, inu ìkaje ìjaan̄ me lek kiban̄, otutuuk urum arọọn̄ kiban̄ îyiyala ichieen̄.

²²Ìgban̄ utọn̄! Etip òkinu! Ikpele okput òkinan̄a me lek ijọn̄ agan̄ inyọn̄ inu! Ìbonijijaka ama ebi Juda geelek igwook, inyi ikana ere ebi kè ibo oron afa ebekibọm urie.

²³Jei Okumugwem, nriọọn̄ ibe ke ugwem ene ìkakup ogwukaan̄ lek me ubọk, ene ìkpokọt ijeen̄ ukot kan̄ oniin̄ ìboje.

²⁴Jei Okumugwem, nen̄e emi sun̄, ire, sa me unen oyerebet nen̄e emi sun̄, kasa me unaan̄-ejit kwun̄, inyi okarọ emi ǹkana inu ikike.

²⁵Gbuku uyok uyok unaan̄-ejit kwun̄ gwook me lek ido cha ebi kperiọọn̄ owu, gbuku gwook me lek ife cha ebi kpekigwen erieen̄ kwun̄. Mije, ema mîjijaka Jekọp igwook, ema ejijijaka ọmọ isan̄a kpai, mè ifiat ere ọmọ okiluk isan̄a isi ge.