Read obolo Jeri 30 Bible Online

Jeri 30 - obolo bible

Jeri 30

¹Okumugwem onenitumu si inyi Jerimaya ibe:

²“Okumugwem, Awaji ebi Ijeren, ìtumu ibe ikeyi: ‘Ge otutuuk inu ntumube inyi owu tap me ikpa.

³Usen òkinu, mgbọ mâsabe ebi n̄a ebi Ijeren melek ebi Juda inan̄a me usun̄ akọn̄ ika, mè isa ema ika inu me lek ijọn̄ ya nnyibe ebi nte nte kiban̄, ema mêbọkọ ikaan̄.’ Emi Okumugwem ntumu.”

⁴Ikọ Okumugwem otumube ofolek Ijeren mè Juda ìre ikeyi:

⁵“Okumugwem ìtumu ibe ikeyi: “ ‘Ukpo ufieek-owot ke eji enọ, mè eyi ukpook, ìkare ukpo esuuk.

⁶Do-nu, mè kpọ-nu: Ìre enerieen̄ môkọt iman bọn ni? Keke orọ nkimun̄ ebirieen̄ geelek ebieen̄be ubọk me ebon kubọk enenwaan̄ uman okifiak, isi otutuuk kiban̄ okpọkpọ ikup joon̄?

⁷Usen ya mômin enenen! Kpunu ofifi usen òbokup kubọk kan̄. Mgbọ ya ìbore mgbọ ufialek inyi Jekọp, ire, mênyan̄a ọmọ isibi me emen ufialek.

⁸“ ‘Me usen ya, mâfaan̄ ọgbọn usun̄ isan̄a ema me ebek, mè isan̄a ema isibi me mkpọn; ema kpebeyaka ikpọk inin̄ usun̄ inyi ebi ichen ofifi.

⁹Ire, ema mênenikisi ikwaan̄ inyi Okumugwem Awaji kiban̄, mè isi si inyi ogwu ubọọn̄ kiban̄, ogwu owot iman kè Debit, ogwu emi mâsan̄abe isibi inyi ema.

¹⁰“ ‘Eya orọ, enyi bọn kè Jekọp ebi ikwaan̄ n̄a, ikafieek owot, enyi ebi Ijeren, ikatet ukpook. Emi m̀kpalọlọ inyanyan̄a enyi isibi me ujọn̄ọ ere, mè inyan̄a bọn owot iman kinyi isibi me ama usun̄ akọn̄ kiban̄. Mgbọ ya, bọn kè Jekọp mêkpọk ikaan̄ esuuk mè utelelek, kpunu ogwu òborọ ema efieek owot. Emi Okumugwem ntumu.

¹¹Mije, emi òwa melek kinyi, mânyan̄a enyi. Otutuuk ido cha nyiyalabe enyi itọọn̄ itap, mâjijaka ema otutuuk isan̄a kpai. Ire, m̀kpajijaka enyi isan̄a; mâsulu enyi osusut ubọk ònenen; m̀kpatele enyi efon me ikike. Emi Okumugwem ntumu.’

¹²“Okumugwem ìtumu ibe ikeyi: “ ‘Inya kwun̄, kpebekọt igwa ichep, unan kwun̄ îraka eyi òbotata.

¹³Kpunu ogwu òbotumu ikọ ibot kwun̄; kpunu ugwun̄ òbokọt igwa inya kwun̄, eya orọ, kpunu igwagwa inyi owu.

¹⁴Otutuuk ebi melek kwun̄ erebe otu unọn mè ijọn̄ mîwuuk owu; ema kpeyaka ikeek inu òfo me lek kwun̄. Ntap owu unan me lek, kubọk ogwu ochicha okitap ene unan, mè inyi owu osusut ogwu ikpak okinyi ene, mije, nrọ-nlọ kwun̄ îmin enenen, ijo inu kwun̄ si îwa enenen.

¹⁵Keke orọ owu okito unan kwun̄, mè ufiak kwun̄ ya eyi kpebekọt igwa? Îre bak me lek ikpele nrọ-nlọ kwun̄ mè owuwa ijo inu kwun̄, ke emi nrọ owu inu chi.

¹⁶“ ‘Ire, ebi geelek ìjijijaka owu, mêjijaka ema si; otutuuk ebi ochicha kwun̄ mênin̄ me usun̄ akọn̄. Ebi ìfufum inu kwun̄, mêfum si inu kiban̄; ebi ìchichiin̄ inu kwun̄, mêchiin̄ si inu kiban̄.

¹⁷Ire, mârọ inyi lek kwun̄ inye, mè igwa inya kwun̄, bak me lek ekigwen owu ogwu elalap isan̄a, mè ikibe, “Sayọn eyi ikakaan̄ge ogwu òkikpọ ọmọ chieen̄ me lek.”

¹⁸“ ‘Okumugwem ìtumu ibe ikeyi: “ ‘ “Kpọ, mâsa ebi kè Jekọp me usun̄ akọn̄ ika, mè ikaan̄ nsan me lek ebi ototun̄ ukan̄ kan̄; mêkpọk inama Jeruselem me inyọn̄ ǹrioon̄ kan̄, uwu ogwu ubọọn̄ kan̄ si môkeke me akpat ere kan̄.

¹⁹Okwa itọn̄ môkekitaan̄ inan̄a me otu kiban̄, ida unwọọn̄ môkekinan̄a me etete kiban̄ ikitaan̄ isibi. Mârọ ema ekewawa me otu ifuk, ema kpebekisese. Mârọ ema ekaan̄ umin, ene geege ìkabokpọ ema chieen̄ isiki.

²⁰Bọn kiban̄ mêyaka ikpọk ikup kubọk ekupbe me ukot ikaan̄, ido kiban̄ môkeke inye me isi n̄a; mâsulu ebi ìkitutuku ema osusut.

²¹Ogwu òbokpulu ema ìbore ene ge me lek kiban̄, ogwu ibot mkpulu kiban̄ ìbonan̄a me etete kiban̄. Emi mâtaba ọmọ igbet lek n̄a, mè ọmọ ije iriaak emi lek, mije, ekene ire ene ya òtutumu ifieek me ejit kan̄, ibe ke ọmọ môje iriaak emi me lek? Emi Okumugwem ntumu.”

²²“ ‘Enyi mênenire ebi n̄a, emi mârere Awaji kinyi.’ ”

²³Ìkpọ, uyok uyok unaan̄-ejit Okumugwem ìbojibi kubọk egwijo; ìbojibi kubọk ogbolodom okijibi inu, môgba iyak itoon̄ me inyọn̄ ibot ebi ikpak.

²⁴Uyok uyok unaan̄-ejit Okumugwem ìkpogwu ikom, îtata ìrọrọ inu òkup me ejit kan̄ iso. Me òta usen cha, enyi mêgobo inu chi itet ijaan̄ lek.