Read obolo Jeri 17 Bible Online

Jeri 17 - obolo bible

Jeri 17

¹“Esa otut okwukwut eyi ewuuk unye isi okupbe me otu ige ijo inu ebi Juda erọbe isun̄, etitibi ijo inu cha ikam me emen ejit kiban̄, mè irọkọ si ikam me lek iko òkup me lek ntook kiban̄ geelek.

²Ikeya si, nsabọn kiban̄ ekikekeek ntook kiban̄ cha, melek uti yọk Asera cha, egwugwuun̄be me agba lek uti geelek òsasan agọọk, mè inyọn̄ orioon̄ geelek òbebene.

³Ogoon̄ n̄a cha òkup me emen oron uko, mè inu ubọọn̄ kinyi mè otutuuk inu unye otu ewe kinyi, melek isi-ijọn̄ kinyi cha, m̀basasa inyi ibe efum esa eje, mije ijo inu enyi erọbe ikana iso otutuuk ido kinyi.

⁴Ìrot ya nnyibe enyi, mônan̄a isibi enyi me ubọk, mije ijo inu kinyi. Mâsa enyi irọ usun̄ inyi ebi ochicha kinyi, me ido enyi ekariọọn̄ge, mije, enyi mîchim ukan̄ itap me lek unaan̄-ejit n̄a; ukan̄ ya ìbosasak ire mgbọ geelek.”

⁵Okumugwem ìtumu ibe ikeyi: “Ufieek-otu okup inyi ogwu geelek òsa ebilene itoon̄ ejit, ogwu òsa unye eyi anam akpalek ibieen̄ ejit, ogwu òsasan̄a ejit me lek Okumugwem.

⁶Ene ya ìbobet lek gwun̄ uti ebon yaage òtibi me emen èwê; ata inu isinu, ìkpomun̄ lek. Ìbokup me ere òchachat me emen èwê, me lek ijọn̄ uchi uchi ere ene geege ikalukge.

⁷“Ire, ugbana môkup inyi ogwu òtoon̄ ejit me lek Okumugwem, ogwu ikpọchieen̄ kan̄ okupbe me lek Okumugwem.

⁸Ene ya môkup kubọk uti ewopbe me agba mun̄, eyi òtitibi ugwun̄-ijọn̄ kan̄ igwook me lek okolo. Uyok isinu, ìkakifieek owot; inwan̄ kan̄ ìkire njijoon̄ njijoon̄ mgbọ geelek. Me acha una ibot, ìkakisisaak lek kan̄, ìkpọkpọ ikito mfut.”

⁹Ejit ene îmin ofiaan̄ me lek igak otutuuk inu geelek, kpekikọt igwa itet. Ekene obokọt iriọọn̄ ejit ene?

¹⁰“Emi Okumugwem nkiwọlọ ejit ene, mè ikiroon̄ ekiket ene ikpọ, inyi m̀kpe ene geelek mkpukpe m̀kpọ me lek ugwem kan̄, igọọk me lek inu îrọbe.”

¹¹Ogwu òsasa me oniin̄ ikatatge ibọọn̄ ubọọn̄, ìkup kubọk ekun̄kun̄ òkwuun̄ nkwa ikarege ọmọ oto. Ugwem kan̄ isije ire ìkike iba, inu cha ìbotata itele ọmọ; me òta kan̄, môsisibi utoon̄ ibe ke ene ya ìre mbubut.

¹²Ere mbuban kiji ìre ogboon̄ ubọọn̄ òkup mgbugbo, ìbebene ifo inyọn̄ bene me ibebene.

¹³Jei Okumugwem, ikpọchieen̄ ebi Ijeren, esip môtet ebi geelek ìtetele owu. Mêge erieen̄ ebi ìjijit owu itele me emen ntọn̄, mije, ema mîjit Okumugwem, ogwu òrere ogbuuruk mun̄ ugwem.

¹⁴Jei Okumugwem, gwa emi, ke mâkaan̄ igwagwa, nyan̄a emi, ke mâkaan̄ unyan̄a, mije, owu ore ogwu nkitọn̄.

¹⁵Ebi ene ekpọkpọ ikibe emi, “Sà ikọ Okumugwem ya ye? Inirọ iso mgbọ keyi ma!”

¹⁶Ǹkalibi ìtele irere ogwu òkpukpo arọọn̄ inyi owu; owu oriọọn̄ ibe ke ǹkaweek usen ufialek ya. Inu òkisibi emi me otu ìkare nlelet me isi kwun̄.

¹⁷Katap emi ukpook me lek, owu ore ere itap ibot n̄a me usen ufialek.

¹⁸Sa esip tet ebi ìkisisaak emi, ire, kachieek ibe esip itet emi. Tap ema ukpook me lek, ire, da ukpook san̄a emi me lek. Ria usen mfufiat jet ema, mè jijaka ema mgbọ iba.

¹⁹Okumugwem ìtumu inyi emi ibe ikeyi: “Je si keke me otunchit Ebi Ene, ere ebi ubọọn̄ ebi Juda ekije iraka inin̄ mè ikiraka isibi; mè si keke si me otutuuk otunchit ama Jeruselem.

²⁰Tumu nyi ema ibe: ‘Enyi ebi ubọọn̄ Juda, mè otutuuk kinyi ebi Juda, mè otutuuk ebi ìluk me Jeruselem, ebi ìkije iraka me otunchit chi, ìgban̄ ikọ Okumugwem.

²¹“ ‘Okumugwem ìtumu ibe ikeyi: Ìgbagbala chieen̄ kinyi, ikabeme akpan geege me Usen Mbuban ìsa ìje ìtibi otunchit Jeruselem geege.

²²Ikabeme akpan ìsibi me uwu kinyi me Usen Mbuban, ikasisi si ikwaan̄ me usen ya. Ire, ìsun̄ Usen Mbuban me mbuban, kubọk nnyibe ebi nte nte kinyi ida ibe erọ.

²³Ire, ema kpenọ, kperaraan̄ si utọn̄ igban̄. Ema enyenye ibot, mè ijit inọnọ, mè ijit si ibọbọkọ ikan̄-inu itap.

²⁴Eya orọ, emi Okumugwem nkitumu inyi enyi ibe, ire enyi igban̄ utọn̄ inyi emi me atikọ, mè enyi kpekibeme akpan geege isa ije itibi otunchit ama yi me Usen Mbuban, mè ire enyi ikisun̄ Usen Mbuban me mbuban, kpekirọ ikwaan̄ geege me usen ya,

²⁵mgbọ ya, ebi ubọọn̄ ìkikup me inyọn̄ ogboon̄ ubọọn̄ kè Debit melek ebi ibot kiban̄ mêkitibi iraka me otunchit chi. Ema melek ebi ibot kiban̄ mêkikọp me uji akọn̄, mè ikilibi me inyọn̄ inyinya inu. Ebi Juda mè ebi ìluk me Jeruselem mêkekigọọk ema me udun̄ inu. Ebi ene mêkekiluk me ama yi ire mgbọ geelek.

²⁶Ebi ene mêkekinan̄a me ama ebi Juda geelek inu, mè asabọn ama òkakana Jeruselem okokop, mè lek ijọn̄ ebi otoko kè Benjamin, mè inyọn̄ orioon̄ isi ogoon̄ agan̄ ichep-ura, mè agan̄ inyọn̄ ogoon̄, mè emen èwê agan̄ osiki, mè ikisa ngwugwa ewọwọp iriọk mè ofifi chieen̄ ngwugwa, mè ngwugwa akpa, mè nsensi, mè ngwugwa onirọ, inu me Uwu Mbuban Okumugwem.

²⁷Ire, ire enyi kpegban̄ utọn̄ inyi emi, mè kpekisun̄ Usen Mbuban me mbuban, mè ire enyi ikibeme akpan me Usen Mbuban isa ikije itibi me otunchit Jeruselem cha, emi mâsọk ukan̄ me otunchit ama Jeruselem cha. Ukan̄ ya kpebekọt iniin̄. Môtaka uwu mgban akọn̄ cha òkup me Jersuselem iriọk.’ ”