Read obolo Jeri 34 Bible Online

Jeri 34 - obolo bible

Jeri 34

¹Me mgbọ Nebukadineja ogwu ubọọn̄ Babilọn mè otutuuk urum akọn̄ kan̄ melek otutuuk ido mè ebi ife geelek me linyọn̄ ìkup me irak mkpulu kan̄ ekitim akọn̄ me lek Jeruselem mè otutuuk ama òkukup ikana Jeruselem, Okumugwem onenitumu inyi Jerimaya ibe:

²“Okumugwem, Awaji ebi Ijeren ìtumu ibe ikeyi: Je si lek kè Jedikaya ogwu ubọọn̄ Juda, mè tumu nyi be, ‘Okumugwem ìtumu ibe ikeyi: Mâniyaka ama yi itap me ubọk ogwu ubọọn̄ Babilọn, ọmọ môwọwọp ama yi itaka ikọọk.

³Owu òkponwọnọ me ubọk kan̄. Ebetetet owu, mè iyaka owu itap me ubọk kan̄. Owu môsasa chieen̄ kwun̄ irieen̄ me lek chieen̄ ogwu ubọọn̄ Babilọn, ọmọ melek kwun̄ mêkpakpa ikọ isi mè isi, ọmọ môsasa owu ifo Babilọn.

⁴“ ‘Ire, Jedikaya ogwu ubọọn̄ Juda, gban̄ ikọ Okumugwem. Ikọ Okumugwem otumube òfo me lek kwun̄ ìre ikeyi: Owu òkpoje me otu oge akọn̄ ikwu;

⁵owu òbokwu me esuuk. Ike ebi ene esọkbe ukan̄ iwọp nsensi isa inyi ebi nte nte kwun̄ ebi ìdadasi ire ubọọn̄ me isi kwun̄ umin me mgbọ mkpa kiban̄, ikeya si ke ebesọk ukan̄ iwọp nsensi isa inyi owu umin mgbọ owu môkwube, mè ikito owu ibe, “Jei, ogwukaan̄ kiji!” Emi me lek n̄a nchieek use keyi. Emi Okumugwem ntumu.’ ”

⁶Jerimaya ogwu nriran otutumu otutuuk ikọ chi me Jeruselem inyi Jedikaya ogwu ubọọn̄ Juda.

⁷Ike mgbọ yi, ebi akọn̄ ogwu ubọọn̄ Babilọn mêkitim akọn̄ me lek Jeruselem melek ama ebi Juda kechilọ echi òsisik. Ama cha ìre Lakis melek Ajeka, ema gaalek ere ama mgban akọn̄ òsisik me lek ama ebi Juda.

⁸Okumugwem onenitumu ikọ inyi Jerimaya me mgbọ ogwu ubọọn̄ Jedikaya onyan̄abe ibot melek otutuuk ebi ìkup me Jeruselem ibe elook ema etip ibe etele mè ebi usun̄ efon me utelelek.

⁹Elook ibe ene geelek itele ogwu usun̄ kan̄ geelek òrere ogwu Iburu, mè ìre enerieen̄ mè ìre enenwaan̄, inyi ifo me utelelek; ene geege ikatet ogwu Ju ngwan̄ kan̄ ìkaan̄ me usun̄.

¹⁰Otutuuk ebi ibot mkpulu mè otutuuk ebi ene ebi ìnyanyan̄a ibot ya echechieek itetele ibe ebi usun̄ kiban̄ ebirieen̄ mè ebibaan̄ efon me utelelek, kpeyaka itet ema ikaan̄ me usun̄ igak ikeya. Ema mîbọkọ itap, mè isan̄a ebi usun̄ cha isibi, inyi efon.

¹¹Me mgburudun̄, ema enwenwene ejit, mè ikpọk itet ebi usun̄ ebirieen̄ mè ebibaan̄, ebi ema etelebe ibe efon cha, iyaka initap me usun̄.

¹²Mgbọ ya, Okumugwem otutumu inyi Jerimaya ibe:

¹³“Okumugwem, Awaji ebi Ijeren ìtumu ibe ikeyi: Emi nnyan̄a ibot melek ebi nte nte kinyi mgbọ nsan̄abe ema me Ijipiti, me uwu usun̄ isibi, mè itumu inyi ema ibe,

¹⁴‘Me òta òso acha jaaba geelek, owu môtele ngwan̄ kwun̄ ogwu Iburu ònyanyam lek kan̄ inyi owu, inyi ifo me utelelek. Ọmọ isisi ikwaan̄ inyi owu acha gweregwen, owu môtele ibe ifo me ọsọ.’ Ire, ebi nte nte kinyi kpenọ, kperaraan̄ si utọn̄ igban̄.

¹⁵Me egwe cherekeyi, enyi mînwene ejit, mè irọ inu òtatat me chieen̄ n̄a. Enyi ge ge mîtele ogwu melek kinyi ibe isibi me usun̄ ifo. Enyi mînyan̄a si ibot me isi n̄a me emen uwu ya òkichieek erieen̄ n̄a.

¹⁶Ire, mgbọ keyi, enyi egwugwu ikom, mè ififila erieen̄ n̄a; enyi ge ge eyayaka ikpọk itet ebi usun̄ ebirieen̄ mè ebibaan̄ cha enyi etelebe ibe esibi me usun̄ efon, ike îlọkbe ema, mè iyaka isa ema initap me usun̄, inyi ema ekpọk ekana usun̄ enyi enyi.

¹⁷“Eya orọ, Okumugwem ìtumu ibe ikeyi: Eyi enyi kpesiki ibot inyi emi, kpenyi ebi ngwan̄ kinyi mè ebi melek kinyi utelelek, emi mâninyi enyi utelelek, inyi enyi esi ekwaan̄ me otu oge akọn̄ mè irak ijo orukan̄ mè akan̄. Emi Okumugwem ntumu. Mârọ inu eyi òbotap ikpele ukpook me lek otutuuk ijọn̄ ubọọn̄ geelek me linyọn̄.

¹⁸Ebi ìchichichaka inyan̄a-ibot n̄a, ebi kpesun̄ inyan̄a-ibot ya ema enyan̄abe me isi n̄a, emi mârọ ema kubọk ema ekirọ gwun̄ eriembuuk ngwugwa kiban̄ cha echi ema ekitọbọ ibum iba, mè ikije itibi agbagba okpọkọ iba cha.

¹⁹Ebi ibot mkpulu me Juda mè Jeruselem, mè ebi ikwaan̄ uwu ebi ubọọn̄, mè ebi ngwugwa, mè otutuuk ebi lek ijọn̄ yi ebi ìjeje itibi agbagba okpọkọ gwun̄ eriembuuk cha,

²⁰mâyaka ema itap me ubọk ebi ochicha kiban̄, mè ebi ìkiweek ebek ugwem kiban̄. Nkwukwu kiban̄ ìbokana inorie inyi unọn òwulu me inyọn̄ mè anam òkup me oron.

²¹“Mâyaka Jedikaya ogwu ubọọn̄ Juda mè ebi ibot mkpulu kan̄ itap me ubọk ebi ochicha kiban̄ mè ubọk ebi ìkiweek ebek ugwem kiban̄, mè ubọk ebi akọn̄ ogwu ubọọn̄ Babilọn, ebi ìchachak lek ikpebe inan̄a me lek kinyi.

²²Mâninyi ema ida, mè irọ ibe ema egwu ekom enu me ama yi. Ema mêtim akọn̄ me lek ama yi, mè ibọkọ, mè iwọp itaka ikọọk. Mârọ inyi ama ebi Juda geelek iyat ita kpai, inyi ene geege ikaluk. Emi Okumugwem ntumu.”