Read obolo Jeri 21 Bible Online

Jeri 21 - obolo bible

Jeri 21

¹Okumugwem onenitumu ikọ inyi Jerimaya, mgbọ ogwu ubọọn̄ Jedikaya oriabe Pasuru gwun̄ kè Malikija mè ogwu ngwugwa Jefanaya gwun̄ kè Maseya isi lek kan̄, ibe:

²“Nebukadineja[16] ogwu ubọọn̄ Babilọn òkijibi akọn̄ inu eji lek. Soso, do-nu ida Okumugwem nyi eji. Usini mgbọ, Okumugwem môrọ uyeke inu inyi eji kubọk îrọbe mgbọ òraraka cha, inyi ogwu ubọọn̄ yi igwu ikom ifo inan̄a eji me lek.”

³Ire, Jerimaya òfọfọọk ema ibe, “Ìtumu ìnyi Jedikaya ibe,

⁴‘Okumugwem, Awaji ebi Ijeren, ìtumu ibe ikeyi: Ìkikpọ, nroon̄ akọn̄ cha òkup enyi me ubọk, echi enyi ebesa itim akọn̄ me lek ogwu ubọọn̄ Babilọn melek ebi akọn̄ Babilọn cha ìkpakpa mbin akọn̄ ikana enyi me agan̄ udun̄ mgban, mânigwu nroon̄ akọn̄ cha ikana iyaka ida enyi. Ebi akọn̄ Babilọn cha ìkup me udun̄ ama, mâsa ema inititiin̄ me emen ama keyi.

⁵Emi me lek n̄a mbatim akọn̄ me lek kinyi. M̀basa me unaan̄-ejit, mè uyok uyok unaan̄-ejit, mè ukan̄ ukan̄ unaan̄-ejit òmimin, inyana ubọk n̄a, mè isa me ikpele unye ubọk, itim enyi akọn̄ ya me lek.

⁶Mâsulu otutuuk ebi ìluk me emen ama yi ikpan̄, ebilene mè ebi kè anam. Ikpele ijo orukan̄ ke mbasa ikpan̄ ema isan̄a.

⁷Eya isiraka, mâneniyaka Jedikaya ogwu ubọọn̄ Juda melek ebi ibot ikwaan̄ kan̄, mè ebi ama yi ebi ìnwọnwọnọ me ubọk ijo orukan̄ ya, mè inwọnọ me otu oge akọn̄ mè akan̄, itap me ubọk kè Nebukadineja ogwu ubọọn̄ Babilọn, mè ubọk ebi ochicha kiban̄, mè ubọk ebi ìkiweek ebek ugwem kiban̄. Nebukadineja mônenisa oge akọn̄ ikpan̄ ema isan̄a, ìkpokaan̄ ata ejit me lek kiban̄, ìkpoto ema njijin, ìkporọ ema nsan. Emi Okumugwem ntumu.’

⁸“Ofifi kan̄, tumu nyi ebi ife chi ibe, ‘Okumugwem ìtumu ibe ikeyi: Ìkpọ, nsun̄ oniin̄ ugwem mè oniin̄ mkpa me isi kinyi.

⁹Ogwu geelek òbabia me emen ama yi môkwu me otu oge akọn̄, mè ubọk akan̄, mè ubọk orukan̄. Ire, ogwu geelek ònanan̄a isibi isi iyaka lek kan̄ inyi ebi Babilọn ebi ìkpakpa mbin akọn̄ ikana enyi, ogwugwa môgat ugwem, ugwem kan̄ mônenire oruru eyi kan̄.

¹⁰Mije, ǹtutumu ifieek ibe ke m̀barọ ama yi ijo inu, ìkare ata inu. Mêyaka ama yi itap me ubọk ogwu ubọọn̄ Babilọn, inyi isa ukan̄ iwọp itaka iriọk. Emi Okumugwem ntumu.’

¹¹“Ògak ge, tumu nyi ebi uwu ogwu ubọọn̄ Juda ibe, ‘Ìnọ ikọ Okumugwem;

¹²Enyi ebi uwu kè Debit, Okumugwem ìtumu ibe ikeyi: “ ‘Ìkisibi unen oyerebet ewelegwe geelek; ìnyan̄a ogwu echiin̄be inu kan̄ me ubọk ebi ìkitutuku ọmọ, inyi unaan̄-ejit n̄a ikaseme kubọk ukan̄ òkilolomo, eyi kpunu ogwu òbokọt iniin̄, mije ijo inu enyi erọbe.

¹³Jeruselem, emi melek kwun̄ kpetat, owu ogwu òluk me emen iteke, me ibot ewuuk inyọn̄ òla ijọn̄, owu ogwu òkisọ otu ibe, “Ìre ekene obokọt ikeke ida emi? Ìre ekene obokọt inin̄ inu me ere eji ekilet lek?” Emi Okumugwem ntumu.

¹⁴Mâsulu owu osusut ògbegbe ijo inu owu orọbe. Emi Okumugwem ntumu. Mâchim ukan̄ itap me lek oron kwun̄, inyi itaka otutuuk inu geelek òkakana owu me ijọn̄ iriọk. Emi Okumugwem ntumu.’ ”