Read obolo Jeri 28 Bible Online

Jeri 28 - obolo bible

Jeri 28

¹Me emen acha yaage, òrere òso acha ini me ibebene mkpulu kè Jedikaya ogwu ubọọn̄ Juda, me emen onyan̄ go me acha ya, ogwu nriran Ananiya gwun̄ kè Ajuru, ogwu ama Gibiọn, onenitumu inyi emi, me emen Uwu Mbuban Okumugwem me isi ebi ngwugwa mè otutuuk ebi ene, ibe:

²“Okumugwem Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: ‘Emi mâfan̄a ọgbọn usun̄ ogwu ubọọn̄ Babilọn.

³Acha iba chereyi, nroon̄ ikwaan̄ emen Uwu Mbuban Okumugwem cha echi Nebukadineja, ogwu ubọọn̄ Babilọn, okpulube me ere keyi isa ifo Babilọn, mâsa otutuuk igwu ikom ika inu ere keyi.

⁴Mâsa si Jekonaya[22] ogwu ubọọn̄ ebi Juda, gwun̄ kè Jioyakim melek otutuuk ebi usun̄ akọn̄ kechilọ cha, ebi ekpulube inan̄a me Juda ifo Babilọn, ika inu me ere keyi. Mije, mâfan̄a ọgbọn usun̄ ogwu ubọọn̄ Babilọn. Emi Okumugwem ntumu.’ ”

⁵Ogwu nriran Jerimaya onenitumu inyi ogwu nriran Ananiya, me isi ebi ngwugwa melek otutuuk ebi ìkekeke me emen Uwu Mbuban Okumugwem ya,

⁶ibe: “Ikup keya! Kè Okumugwem irọ si ikeya! Kè Okumugwem irọ ikọ owu obenbe me nriran iso, mè isa nroon̄ ikwaan̄ Uwu Mbuban Okumugwem, mè otutuuk ebi etetbe me usun̄ akọn̄ inan̄a me Babilọn ika inu me ere keyi.

⁷Ubọk geelek si, gban̄ ikọ keyi mbatumu me utọn̄ kwun̄, mè utọn̄ otutuuk ebi ene.

⁸Akarake ukot ikaan̄, ebi nriran ìdadasi ikup sabum owu melek n̄a, mîben nriran ofolek akọn̄ mè ùrioon̄ mè ijo orukan̄, inyi owuwa ido mè ikpele ijọn̄ ubọọn̄.

⁹Ire, ogwu nriran geelek isiben nriran ibak esuuk, mè nriran îbenbe ya isinirọ iso, mgbọ ya ke ekiriọọn̄ ibe ke ogwu nriran ya ìre ogwu Okumugwem oriabe inu me atikọ.”

¹⁰Ogwu nriran Ananiya owọwọọk ọgbọn ya isan̄a me ebek ogwu nriran Jerimaya mè ifan̄a,

¹¹mè itumu me isi otutuuk ene ibe, “Okumugwem ìtumu ibe ikeyi: ‘Ikeyi ke mâfaan̄ ọgbọn usun̄ kè Nebukadineja ogwu ubọọn̄ Babilọn isan̄a me ebek ebi ido geelek me emen acha iba chereyi.’ ” Jerimaya ogwu nriran onanan̄a ije ifo.

¹²Sọnja mgbọ iraraka me lek Ananiya ogwu nriran ofan̄abe ọgbọn isan̄a me ebek ke Jerimaya, Okumugwem onenitumu inyi Jerimaya ibe:

¹³“Je si tumu nyi Ananiya ibe: ‘Okumugwem ìtumu ibe ikeyi: Eyi owu ofan̄abe ìre ọgbọn echi uti, ire, mêsa ọgbọn echi okwukwut inwene.

¹⁴Okumugwem Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: Mâtap ọgbọn okwukwut me ebek ido chi geelek, inyi ema ekesi ikwaan̄ enyi Nebukadineja ogwu ubọọn̄ Babilọn, ema mênin̄ usun̄ inyi ọmọ. Nnyi si ọmọ unye me lek ebi kè anam oron igbaalek.’ ”

¹⁵Ogwu nriran Jerimaya onenitumu inyi ogwu nriran Ananiya ibe, “Ananiya, gban̄! Okumugwem ìkaria owu ikwaan̄, ire, owu ora irọ ibe ife chi esa ikọ ofiaan̄ etoon̄ ejit.

¹⁶Eya orọ, Okumugwem ìtumu ibe ikeyi: ‘Kpọ, mâsan̄a ugwem kwun̄ isan̄a me lek ijọn̄ yi. Acha keyiyi, owu môkwu, mije, owu ojeen̄ ebi ene ibe ekpaka ibot enyi Okumugwem.’ ”

¹⁷Me òso onyan̄ jaaba me acha ya, Ananiya ogwu nriran okwukwu.