Read obolo Jeri 33 Bible Online

Jeri 33 - obolo bible

Jeri 33

¹Jerimaya ìkup si me emen oyet egep ebi mbem ere egonbe ọmọ ikam, mgbọ Okumugwem otumube ikọ inyi òso mgbọ iba, ibe:

²“Okumugwem ogwu òsasan̄a ama Jeruselem[24] isibi, mè irọ ibe ikup, mè irọ si ibe ikeke inye; Okumugwem ore erieen̄ kan̄. Okumugwem ìtumu ibe ikeyi:

³‘Gwen emi, ke mâfọọk owu otu, mè ijeen̄ owu ikpele inu mè inu òdọdọk echi owu okariọọn̄ge.’

⁴Mije, inu Okumugwem, Awaji ebi Ijeren otumube ofolek uwu òkup me emen ama yi, mè uwu ebi ubọọn̄ ebi Juda cha echi egbugbọbe igwook isa ikwek obubot mbin akọn̄ mè oge akọn̄, ìre ikeyi:

⁵‘Ebi ene mênu initim akọn̄ me lek ebi Babilọn, mè itap nkwukwu ene ijot emen uwu cha, nkwukwu ebi emi mâsabe me unaan̄-ejit n̄a mè uyok uyok unaan̄-ejit n̄a ikpan̄. Emi m̀kpayaka inyi ebi ama yi isi, mije otutuuk inu ikpak ema ekirọ.

⁶“ ‘Ubọk geelek si, mâgwa ebi ama yi, mè irọ lek kiban̄ inye; mâgwa ebi n̄a, mè irọ ema enọ utop òjot òjot esuuk mè utelelek.

⁷Mâsa ebi Juda mè ebi Ijeren igwu ikom me usun̄ akọn̄ ika, mè ikpọk inama ema ikup kubọk adasi mgbọ kiban̄.

⁸Mâgwọk ema itana me lek otutuuk ijo irọrọ ema erọbe ikeme emi, mè itele otutuuk ijo inu cha ema erọbe emi, mè isa me ikeya ije emi ilọ.

⁹Mgbọ ya, mânenisa me lek ama yi itaan̄ etip, mè ikaan̄ unwọọn̄ mè itọn̄ melek umin me isi otutuuk ido geelek me linyọn̄, ebi mênọbe otutuuk ata inu nrọbe inyi ama yi. Ebi linyọn̄ mênenitet ukpook, mè ikiran, bak me lek otutuuk ata inu mè otutuuk esuuk mânyibe ama yi.’

¹⁰“Okumugwem ìtumu ibe ikeyi: ‘Enyi ekitumu ibe ke ere keyi ìre ere òyayat, kpunu ebilene, kpunu anam. Ire, me emen ama ebi Juda mè lek oniin̄ Jeruselem echi eyatbe itele cha, ere kpunube ebilene ìluluk, kpunu si anam, me ere yi, mêyaka ikpọk inọ

¹¹okput unwọọn̄ mè okput ubelejit, melek okput aya olom mè okput aya nwa, mè okput ebi ìkisa ngwugwa onirọ inu me Uwu Mbuban Okumugwem, mè ikibe, “ ‘Ìtọn̄ Okumugwem Ogwukaan̄ Inyọn̄ mè Ijọn̄, mije Okumugwem minwọn; mije, imumechieen̄ kan̄ ìkukup ire mgbọ geelek.’ Mije, mârọ inyi ebi ekpulube me usun̄ akọn̄ me lek ijọn̄ yi egwu ekom eka, mè enekup kubọk adasi mgbọ ya. Emi Okumugwem ntumu.”

¹²“Okumugwem Ogwukaan̄ Inyọn̄ mè Ijọn̄ ìtumu ibe ikeyi, ‘Ere keyi òyayat, eyi kpunube ene, kpunu anam, ere yi mè otutuuk asabọn ama kan̄ geelek, môkpọk ikana ere ebi òkpukpo arọọn̄ ebekisa arọọn̄ kiban̄ inu, inyi inililam ikana.

¹³Me ama echi òkup me inyọn̄ ogoon̄, mè echi òkup me inyọn̄ orioon̄ isi ogoon̄ agan̄ ichep-ura, mè echi emen èwê agan̄ osiki, mè echi lek ijọn̄ ebi otoko kè Benjamin, mè asabọn ama òkukup ikana Jeruselem, mè ama ebi Juda geelek, urum arọọn̄ mêkije itibi irak ubọk ogwu òkifuk otu ifuk kiban̄. Emi Okumugwem ntumu.’ ”

¹⁴“Usen òkinu, mgbọ mârọbe ata inu cha nchieekbe use inyi ebi uwu kè Ijeren mè ebi uwu kè Juda. Emi Okumugwem ntumu.

¹⁵“Usen cha isire, mè mgbọ ya isikem, mârọ Agọọk Ata Irọrọ itibi isibi me owot iman kè Debit; ọmọ môkirọ inu ònenen mè inu òtatat me lek ijọn̄ yi.

¹⁶Me usen kecha, mênyan̄a ebi Juda, ebi Jeruselem mêluluk me utelelek. Erieen̄ ebekigwen ama ya ìre: ‘Okumugwem Ore Ata Irọrọ Kiji.’

¹⁷Mije, Okumugwem ìtumu ibe ikeyi: ‘Debit ìkpolọlọ ikakaan̄ ene ogwu òbokweek me inyọn̄ ogboon̄ ubọọn̄ ebi Ijeren.

¹⁸Ikeya si, ebi ngwugwa, ìrere ebi otoko kè Libai si, kpebelọlọ ikekikaan̄ ogwu òbokikeke mgbọ geelek me isi n̄a ikigwa ngwugwa ewọwọp iriọk, mè ngwugwa akpa, mè ngwugwa kechilọ cha usen geelek.’ ”

¹⁹Okumugwem onenitumu inyi Jerimaya ibe:

²⁰“Okumugwem ìtumu ibe ikeyi: ‘Enyi isikọt ichaka inyan̄a-ibot n̄a melek ikarek mè inyan̄a-ibot n̄a melek eririeen̄, inyi ikarek mè eririeen̄ ikayaka ìkup me mgbọ kiban̄,

²¹mgbọ ya ke mêkọt ichaka inyan̄a-ibot n̄a melek kè Debit gwun̄ ikwaan̄ n̄a, inyi ikakaan̄ gwun̄ enerieen̄ òbokeke ubọọn̄ me inyọn̄ ogboon̄ ubọọn̄ kan̄, mè ichaka si inyan̄a-ibot n̄a melek ebi otoko kè Libai, ìrere ebi ngwugwa ebi ìkirọ ikwaan̄ inyi emi.

²²Ike kpebekọt ifuk otu ifuk ntoronyan̄ òkup me akpabin inyọn̄, mè ike kpebekọt itọ achiaan̄ òkup me agba awaji, ikeya ke owot iman kè Debit gwun̄ ikwaan̄ n̄a mè owot iman ebi otoko kè Libai ebi ìkirọ ikwaan̄ inyi emi ebewa ire.’ ”

²³Okumugwem onenitumu inyi Jerimaya ibe:

²⁴“Ìre owu òkanọ inu ife chi ekitumu ni? Ema ekibe, ‘Okumugwem îgobo otoko iba, mè ijit ema itele.’ Ikeya ke ema esa ikpọ ebi n̄a chieen̄ isiki, kpeyaka imọnọ ema kubọk ema ìre ido.

²⁵Okumugwem ìtumu ibe ikeyi: ‘Ire ǹkanyan̄a ibot melek ikarek mè eririeen̄, mè ìsun̄ ikan ìnyi inu òkikpulu akpabin inyọn̄ mè linyọn̄,

²⁶ikeya si, mâjit ebi owot iman kè Jekọp mè Debit gwun̄ ikwaan̄ n̄a, mè itele igogobo ene ge me lek bọn ebirieen̄ kan̄ ibe inikpulu ebi owot iman kè Ebereyam mè Ajiki mè Jekọp. Mije, mâsa ebi kiban̄ cha etetbe me usun̄ akọn̄ ika, mè ikaan̄ ema nsan me lek.’ ”