Read obolo Jeri 26 Bible Online

Jeri 26 - obolo bible

Jeri 26

¹Me ibebene mkpulu kè Jioyakim, gwun̄ kè Josaya, ogwu ubọọn̄ Juda, Okumugwem onenitumu inyi emi ibe:

²“Okumugwem ìtumu ibe ikeyi: Keke me oyet egep Uwu Mbuban Okumugwem tumu ikọ nyi otutuuk ebi ama ebi Juda geelek ìkinu initọbọ ebum inyi Okumugwem. Tumu otutuuk inu ntumube inyi owu nyi ema; katet ikọ geege ìkaan̄.

³Usini mgbọ, ema mênọ, mè igwu ikom me ijo oniin̄ kiban̄, emi mâneninwene ejit, mè itele ùrioon̄ ya ntọtbe isasa initoon̄ ema mije ijo inu ema erọbe.

⁴Tumu nyi ema ibe, ‘Okumugwem ìtumu ibe ikeyi: Ire enyi kpegban̄ utọn̄ inyi emi, mè igọọk ikan n̄a, eyi ntobe enyi me isi,

⁵mè ire enyi kpegban̄ utọn̄ me lek ikọ echi ebi ikwaan̄ n̄a ebi nriran, ebi emi mkpọkpọ ikiria ijet enyi, ire enyi kpekigban̄,

⁶emi mârọ Uwu Mbuban yi kubọk nrọbe Silo, mè irọ ama yi ikana inu efieekbe otu inyi me etete otutuuk ido me linyọn̄.’ ”

⁷Ebi ngwugwa mè ebi nriran mè otutuuk ebi ene mînọ Jerimaya okitumu ikọ chi me emen Uwu Mbuban Okumugwem.

⁸Ire, mgbọ Jerimaya otumube inu cha geelek Okumugwem otọbe inyi ọmọ ibe itumu inyi otutuuk ebi ene isan̄a, ebi ngwugwa mè ebi nriran mè otutuuk ebi ene etetet ọmọ, mè ibe, “Owu òbokwukwu!

⁹Keke orọ osabe erieen̄ Okumugwem iben nriran ibe ke Uwu Mbuban yi môkup kubọk Silo, ke ama yi ìboyayat ita, ke ene geege ìkpoluk me emen?” Otutuuk ene ekakana ichit Jerimaya me Uwu Mbuban Okumugwem.

¹⁰Mgbọ ebi ibot mkpulu me Juda enọbe inu chi, ema enanan̄a me uwu ogwu ubọọn̄ isibi inu me Uwu Mbuban Okumugwem, mè inimọnọ irek kiban̄ me isotu Aya Otunchit Uwu Mbuban Okumugwem.

¹¹Ebi ngwugwa mè ebi nriran enenitumu inyi ebi ibot cha mè otutuuk ebi ene ibe, “Oyerebet mkpa îtip ene yi, mije îbenbe nriran ikeme ama yi kubọk enyi enọbe me utọn̄ kinyi gaalek!”

¹²Ikeya ke Jerimaya onitumu inyi otutuuk ebi ibot cha mè otutuuk ebi ene ibe: “Okumugwem oria emi ibe emi m̀ben nriran ǹkeme uwu yi melek ama yi. Ọmọ ore otutuuk inu enyi enọbe cha.

¹³Eya orọ, mgbọ keyi, ìnen̄e oniin̄ kinyi mè irọrọ kinyi ìsun̄, mè ìgban̄ ida Okumugwem, Awaji kinyi. Ire enyi irọ ikeya, Okumugwem mônwene ejit me lek mfufiat îtumube ito ibak enyi.

¹⁴Ire me lek n̄a, kpọ emi ire eyi me ubọk kinyi; ìrọ emi inu geelek ònenen mè igbe me lek kinyi.

¹⁵Ire, ìriọọn̄ ubọk ìriọọn̄, ire enyi ikpan̄ emi, enyi mêsa eje ogwu ikalọge inu geege itoon̄ me ibot kinyi, mè itoon̄ me ibot ama yi, mè ibot ebi ìluk me emen. Me atikọ, Okumugwem oria emi inu me lek kinyi ibe emi ǹnentumu otutuuk ikọ chi ǹtap enyi me utọn̄.”

¹⁶Ebi ibot cha mè otutuuk ebi ene etutumu inyi ebi ngwugwa mè ebi nriran cha ibe, “Oyerebet mkpa geege ìkatet ene yi. Îre me erieen̄ Okumugwem Awaji kiji ke îtumu ikọ inyi eji.”

¹⁷Usini ebi ugane ama esisibi ikeke, mè itumu inyi otutuuk urum ebi ìtititiin̄ cha ibe,

¹⁸“Maika ogwu Moreset îben nriran me ukot kè Ejikaya ogwu ubọọn̄ Juda. Îtumu inyi otutuuk ebi Juda ibe ke Okumugwem Ogwukaan̄ Inyọn̄ mè Ijọn̄ ìtumu ibe ikeyi: “ ‘Mêbak Sayọn igwook kubọk ijọn̄ uko esabe okwukwut ibak, Jeruselem môkana okpurukpu ǹrioon̄, orioon̄ Uwu Mbuban môkana ekpuk oron.’

¹⁹Ìre ogwu ubọọn̄ Ejikaya mè otutuuk ebi Juda mîtet ọmọ ikpan̄? Ìre Ejikaya ìkafat ìtet ukpook Okumugwem, mè ìweek nnwọn me ubọk Okumugwem ni? Ìre Okumugwem ìkanwene ejit, mè ìtele ùrioon̄ îtumube ito ibak ema? Eji me lek kiji mênisa nga ùrioon̄ ile initoon̄ me ibot kiji!”

²⁰(Uraya gwun̄ kè Semaya ogwu Kiriat Jiarim si îben nriran me erieen̄ Okumugwem ikeme ama yi melek ijọn̄ yi. Ikọ yaage Jerimaya otumube ke îtumu si.

²¹Mgbọ ogwu ubọọn̄ Jioyakim, mè otutuuk ebi unye kan̄, mè otutuuk ebi ibot mkpulu kan̄ enọbe ikọ kan̄, ogwu ubọọn̄ îweek ikpakpan̄ ọmọ. Ire, Uraya onọnọ otitọt ya, mè ilibi ifo Ijipiti bak me lek ukpook.

²²Ogwu ubọọn̄ Jioyakim oraria Elinatan gwun̄ kè Akibọru melek usini ebi ene isi Ijipiti.

²³Ema esasa Uraya me Ijipiti ika ijet ogwu ubọọn̄ Jioyakim, ogwu ubọọn̄ osasa oge akọn̄ ikpan̄ ọmọ, mè iben nkwukwu kan̄ itọp itap me ere ekifuun̄ ebi ikike.)

²⁴Ire, Ayikam gwun̄ kè Safan otatap ubọk inyi Jerimaya. Eya orọ, kpeyaka ọmọ itap me ubọk ebi ene, inyi ekpan̄.