Read obolo Jeri 35 Bible Online

Jeri 35 - obolo bible

Jeri 35

¹Mgbọ Jioyakim gwun̄ kè Josaya orebe ubọọn̄ me Juda, Okumugwem onenitumu inyi Jerimaya ibe:

²“Je si lek ebi uwu kè Rekabu si tumu ikọ melek kiban̄, mè sa ema na me agwut ge me lek Uwu Mbuban Okumugwem, mè nyi ema miin̄ ibe enwọ.”

³Ikeya ke nnisi isa Jayajania gwun̄ kè Jerimaya, gwun̄ kè Abajiniya, mè ebi ngwan̄ mè otutuuk ebi bọn, mè otutuuk ebi owot iman kè Rekabu inu,

⁴mè isa ema initap me emen agwut bọn kè Yanan gwun̄ kè Yigidaliya, ogwu ikwaan̄ Awaji, eyi òkup me lek Uwu Mbuban Okumugwem. Agwut ya ìkup iriaak agwut ebi ibot ikwaan̄, eyi òkup me inyọn̄ agwut kè Maseya gwun̄ kè Salum ogwu òkibem isotu.

⁵Nnenibeen̄ ogbokot miin̄ ojotbe otu iniyiyik inyi ebi owot iman kè Rekabu, mè igwook si ekpen̄ igbaalek, mè ibe ema, “Ìnwọ sọntiik miin̄ ma.”

⁶Ire, ema efọfọọk ibe, “Eji kpekinwọ miin̄, mije, Jonadabu gwun̄ kè Rekabu, òrere nte nte kiji, ìtatap ikan inyi eji, ibe: ‘Enyi melek bọn kinyi, ikakinwọ miin̄, mege isi ire mgbọ geelek.

⁷Ikanama si uwu, ikawop mfut uko geege, ikawowop si uko gerep; ikakaan̄ si inu chi geege. Ire, ìkiluk me uwu ọfọ otutuuk ugwem kinyi. Sa me ikeyi ke enyi mêluk ijọn̄ọ mgbọ me lek ijọn̄ yi ere enyi elukbe kubọk ebi ichen.’

⁸Eji mîgban̄ utọn̄ me lek otutuuk inu chi Jonadabu gwun̄ kè Rekabu, nte nte kiji, onyibe eji ikan me lek. Me otutuuk ugwem kiji, eji melek ebi nwa kiji, mè nsabọn kiji ebirieen̄ mè ebibaan̄, kpekinwọ miin̄,

⁹kpekinanama si uwu iluk me emen. Eji kpekaan̄ uko gerep, kpekaan̄ ijọn̄ uko, kpekakaan̄ si ukwuuk uti geege.

¹⁰Eji ekiluk me uwu ọfọ, mè ikigban̄ utọn̄ me lek otutuuk inu geelek Jonadabu, nte nte kiji, onyibe eji ikan me lek, mè ikirọ.

¹¹Ire, mgbọ Nebukadineja ogwu ubọọn̄ Babilọn ojibibe akọn̄ inu me lek ijọn̄ yi, eji enenibe, ‘Ngwa, eji enefo Jeruselem, bak me lek ukpook ebi akọn̄ Babilọn mè ukpook ebi akọn̄ Aram.’ Ikeya ke eji eniluk me Jeruselem.”

¹²Mgbọ ya, Okumugwem onenitumu inyi Jerimaya ibe:

¹³“Okumugwem Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: Je si tumu nyi ebi Juda mè ebi ìluk me Jeruselem ibe ke emi Okumugwem ntumu ibe, ‘Ìre enyi kpebebọkọ si nteme, mè igban̄ utọn̄ me lek ikọ n̄a ni?

¹⁴Jonadabu gwun̄ kè Rekabu ìnyi ebi bọn ikan ibe ekakinwọ miin̄, ema egbagban̄. Mege inire cherekeyi, ema kpekinwọ miin̄, mije, ema mîtet ikan nte nte kiban̄ inye. Ire, emi me lek n̄a nra ikitumu ikọ inyi enyi, mè ikpọkpọ ikitumu, enyi kpechieek igbagban̄.

¹⁵M̀kpọkpọ ikiria otutuuk ebi ikwaan̄ n̄a, ebi nriran, ijet enyi, ema ekekilook enyi ibe, “Ogwu ikup, igwu ikom me ijo oniin̄ kan̄, mè inen̄e eru kan̄ isun̄; ikayaka ìkigọọk ofifi awaji cha, mè ìsi ìkirọ ikwaan̄ ìnyi ema; ke enyi mêluk me lek ijọn̄ ya eyi nnyibe enyi mè ebi nte nte kinyi.” Ire, enyi kpenọ, kperaraan̄ utọn̄ igban̄.

¹⁶Ebi owot iman kè Jonadabu gwun̄ kè Rekabu mîtet ikan nte nte kiban̄ onyibe ema inye. Ire, enyi ebi ife kechi kpechieek igbagban̄ utọn̄ inyi emi.’

¹⁷“Eya orọ, Okumugwem, Awaji Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: ‘Ìkpọ, mânisa otutuuk ùrioon̄ cha ntumube ibak ebi Juda mè ebi ìluk me Jeruselem initoon̄ ema. Ntumu inyi ema, kpegban̄; ngwen ema, kpechieek emi.’ ”

¹⁸Jerimaya onenitumu inyi ebi owot iman kè Rekabu cha ibe: “Okumugwem Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: ‘Mije enyi etetbe ikan nte nte kinyi, Jonadabu, onyibe enyi ikaan̄ inye, mè igban̄ utọn̄ me lek otutuuk nteme kan̄, mè irọ inu geelek îtọbe,

¹⁹eya orọ, Okumugwem, Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: Jonadabu gwun̄ kè Rekabu ìkpolọlọ ikekikaan̄ ene ogwu òbokirọ ikwaan̄ inyi emi mgbọ geelek.’ ”