Read obolo Jeri 22 Bible Online

Jeri 22 - obolo bible

Jeri 22

¹Okumugwem ìtumu ibe ikeyi: “Je si uwu ebi ubọọn̄ Juda, mè tumu ikọ keyi me ere ya ibe:

²‘Owu ogwu ubọọn̄ Juda, ogwu òkup me inyọn̄ ogboon̄ ubọọn̄ kè Debit, owu mè ebi ikwaan̄ kwun̄ melek ebi kwun̄, otutuuk kinyi ebi ìkije iraka me otunchit kechi, ìgban̄ ikọ Okumugwem.

³Okumugwem ìtumu ibe ikeyi: Ìkisibi unen oyerebet, mè ikirọ ata irọrọ, ìnyan̄a ogwu echiin̄be inu kan̄ ìsibi me ubọk ebi ìkitutuku ọmọ. Ikarọ ijo inu mè inu ikpak me lek ogwu ichen, mè gwun̄ kpà-nte, mè nwakpa, ikafiin̄ eje ogwu ikalọge inu geege me ere yi.

⁴Mije, ire enyi igban̄ utọn̄ me lek inu ntọbe inyi enyi, mè ikirọ inu cha, ebi ubọọn̄ ìbekweek irek me inyọn̄ ogboon̄ ubọọn̄ kè Debit mêkilibi me uji akọn̄, mè ikikọp me inyọn̄ inyinya itibi iraka me otunchit echi uwu ogwu ubọọn̄ yi inin̄ inu, ema mè ebi ikwaan̄ kiban̄ mè ebi ene ebi ìbekigọọk ema me udun̄.

⁵Ire, ire enyi kpegban̄ utọn̄ me lek inu chi ntọbe, nsa lek n̄a inyan̄a ibot ibe ke uwu keyi môkana ǹrioon̄. Emi Okumugwem ntumu.’ ”

⁶Mije, Okumugwem ìtumu ikọ ibak uwu ogwu ubọọn̄ Juda ibe ikeyi: “Ijọn̄ Giliadi ke owu ore isa inyi emi, owu òkup kubọk ibot ogoon̄ Lebanọn. Ire, m̀kpalọlọ irọrọ inyi owu òkana èwê, kubọk ama òyayat ita, eyi kpunube ogwu òluluk me emen.

⁷Mâria ebi ìbejijaka owu inu me lek kwun̄, kpa ogwu mè nroon̄ akọn̄ kan̄. Ema mêsọp ujuja ogbugboon̄ uti olik kwun̄ cha, mè itọọn̄ igwook me emen ukan̄.

⁸“Ebi ene ìnan̄a me owuwa ido inije iraka me ama yi mêkekidido lek kiban̄ ge mè ge ibe, ‘Keke orọ mè Okumugwem irọ ikpele ama keyi inu òkup ikeyi?’

⁹Mêkekifọọk si ibe, ‘Îre mije ema ejitbe inyan̄a-ibot Okumugwem Awaji kiban̄ itele, mè isi ikitọbọ ebum inyi ofifi awaji, mè ikisi ikwaan̄ inyi awaji kecha.’ ”

¹⁰Ikato ito ìnyi ogwu ubọọn̄ òkwu mkpa, ikafefieek ejit ìnyi; kpan̄asi ikeya, ìto ujat ito ìnyi ogwu etetbe me usun̄ akọn̄, mije, ìkpoyaka ika, ìkpoyaka imumun̄ si ido emanbe ọmọ ofifi.

¹¹Mije, ofolek kè Salum ogwu ubọọn̄ Juda, gwun̄ kè Josaya, ogwu òkeke ubọọn̄ me irek kè Josaya ogwu ute, ire, înan̄a me ere keyi, Okumugwem ìtumu ibe ikeyi: “Ìkpoyaka ika.

¹²Ere etetbe ọmọ me usun̄ akọn̄ isi ito, ere keya ke ìbokup ikwu; ìkpoyaka ikpọk imun̄ lek ijọn̄ keyi ofifi.”

¹³“Môfieek inyi ogwu òsa ijo irọrọ inama uwu ubọọn̄ kan̄, mè isa me nlilọ oyerebet inama agwut uwu inyọn̄ kan̄, ogwu òsa ene isi ikwaan̄ me ikike, ìkakpe ene ya mkpukpe ubọk ikwaan̄ îsibe.

¹⁴Ọmọ ìbe: ‘Mânama ikpele uwu ubọọn̄ inyi lek n̄a, mè itap owuwa agwut uwele uwele me inyọn̄.’ Ikeya ke îtap nruruk òmimiin̄ me lek, mè isa uti olik igon lek ichit, mè isa agba araran̄ igwook inu me lek.

¹⁵“Ìre ikakaan̄ uwu uti olik ijot ere, orọ ibe owu òre ogwu ubọọn̄? Ìre nte kwun̄ ìkarie inorie mè ìnwọ miin̄ ni? Nte kwun̄ îrọ inu òtatat mè inu ònenen, eya orọ, inu ojeje ijaan̄ ọmọ me lek.

¹⁶Nte kwun̄ îkibọkọ ikọ ebi ugbọọn̄ mè ebi una itoon̄ me lek kan̄, otutuuk inu ojeje ijaan̄ ọmọ me lek. Ìre ìkare irọriọọn̄ emi ire eya ni? Emi Okumugwem ntumu.

¹⁷Ire, chieen̄ kwun̄ mè ejit kwun̄ ìkup me lek oruru ikpoko ngan okiweek inyi lek kwun̄, mè ifafiat eje ogwu ikalọge inu geege, mè itututuku ene, mè ibọbọkọ ene inu me unye.”

¹⁸Eya orọ, ofolek kè Jioyakim gwun̄ kè Josaya, ogwu ubọọn̄ Juda, Okumugwem ìtumu ibe ikeyi: “Kpebeto ito mkpa kan̄ ikibe, ‘Jei, ngwan̄ n̄a enerieen̄! Jei, ngwan̄ n̄a enenwaan̄!’ Kpebeto ito mkpa kan̄ ikibe, ‘Jei, nte uwu n̄a! Jei, sà òrirọ ubọọn̄ kan̄ ya ye!’

¹⁹Mêfuun̄ ọmọ ike ekifuun̄ inyinya akpan, ebedudut ọmọ isibi isi itọp ifiin̄ me udun̄ otunchit ama Jeruselem.”

²⁰Owu ama Jeruselem, si nene inyọn̄ ogoon̄ Lebanọn taan̄ ukpo, taan̄ ukpo, inyi enọ ida kwun̄ me Basan, kup me Abarim taan̄ si ukpo, mije, mîjijaka ebi òma kwun̄ cha isan̄a.

²¹Ntumu ikọ inyi owu mgbọ okupbe me utelelek, ire, owu obebe, “M̀kpagban̄!” Eyiyi ìre eru kwun̄ akarake orebe nsabọn ibaan̄; owu òkakigban̄ ikọ otu n̄a.

²²Otutuuk ebi ìkikpukpo owu kubọk arọọn̄ cha, efet môben ema otutuuk iwut ije, ebi òma kwun̄ mênin̄ usun̄ akọn̄; mgbọ ya, esip mè ochak môre owu lek, bak me lek otutuuk inu ikpak kwun̄.

²³Owu ogwu òluk me uwu uti olik Lebanọn, ogwu òkiluk me uwu cha esabe owuwa uti olik inama, owu môto mfi mgbọ ufialek isikeme owu, ufialek ìbokeme owu kubọk ufiak uman okifiak enenwaan̄.

²⁴“Kè lek ugwem n̄a, ikerere ibe ke owu, Konaya,[17] gwun̄ kè Jioyakim ogwu ubọọn̄ Juda, ìre mkpọtubọk iman̄ òriọọn̄ me ubọk n̄a agan̄ ulom, kè mwọọk owu ǹsan̄a. Emi Okumugwem ntumu.

²⁵Kè ǹyaka owu ntap me ubọk ebi ìkiweek ebek ugwem kwun̄, mè ubọk ebi ukpook kiban̄ okitet owu, mè ubọk kè Nebukadineja ogwu ubọọn̄ Babilọn, mè ubọk ebi akọn̄ Babilọn.[18]

²⁶Mâgbaan̄ owu melek uga òman owu itọp isi ito me ofifi ido, eyi ikarege ido ere emanbe enyi. Enyi mêkup me ido ya ikwaan̄ ita.

²⁷Enyi kpebeyaka ika inu ido ya, òkilọk enyi ikaka inu.”

²⁸Ìre ene yi, Konaya, ìre otin̄ ibat òbubum eyi ejitbe itele ni? Sà ìre ọmọ ìre nroon̄ uwu eyi ene geege ikaweekge mọnọ? Keke orọ etọpbe ọmọ mè owot iman kan̄ ifiin̄, isi igwook me lek ijọn̄ ema ekariọọn̄ge?

²⁹Owu ijọn̄, ijọn̄, ijọn̄, gban̄ ikọ Okumugwem!

³⁰Okumugwem ìtumu ibe ikeyi: “Ìge ìtap me ikpa ibe ke ene yi ìre ogwu ònan gwun̄, ogwu inu ìkpojaan̄ me lek otutuuk ugwem kan̄, mije, inu ìkpoje ijaan̄ me lek ene geege me etete bọn kan̄; kpunu ene geege me lek kiban̄ môkupbe me ogboon̄ ubọọn̄ kè Debit, mè ikpọk ikikpulu Juda ofifi.