Read obolo Jeri 24 Bible Online

Jeri 24 - obolo bible

Jeri 24

¹Mgbọ Nebukadineja ogwu ubọọn̄ Babilọn otetbe Jekonaya[19] ogwu ubọọn̄ Juda, gwun̄ kè Jioyakim me Jeruselem, mè ikpulu si ebi ibot mkpulu Juda, melek ebi usọ ikwaan̄ okwukwut mè ebi usọ ikwaan̄ alata, isa ifo Babilọn me usun̄ akọn̄, Okumugwem onenijeen̄ emi okwun figi iba eyikbe me isi Uwu Mbuban Okumugwem.

²Okwun ge ke atata figi echi ònwọnwọn lek enenen okup me emen, kubọk echi òdadasi iren̄e; sà okwun keyilọ ke njijọ figi echi òfafiat enenen, okup me emen, kpekọt irie.

³Okumugwem onenido emi ibe, “Jerimaya, keke ke omun̄?” Mfọfọọk ibe, “M̀mun̄ figi, echi atata ònwọnwọn lek enenen, mè echi ijijo òfafiat enenen, kpebekọt irie.”

⁴Okumugwem onenitumu inyi emi ibe:

⁵“Okumugwem, Awaji ebi Ijeren, ìtumu ibe ikeyi: ‘Ebi Juda ebi etetbe me usun̄ akọn̄ cha, ebi emi nriabe isan̄a me ere keyi isi ido Babilọn, ema enwọn kubọk atata mfut figi chi.

⁶Mânama ema ibene igwuun̄, m̀kpagbugbọ ema igwook; mâwop ema ikeke, m̀kpajibi ema ito.

⁷Mânyi ema ejit ema mêsabe iriọọn̄ emi, ibe ke emi nre Okumugwem. Ema mêre ebi n̄a, emi mârere Awaji kiban̄, mije, ema mêka inu me lek n̄a me otutuuk ejit kiban̄.

⁸“ ‘Ire, kubọk njijọ figi echi òfafiat enenen cha echi kpebekọt irie cha okupbe, ikeya si ke emi mbarọ Jedikaya ogwu ubọọn̄ Juda inu, ọmọ mè ebi ibot mkpulu kan̄ cha mè ebi Jeruselem ebi ìsisik me lek ijọn̄ keyi, mè ebi ìluk me ijọn̄ Ijipiti. Emi Okumugwem ntumu.

⁹Mârọ inyi ema ekana njijọ inu mè inu echacha me lek otutuuk ido geelek me linyọn̄, mè ere si inu esip mè inu ekisa ito urọk, mè inu ochak mè inu mêkifefieek otu inyi me ere geelek mârieen̄be ema isi igwook.

¹⁰Mâria oge akọn̄ mè akan̄ melek ijo orukan̄ igwook ema me lek mege mêjijakabe ema isan̄a me inyọn̄ ijọn̄ ya eyi nnyibe ema mè ebi nte nte kiban̄.’ ”