Read obolo Jeri 29 Bible Online

Jeri 29 - obolo bible

Jeri 29

¹Eyiyi ìre ikọ Jerimaya ogwu nriran ogebe me ikpa me Jeruselem iria ijet ebi ugane ebi ìsisik me usun̄ akọn̄, melek ebi ngwugwa, mè ebi nriran, melek otutuuk ebi usun̄ akọn̄ kechilọ, ebi Nebukadineja okpulube me Jeruselem isa ifo Babilọn.

²Ìge ikpa yi me mgbọ ekpulube ogwu ubọọn̄ Jekonaya[23] melek ubọọn̄ enenwaan̄ òrere nga kan̄, mè ebi ikwaan̄ uwu ogwu ubọọn̄ melek ebi ibot mkpulu me ido Juda mè Jeruselem, mè ebi usọ okwukwut mè ebi usọ alata, isa ifo Babilọn me usun̄ akọn̄ iraka.

³Ikpa ya ìje me ubọk kè Eliasa gwun̄ kè Safan, mè ubọk kè Gemariya gwun̄ kè Ilikiya, ebi Jedikaya ogwu ubọọn̄ Juda oriabe isi Babilọn isi lek kè Nebukadineja ogwu ubọọn̄ Babilọn. Ikpa ya ìbe ikeyi:

⁴Okumugwem Ogwukaan̄ Inyọn̄ mè Ijọn̄, Awaji ebi Ijeren, ìkitumu inyi otutuuk ebi ọmọ orọbe ibe ekpulu me usun̄ akọn̄ me Jeruselem esa efo Babilọn ibe ikeyi:

⁵“Ìnama uwu ìluk, mè ìwop uko ìrie mfut.

⁶Ìdo nwa ìboon̄ bọn ebirieen̄ mè bọn ebibaan̄; ìdo nwa ìnyi bọn kinyi ebirieen̄, mè ìsa bọn ebibaan̄ kinyi ìche olom, inyi ema si mêkaan̄ bọn ebirieen̄ mè bọn ebibaan̄. Ìwa me otu ifuk me ere ya, ikasese.

⁷Ìweek esuuk ìnyi ama ya mkpulube enyi me usun̄ akọn̄ isi igwook. Ìbeek Okumugwem mbeek me ibot ama ya, mije, ire ema ikaan̄ esuuk, enyi si mêkaan̄ esuuk.

⁸Iin̄, Okumugwem, Awaji ebi Ijeren, ìtumu ibe ikeyi: Ikachieek ibe ebi nriran mè ebi ìkido ido-inu me etete kinyi efiaan̄ enyi. Ikagban̄ ilaak cha, echi enyi ekirọ ibe ema emumun̄.

⁹Ema ekiben nriran ataak me erieen̄ n̄a inyi enyi. Emi ǹkaria ema. Emi Okumugwem ntumu.”

¹⁰Okumugwem ìtumu ibe ikeyi: “Mgbọ akọp acha jaaba òkup inyi Babilọn isiso, mânu me lek kinyi, mè inirọ ata use n̄a ya iso, mè isa enyi ika inu me ere keyi.

¹¹Mije, emi me lek n̄a nriọọn̄ ekiket nkikeek ibak enyi. Îre ekiket eyi esuuk, ìkare eyi ijo inu, ekiket inyinyi enyi ikpọchieen̄ melek ònu-me-isi. Emi Okumugwem ntumu.

¹²Mgbọ ya, enyi mêgwen emi, mè ije inu iniriaak uriaak inyi emi, emi mâgbagban̄ utọn̄ me lek ikọ kinyi.

¹³Enyi mêweek emi, mè imun̄ emi mgbọ enyi isiweek emi me otutuuk ejit kinyi.

¹⁴Enyi mêweek emi imun̄, emi mâsasa enyi me usun̄ akọn̄ ika. Mâkpulu enyi me otutuuk ido geelek mè ere geelek nrieen̄be enyi isi igwook, mè isa enyi igwu ikom ika inu me ere mgbọ mkpulube enyi isibi itap me usun̄ akọn̄. Emi Okumugwem ntumu.”

¹⁵Enyi ekibe, “Okumugwem înyi eji ebi nriran me Babilọn.”

¹⁶Ire, ìgban̄ inu Okumugwem otumube òfo me lek ogwu ubọọn̄ òkup me inyọn̄ ogboon̄ ubọọn̄ kè Debit mè otutuuk ebi ngwan̄ kinyi ebi ìsisik me ama yi, ebi kpegọọk enyi inin̄ usun̄ akọn̄.

¹⁷Okumugwem Ogwukaan̄ Inyọn̄ mè Ijọn̄ ìtumu ibe ikeyi, “Mâniria oge akọn̄, mè akan̄ melek ijo orukan̄ itap me etete kiban̄, mè irọ ema ekup kubọk ijo mfut figi òjọjọ enenen, eyi kpekọt irie.

¹⁸Mâsa oge akọn̄, mè akan̄ melek orukan̄ ililaba ema, mè irọ ema ekana inu otutuuk ijọn̄ ubọọn̄ geelek me linyọn̄ mêtetbe ukpook me lek enenen, mè ekana inu efieekbe otu inyi, mè inu urimi, mè inu ochak mè esip, me etete ebi ido geelek mârieen̄be ema isi igwook.

¹⁹Mije, ema kpegban̄ utọn̄ me lek ikọ n̄a, ikọ mkpọkpọ ikiria ebi ikwaan̄ n̄a ebi nriran ibe esi elook ema. Enyi ebi ìkup me usun̄ akọn̄ si kpechieek igbagban̄. Emi Okumugwem ntumu.”

²⁰Eya orọ, enyi otutuuk ebi usun̄ akọn̄ ebi nsan̄abe isibi me Jeruselem ifo Babilọn, ìgban̄ ikọ Okumugwem.

²¹Inu Okumugwem Ogwukaan̄ Inyọn̄ mè Ijọn̄, Awaji ebi Ijeren, otumube ibak Eyabu gwun̄ kè Kolaya mè Jedikaya gwun̄ kè Maseya, ebi ìkiben nriran ataak inyi enyi me erieen̄ n̄a ìre ikeyi: “Ìkikpọ, me chieen̄ kinyi, mâniyaka ema itap me ubọk kè Nebukadineja ogwu ubọọn̄ Babilọn, inyi ikpan̄ ema isan̄a.

²²Otutuuk ebi Juda ìkup me usun̄ akọn̄ me Babilọn mêkisa ema ifieek otu inyi ene ibe: ‘Kè Okumugwem irọ owu kubọk îrọbe Jedikaya melek Eyabu, ebi ogwu ubọọn̄ Babilọn owọpbe me ukan̄.’

²³Mije, ema mîrọ mbuban inu me Ijeren; ema mîgan nwa ebi melek kiban̄, mè isa erieen̄ n̄a ikan̄ ataak me inu ǹkatutumu ìnyi ema. Emi nre ogwu òrọriọọn̄ inu cha, mè ire si ogwu ata-ikọ. Emi Okumugwem ntumu.”

²⁴Tumu nyi Semaya ogwu Neyelam ibe,

²⁵“Okumugwem Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: Owu osa erieen̄ kwun̄ iria ikpa ijet otutuuk ebi ìkup me Jeruselem, mè iria ijet Jefanaya ogwu ngwugwa, gwun̄ kè Maseya, mè iria si ijet otutuuk ebi ngwugwa kechilọ. Owu otumu inyi Jefanaya ibe:

²⁶“ ‘Okumugwem îrọ owu ogwu ngwugwa me irek kè Jeyoyada, inyi owu òkana ogwu ibot ònyi ebi ìkikpọ chieen̄ me lek Uwu Mbuban Okumugwem. Ogwu iraak geelek òbe ke ọmọ ìre ogwu nriran, owu môtap ene ya me emen mgba-mfiik, mè itap ọmọ si mkpọn me ebek.

²⁷Keke orọ owu òkakọt ìgana ere ìnyi Jerimaya ogwu Anatọt, ogwu òkirọ kubọk ọmọ ìre ogwu nriran inyi enyi?

²⁸Mije, îria etip keyi ijet eji me Babilọn ibe: Usun̄ akọn̄ kinyi môjọn̄ọ mgbọ. Eya orọ, ìnama uwu ìluk, mè ìwop uko ìrie mfut.’ ”

²⁹Jefanaya ogwu ngwugwa ofufuk ikpa ya inyi Jerimaya ogwu nriran inọ.

³⁰Okumugwem onenitumu inyi Jerimaya ibe:

³¹“Ria etip keyi jet otutuuk ebi ìkup me usun̄ akọn̄: ‘Inu Okumugwem otumube ofolek kè Semaya ogwu Neyelam ìre ikeyi: Mije Semaya obenbe nriran inyi enyi, me emi nkariage ọmọ, mè irọ enyi etoon̄ ejit me lek ataak,

³²Okumugwem ìtumu ibe ikeyi: Emi m̀kpalọlọ inyinyi Semaya mè ebi owot iman kan̄ osusut; kpunu ogwu kan̄ geege òbosik me etete ebi ife chi; ọmọ ìkpomun̄ si ata inu echi mbarọ inyi ebi n̄a, mije, îjeen̄ ebi ene ibe enye ibot enyi emi. Emi Okumugwem ntumu.’ ”