Read obolo Jeri 18 Bible Online

Jeri 18 - obolo bible

Jeri 18

¹Okumugwem onenitumu inyi Jerimaya ibe:

²“Nan̄a keke je si uwu ogwu òbot ugọn̄, ere keya ke mâtumu ikọ mbatumu inyi owu.”

³Ikeya ke nje isi uwu ogwu òbot ugọn̄, mè imun̄ ọmọ me lek ekpirikpo okirọ ikwaan̄ kan̄.

⁴Inu îsabe arika òkup ọmọ me ubọk ikibot ofafiat, iyayaka isa arika ya ibot ofifi inu îmun̄be ibe ke înwọn me lek kan̄ ibobot.

⁵Mgbọ ya, Okumugwem onenitumu ikọ inyi emi ibe:

⁶“Enyi ebi uwu kè Ijeren, ìre emi m̀kpakọt irọ inu me lek kinyi kubọk ogwu òbot ugọn̄ okirọ me lek arika ni? Enyi ebi uwu kè Ijeren, ike arika okupbe me ubọk ogwu òbot ugọn̄, ikeya si ke enyi ekup me ubọk n̄a. Emi Okumugwem ntumu.

⁷Ire ntumu inyi ido ge mè ìre ama ubọọn̄ ge ibe mârọkọ ido ya isan̄a, mè igwak igwook, mè ijijaka,

⁸mè ire ido ntumube ikọ ya inyi igwu ikom me emen ijo inu kan̄, emi mâtele ùrioon̄ ya ntọtbe isasa initoon̄ ema, m̀kpayaka isa itoon̄ ema.

⁹Ire nyaka initumu ibe ke mânama ofifi ido mè ìre ama ubọọn̄ ikeke, mè iwop ọmọ ikam,

¹⁰mè ire ido ya inirọ ijo inu me isi n̄a, ìkayaka ìgban̄ utọn̄ me ida n̄a, mâtele ata inu ya mbe ke mârọ inyi, m̀kpayaka irọ.

¹¹“Eya orọ, mgbọ keyi, tumu nyi ebi ido Juda mè ebi ìluk me Jeruselem ibe: ‘Okumugwem ìtumu ibe ikeyi: Ìkpọ! Emi gwa ǹkineen̄ ùrioon̄ isun̄ iban enyi, mè ikitọt otitọt ikeme enyi. Eya orọ, enyi, me ene me ene, ogwu ikup igwu ikom me ijo oniin̄ kan̄. Ìnen̄e oniin̄ kinyi mè irọrọ kinyi ìsun̄.’

¹²Ire, ema mêfọfọọk ibe, ‘Ìkpokaan̄ ibot. Inu eji etọtbe, echicha ke eji eberọ. Eji otutuuk, ogwu ikup ìbokirọ unye-ibot eyi ejit kan̄ okitọ inyi ọmọ.’ ”

¹³Eya orọ, Okumugwem ìtumu ibe ikeyi: “Ìsi ìdo-nu ebi ofifi ido ibe: Ìre ekene orak inọ ojelek inu kechi? Ijeren, òbet lek obaak enenwaan̄ ikariọọn̄ge enerieen̄, îrọ inu òfefieek lek enenen.

¹⁴Ibot awo cha òkirep igwook me inyọn̄ ogoon̄ Lebanọn, ìre îkaan̄ mgbọ îkinan me agba isi ewuuk òbebene cha? Sà ofiik mun̄ òkigbuk inan̄a me lek ogoon̄ ya isi igwook me ujọn̄ọ ere, ìre îkaan̄ mgbọ ìkakigbuk?[14]

¹⁵Ire, ebi n̄a mîwuuk emi; ema ekiwọp nsensi inyi mkpọmfaka ikike, echi ònirọ ema egbugbe enan̄a etele oniin̄ echi ukot ikaan̄ cha, mè eyaka ekesi eje me oniin̄ echi agba agba, echi ikarege uga oniin̄ enamabe.

¹⁶Ijọn̄ kiban̄ ìboyayat ita, mè ikana inu ochak ire mgbọ geelek. Mbiribọ kan̄ môkigwook ebi geelek mêjebe iraka me lek, ema mêkekisisik ibot.

¹⁷Emi mâyiyala ema me isi ebi ochicha kiban̄, kubọk efet agan̄ mbum-ura okiwut inu iyat. Mâda isi n̄a isan̄a, mè igba udun̄ ifit ema me usen ùrioon̄ ya.”

¹⁸Ema ebebe: “Ìna mè eji etaka otọt ekeme Jerimaya, mije, ire ọmọ ìkakup, ijejeen̄ ikan ebi ngwugwa ekijeen̄ ya, ìkpochep, nteme ebi ìriọọn̄ inu ìkpochep, ikọ ebi nriran si ìkpochep. Ìna mè eji esa alọm kiji efiat ọmọ esan̄a, mè ekayaka ìgbaan̄ utọn̄ me lek ikọ kan̄ geege.”

¹⁹Jei Okumugwem, gban̄ emi utọn̄ me lek, mè nọ inu ebi oriara n̄a ekitumu!

²⁰Ìre mêsa ijo inu ikpe me useen̄ ata inu ni? Ire, ema mîrọkọ udọn̄ iban emi. Kawuuk ibe ke emi ǹkeke me isi kwun̄, itumu ata ikọ ibot kiban̄, inyi ǹda uyok uyok unaan̄-ejit kwun̄ ǹsan̄a ema me lek.

²¹Eya orọ, sa asa nsabọn kiban̄ nyi akan̄ ikpan̄; da ema tap me otu oge akọn̄, inyi efiin̄ eje kiban̄. Rọ ebi nwa kiban̄ enan bọn, mè ekana nwakpa; rọ ibe ekpan̄ ebirieen̄ kiban̄ esan̄a, mè nsabọn irieen̄ kiban̄ ekwaan̄ me otu oge akọn̄.

²²Rọ ibe enọ ida ukpo okitaan̄ me uwu kiban̄ mgbọ owu osisa urum akọn̄ inu inifum ema me uwuuk-lek, mije, ema mîrọkọ udọn̄ ebesa itet emi, mè ilileek ufe iban ukot n̄a.

²³Ire, owu Okumugwem oriọọn̄ otutuuk otitọt ema ekitọt ikpakpan̄ emi. Katele nrọ-nlọ kiban̄ ìnyi ema, katutuku ijo inu kiban̄ ìsan̄a me isi kwun̄. Rọ ibe etim akọn̄ ekpan̄ ema me isi kwun̄, mè sulu ema osusut me mgbọ unaan̄-ejit kwun̄.