Read obolo Jeri 23 Bible Online

Jeri 23 - obolo bible

Jeri 23

¹“Môfieek inyi ebi òkpukpo arọọn̄ ebi ìkijijaka mè ikiyiyala arọọn̄ n̄a nkikpukpo!” Emi Okumugwem ntumu.

²Eya orọ, ikọ emi Okumugwem, Awaji ebi Ijeren, ntumube ikeme ebi òkpukpo arọọn̄ ìkikpukpo ebi n̄a ìre ikeyi: “Enyi mîyiyala arọọn̄ n̄a, mè irieen̄ ema ichieen̄, enyi kpekpọ chieen̄ me lek kiban̄. Ìkikpọ, mâninyi enyi osusut me useen̄ ijo inu enyi erọbe. Emi Okumugwem ntumu.

³Emi me lek n̄a mâsi otutuuk ido geelek nlilababe urum arọọn̄ n̄a igwook, isi ititiin̄ echi òsisik, mè isa ema ika inu ijọn̄ urie kiban̄. Ema mênenimumana, mè iwa me otu ifuk.

⁴Mâto ebi òkpukpo arọọn̄ ebi mêkpọbe ema chieen̄ me lek, ema kpebeyaka ikifieek owot, kpebeyaka ikitet ukpook, kpunu geege me etete kiban̄ òboyaka ichep. Emi Okumugwem ntumu.

⁵“Ìkpọ, usen òkinu, mgbọ mâjibibe Agọọk ata irọrọ ibene inyi Debit, ogwu òbonikeke ubọọn̄ me iriọọn̄-inu, mè irọ inu ònenen mè inu òtatat me linyọn̄. Emi Okumugwem ntumu.

⁶Me ukot kan̄, mênyan̄a Juda, Ijeren môluluk me utelelek. Erieen̄ ebekigwen ọmọ ìre: Okumugwem Ogwu Ata Irọrọ kiji.

⁷“Eya orọ, usen òkinu, mgbọ ebi ene kpebeyaka ikibe, ‘Kè lek ugwem Okumugwem, ogwu òsa ebi Ijeren isibi me Ijipiti.’ Emi Okumugwem ntumu.

⁸Inu ebeyaka inikitumu ìre, ‘Kè lek ugwem Okumugwem, ogwu òsa owot iman kè Ijeren isibi ika inan̄a me ijọn̄ agan̄ inyọn̄ mè otutuuk ido ere îrieen̄be ema isi igwook.’ Mgbọ ya, ema mêneniluk me lek ijọn̄ kiban̄.”

⁹Òfo me lek ebi nriran: Ejit îfieek emi me emen; otutuuk otu ukwuuk n̄a ìkiraran. Ǹkup kubọk ogwu miin̄ osabe, kubọk ene miin̄ ogakbe lek, mije Okumugwem, mè mije ikọ kan̄ òkup mbuban.

¹⁰Ebi ugan-nwa mîwa ijot lek ijọn̄; lek ijọn̄ îchat isan̄a mije ufieek-otu, mbubet emen èwê îchiaak ita kpai. Ebi nriran ekiluk ijo ugwem, mè ikisa unye kiban̄ ikirọ nlilọ inu.

¹¹Okumugwem ìtumu ibe, “Ebi nriran mè ebi ngwugwa mîfifila isan̄a; ikerere me emen uwu n̄a, mmun̄ inu ikpak kiban̄. Emi Okumugwem ntumu.

¹²Eya orọ, oniin̄ kiban̄ ìbokup kubọk ene okwaak irọn̄ me emen udun; mêlilaba ema, ema mênanan̄a irọn̄ me oniin̄ ya. Mâsa ùrioon̄ initoon̄ ema me acha osusut kiban̄. Emi Okumugwem ntumu.

¹³Mmun̄ filafila inu me etete ebi nriran Sameria. Ema ekisa Baali iben nriran, mè ikisa ebi n̄a ebi Ijeren ije ilọ oniin̄.

¹⁴Mmun̄ filafila inu me etete ebi nriran Jeruselem: ema ekirọ ugan-nwa, mè ikikan̄ ataak ikana; ema ekitap ebi ìkirọ ijo inu unye me emen, eya orọrọ inyi ene geege ikatele inu ikpak kan̄. Ema otutuuk ene ekup me lek n̄a kubọk ebi Sodọm; ebi Jeruselem ekup me lek n̄a kubọk ebi Gomora.”

¹⁵Eya orọ, ofolek ebi nriran chi, Okumugwem Ogwukaan̄ Inyọn̄ mè Ijọn̄ ìtumu ibe ikeyi: “Ìkpọ, mâninyi ema ujat inorie ibe erie, mè inyi ema ujat mudim ibe enwọ; mije, ebi nriran Jeruselem ke filafila onan̄a me lek iso lek ijọn̄ yi.”

¹⁶Okumugwem Ogwukaan̄ Inyọn̄ mè Ijọn̄ ìtumu ibe ikeyi: “Ikagban̄ nriran ebi nriran cha ekiben inyi enyi; ema ekirọ ibe enyi ekaan̄ ikpọchieen̄ eyi ofiaan̄. Ilaak ọkpọchieen̄ ema ekikpa inyi enyi ìnan̄a me ekiket kiban̄, ìkanan̄a me otu Okumugwem.

¹⁷Ema ekpọkpọ ikitumu inyi ebi ìkikpọ emi isiki ibe, ‘Okumugwem ìbe: Enyi mêkaan̄ esuuk,’ mè ikitumu inyi otutuuk ebi ìkirọ unye-ibot eyi ejit kiban̄ okitọ inyi ema ibe, ‘Unan geege ìkpore enyi lek.’

¹⁸Ìre ekene me lek kiban̄ ogọọk Okumugwem ikup me oru, mè imọọn̄ ikọ kan̄, mè inọ? Sà ìre ekene ogban̄ ikọ kan̄, mè inọ?

¹⁹Ìkpọ, uyok uyok unaan̄-ejit Okumugwem ìbojibi kubọk egwijo; ìbojibi kubọk ogbolodom okijibi inu, môgba iyak itoon̄ me inyọn̄ ibot ebi ikpak.

²⁰Unaan̄-ejit Okumugwem ìkpogwu ikom, îtata ìrọrọ otutuuk inu òkup me ejit kan̄ iso. Mgbọ òta usen cha isire, enyi mênenigobo itet ijaan̄ lek.

²¹Emi ǹkararia ebi nriran cha ikwaan̄ geege, ire, ema elilim ikisi ilook; ǹkatutumu ikọ geege ìnyi ema, ire, ema ekekiben nriran.

²²Mebe ema mîkup me oru n̄a, kè ema etumu ikọ n̄a enyi ebi n̄a, mè ègwu ebi n̄a ekom me ijo oniin̄ kiban̄, mè èsan̄a ema esibi me ijo irọrọ kiban̄.”

²³Okumugwem ìbe, “Ìre emi ìre Awaji òkup me mgbet ere, ìre ǹkare Awaji òkup me ujọn̄ọ ere ni?

²⁴Ìre ene môkọt ilet me nlelet ere, inyi emi nkamun̄ ọmọ ni? Ìre ǹkakup me akpabin inyọn̄ mè linyọn̄ òjot òjot ni? Emi Okumugwem nkido.

²⁵“Nnọ inu ebi nriran ebi ìkiben nriran ataak me erieen̄ n̄a etumube. Ema ebe, ‘Mmun̄ ilaak! Mmun̄ ilaak!’

²⁶Ìre mgbọ owa ke ebi nriran ataak chi eben me ejit ibeben nriran kiban̄ chi ire? Ema ekiben nriran ofiaan̄ ofiaan̄ inu ònan̄a ema me ejit.

²⁷Ema ekikeek ibe ke ilaak ema ekikpa inyi lek kiban̄ cha môrọ ibe ebi n̄a ewuuk erieen̄ n̄a, kubọk ebi nte nte kiban̄ etọbọbe ebum inyi Baali, mè iwuuk erieen̄ n̄a.

²⁸Ogwu nriran òmun̄ ilaak, ikpa ilaak kan̄. Ire, ogwu ikọ n̄a onin̄be ubọk, itumu ikọ ya ubọk enyibe ọmọ. Ìre ufuk lek akpa ìkafat ìkaan̄ oruru ìgak ikpọk akpa? Emi Okumugwem nkido.

²⁹Ìre ikọ n̄a ìkafat ìbet lek ukan̄ òkitaka inu iriọk ni? Sà ìre ìkabet lek abaracha òkibak ewuuk okpọkọ okpọkọ mọnọ? Emi Okumugwem nkido.

³⁰“Eya orọ, emi nje ikeme ebi nriran cha ìkichichim ikọ n̄a ge me ubọk ge. Emi Okumugwem ntumu.

³¹Iin̄, emi nje ikeme ebi nriran kecha ìkimumen alọm me otu, mè ikibe, ‘Ikeyi ke Okumugwem otumu.’ Emi Okumugwem ntumu.

³²Me atikọ, emi nje ikeme ebi nriran ìkikpa ataak ataak ilaak. Ema ekikpa ataak ataak ilaak kiban̄ cha, kpekikeek inu geege, mè ikisa me ikeya irọ ibe ebi n̄a eje elọ, me ere emi ǹkararia ema, ǹkanyinyi ema otu. Eya orọ, ilaak kiban̄ ìkanin̄ oruru geege ìnyi ebi ife chi. Emi Okumugwem ntumu.”

³³“Mgbọ ebi ife chi, mè ìre ogwu nriran mè ìre ogwu ngwugwa, isido owu ibe, ‘Keke ore nriran Okumugwem?’ Tumu nyi ema ibe, ‘Kpasi nriran? Mâjit enyi itele. Emi Okumugwem ntumu.’

³⁴Ire ogwu nriran mè ìre ogwu ngwugwa mè ìre ebi ene itumu ibe, ‘Eyi ìre nriran Okumugwem!’ Emi mâsulu ene ya mè ebi ototun̄ ukan̄ kan̄ osusut.

³⁵Otutuuk ene me lek kinyi ekpọkpọ ikitumu inyi ebi melek kiban̄ mè ìre ebi ngwan̄ kiban̄ ibe, ‘Okumugwem ìfọọk keke?’ Mè ìyaka ire, ‘Keke ke Okumugwem otumu?’

³⁶Ire, ikayaka ìkpọk ìchak otu me lek nriran Okumugwem ofifi, mije, ikọ ene geelek îkana nriran inyi ene ya. Enyi ekekisa me ikeya iwuwọlọ ikọ Awaji ogwu òkup me ugwem, òrere Okumugwem Ogwukaan̄ Inyọn̄ mè Ijọn̄, Awaji kiji.

³⁷Inu owu obokitumu inyi ogwu nriran ìre: ‘Keke ke Okumugwem ofọọk owu?’ mè ìre, ‘Keke ke Okumugwem otumu?’

³⁸Ubọk geelek enyi ekibe, ‘Eyi ìre nriran Okumugwem,’ Okumugwem ìtumu ibe ikeyi: ‘Mije enyi ekitumu ibe, “Eyi ìre nriran Okumugwem,” me ere nriabe etip ibe etumu enyi enyi ibe enyi ekayaka ìkitumu ibe, “Eyi ìre nriran Okumugwem,”

³⁹eya orọ, emi me lek n̄a mâwuuk enyi isan̄a isi ge, mè ijit enyi itele, enyi melek ama nsabe inyi enyi mè ebi nte nte kinyi, mè itọp enyi ifiin̄ isan̄a me isi n̄a.

⁴⁰Mâtap enyi esip me isi ire mgbọ geelek, mè irọ enyi inu esip eyi enyi kpebewuuk mege ire mgbọ geelek.’ ”