Read obolo Jeri 20 Bible Online

Jeri 20 - obolo bible

Jeri 20

¹Mgbọ Pasuru ogwu ngwugwa gwun̄ kè Imeri, òrere ogwu ibot ikwaan̄ me Uwu Mbuban Okumugwem, onọbe Jerimaya okiben nriran ikitumu inu chi,

²inyinyi ida, esusulu Jerimaya ogwu nriran me njijan̄, mè itet isa isi igon ikam me emen mgba-mfiik me otunchit Benjamin agan̄ inyọn̄ me lek Uwu Mbuban Okumugwem.

³Ofit iwele kan̄, Pasuru osasan̄a Jerimaya isibi me emen mgba-mfiik. Ikeya ke Jerimaya onibe ọmọ, “Okumugwem ìkayaka ìgwen owu Pasuru, ìyaka inigwen owu Magori-Misabibu.[15]

⁴Mije, Okumugwem ìtumu ibe ikeyi: ‘Kpọ, mârọ ukpook itet owu me lek kwun̄, mè itet otutuuk ebi une kwun̄. Owu môsa chieen̄ kwun̄ imun̄ ema ekikwaan̄ me otu oge akọn̄ ebi ochicha kiban̄. Mâyaka otutuuk ebi Juda itap me ubọk ogwu ubọọn̄ Babilọn, ogwu ubọọn̄ ya môkpukpulu ema me usun̄ akọn̄ isa ifo Babilọn, mè isa oge akọn̄ ikpaan̄ ema isan̄a.

⁵Mâyaka otutuuk inu ubọọn̄ òkup me ama yi, mè otutuuk inu geelek ebi ama yi ekaan̄be, mè otutuuk inu unye otu ewe kan̄, mè otutuuk inu ubọọn̄ echi ebi ubọọn̄ Juda esun̄be, itap me ubọk ebi ochicha kiban̄. Ebi ochicha cha mêfufum inu kiban̄ cha, mè ikpulu isa ifon Babilọn.

⁶Owu Pasuru mè otutuuk ebi ìluk me uwu kwun̄, mêkpulu enyi me usun̄ akọn̄ isa ifo Babilọn. Ere keya ke owu obokup ikwu, ere keya si ke ebefuun̄ owu, mè ifuun̄ si otutuuk ebi une kwun̄ cha ebi owu obenbe nriran ataak inyi.’ ”

⁷Jei Okumugwem, owu ofiaan̄ emi, nkakana ogwu efiaan̄be; owu onye lek igak emi, mè itim ikpan̄ emi. Ebi ene ekichachak emi me imọm usen geelek, otutuuk ene ekisa emi irọ inu ochak.

⁸Mgbọ geelek ntumube ikọ, ǹkitataan̄ ukpo, ǹkilook etip afa mè mfufiat. Eya orọ, ikọ Okumugwem okekisa unyechieen̄ mè ochak ijet emi usen geelek.

⁹Ire mbe, “M̀kpachak ọmọ otu me lek, m̀kpatutumu ikọ me erieen̄ kan̄ ofifi,” ikọ kan̄ îra ikibumu me emen ejit n̄a kubọk ukan̄; ìkibet lek egogon ukan̄ ya ikam me emen ukwuuk n̄a. Efuuk îta emi me owot itetet ikọ kan̄ ikaan̄; ǹkakọkọt ìtet si ìkaan̄.

¹⁰Nnọ nweenween̄ ikọ owuwa ene ekitumu ibe, “Uga ukpook òwa me agan̄ geelek! Esa ọmọ esi ekpa! Eji enesa ọmọ esi ekpa!” Otutuuk ebi une n̄a ekikpọ ibe emi ǹnan̄a ǹrọn̄, mè ikibe, “Usini mgbọ mêkọt ifiaan̄ ọmọ; mgbọ ya, eji mêgagak ọmọ, mè irọ ọmọ useen̄ inu îrọbe eji.”

¹¹Ire, Okumugwem òwa melek n̄a kubọk ikpele ogwu unye òkaan̄ mbiribọ me lek; eya orọ, ebi ìkisisaak emi mêrururọn̄ọ, kpebetim ikpan̄ emi. Ema kpebekọt emi ikaan̄, eya orọ, esip môtet ema enenen; esip kiban̄ ìbokup ire mgbọ ikakaan̄ge itata, mege ire mgbọ geelek, ebi ene kpebewuuk esip kiban̄.

¹²Jei Okumugwem Ogwukaan̄ Inyọn̄ mè Ijọn̄, owu okiroon̄ ebi ata irọrọ ikpọ, mè ikimun̄ emen ejit ene, mè emen ekiket ene. Tele mè m̀mun̄ useen̄ owu môkpebe ema, mije, îre owu ke nyaka ikọ n̄a itap me ubọk.

¹³Ìkọt okwa ìnyi Okumugwem! Ìnyi Okumugwem itọn̄! Înyan̄a ebek ugwem ebi una isibi me ubọk ebi ikpak.

¹⁴Kè ufieek-otu ikup inyi usen emanbe emi! Kè usen nga n̄a omanbe emi ikakaan̄ ugbana geege!

¹⁵Kè ufieek-otu ikup inyi ene ya òsasa etip isi ilook nte n̄a ibe, “Mîman gwun̄ enerieen̄ inyi owu!” mè isa me ikeya irọ ibe ejit ibele nte n̄a.

¹⁶Kè ene ya ikup kubọk ama cha, echi Okumugwem ogbugbọbe igwook, ìkato nsan. Kè ọmọ inọ okput ufialek me ewelegwe, mè inọ ukpo akọn̄ me ejit ikarek.

¹⁷Mije, ọmọ ìkakpan̄ emi me emen owot, inyi nga n̄a ikana ire udọn̄-ufuun̄ n̄a, mè owot kan̄ ibaak ijot ire mgbọ geelek.

¹⁸Keke orọ mè ǹnan̄a me owot nga n̄a ǹsibi mọnọ, mè ǹnennin̄ me emen ufialek mè ufieejit, inyi mânikwu mkpa esip mgbọ usen ugwem n̄a môtabe?