Read obolo Jeri 36 Bible Online

Jeri 36 - obolo bible

Jeri 36

¹Me òso acha ini me lek mkpulu kè Jioyakim, gwun̄ kè Josaya, ogwu ubọọn̄ Juda, Okumugwem onenitumu ikọ keyi inyi Jerimaya ibe:

²“Mọnọ ikpa ekakat, mè ge otutuuk ikọ ntumube inyi owu òfo me lek ebi Ijeren, mè ebi Juda, melek otutuuk ebi ofifi ido cha, bene me mgbọ mbenebe ikitumu ikọ inyi owu me mgbọ Josaya orebe ubọọn̄ na re mgbọ keyi, ge otutuuk tap me ikpa ekakat ya.

³Usini mgbọ, ebi Juda isinọ otutuuk ùrioon̄ ntọtbe isasa initoon̄ ema, mênwene ijo oniin̄ kiban̄. Emi mânenitele nrọ-nlọ kiban̄ mè ijo inu kiban̄ inyi ema.”

⁴Jerimaya onenigwen Baruk gwun̄ kè Neriya, mè inikigwen otutuuk ikọ cha echi Okumugwem otumube inyi ọmọ inyi Baruk, Baruk ogege ikọ cha me lek ikpa ekakat ya.

⁵Jerimaya onenitumu inyi Baruk ibe: “Mîkwek emi ibia, m̀kpakọt isi Uwu Mbuban Okumugwem.

⁶Eya orọ, owu si Uwu Mbuban Okumugwem me usen ijin-otu, mè fuk ikọ Okumugwem cha ngwenbe inyi owu, echi ogebe me lek ikpa ekakat yi, nyi ebi ene enọ. Owu môfuk si inyi otutuuk ebi Juda ebi ìnan̄a me ama kiban̄ cha inu, inyi ema enọ.

⁷Usini mgbọ ema mêsa mbeek kiban̄ inu me isi Okumugwem, mè ogwu ikup, òtele ijo oniin̄ kan̄, mije, Okumugwem înaan̄ ejit mè iyok ejit enenen, mè ibem lek irọrọ ife chi inu îtumube ikeme ema.”

⁸Baruk gwun̄ kè Neriya orọrọ otutuuk inu Jerimaya ogwu nriran obe ọmọ irọ, mè ifuk ikọ Okumugwem me lek ikpa ekakat ya me emen Uwu Mbuban Okumugwem.

⁹Me òso onyan̄ onaan̄ge me òso acha go me lek mkpulu kè Jioyakim, gwun̄ kè Josaya, ogwu ubọọn̄ Juda, eneninyi otu ibe otutuuk ebi ìkup me Jeruselem mè ebi ìnan̄a me ama ebi Juda geelek inu Jeruselem enin̄ ijin-otu me isi Okumugwem.

¹⁰Baruk okukup me agwut kè Gemariya, gwun̄ kè Safan ogwu uti ikpa, ifuk ikọ kè Jerimaya me lek ikpa ekakat ya inyi otutuuk ebi ene me Uwu Mbuban Okumugwem enọ. Agwut ya ìkup me oyet egep agan̄ inyọn̄ me otu oniin̄ Aya Otunchit Uwu Mbuban.

¹¹Mgbọ Mikaya gwun̄ kè Gemariya, gwun̄ kè Safan, onọbe otutuuk ikọ Okumugwem efukbe me lek ikpa ekakat ya,

¹²isisibi ijọn̄ isi agwut ogwu uti ikpa me uwu ogwu ubọọn̄, ere otutuuk ebi ibot mkpulu ekweekbe irek. Ebi ibot cha ìre: Elisama ogwu uti ikpa, mè Delaya gwun̄ kè Semaya, mè Elinatan gwun̄ kè Akibọru, mè Gemariya gwun̄ kè Safan, mè Jedikaya gwun̄ kè Ananiya, melek otutuuk ofifi ebi ibot mkpulu.

¹³Mgbọ Mikaya okpabe otutuuk inu înọbe Baruk ofukbe me emen ikpa ekakat ya inyi ebi ene,

¹⁴otutuuk ebi ibot cha eraria Jewudi gwun̄ kè Netaniya, gwun̄ kè Selemeya gwun̄ kè Kus, ibe isi itumu inyi Baruk ibe: “Mọnọ ikpa ekakat ya ofukbe inyi ebi ene sa kaan̄ me ubọk na.” Baruk gwun̄ kè Neriya omọmọnọ ikpa ekakat ya ikaan̄ me ubọk isa inu me isi kiban̄.

¹⁵Ema enenibe ọmọ, “Siki kweek irek, mè fuk-nu inyi eji enọ.” Baruk onenifuk ikpa ya inyi ema.

¹⁶Mgbọ ema enọbe otutuuk ikọ cha, ema eririki, ge okpọ ge isi, mè itumu inyi Baruk ibe: “Eji kpebelọlọ ikpakpa otutuuk ikọ chi inyi ogwu ubọọn̄.”

¹⁷Ema edodo Baruk ibe, “Mọmọ ubọk okọtbe ige otutuuk inu chi? Ìre Jerimaya ogwen inyi owu òge? Tumu nyi eji nu.”

¹⁸Baruk ofọfọọk ibe, “Iin̄, îre ọmọ osa otu kan̄ igwen otutuuk ikọ chi inyi emi, nsasa mun̄ ikpa ige me lek ikpa ekakat yi.”

¹⁹Ebi ibot mkpulu cha enenibe Baruk, “Owu mè Jerimaya, ìje ìsi ìlet. Ikachieek ibe ene geege iriọọn̄ ere enyi ekupbe.”

²⁰Ema esasa ikpa ya isi isun̄ me agwut kè Elisama ogwu uti ikpa, mè initolek ije isi oyet egep ogwu ubọọn̄, mè iben otutuuk inu cha ikpa inyi.

²¹Ogwu ubọọn̄ oraria Jewudi ibe isi isa ikpa ekakat ya inu. Jewudi osisi imọnọ ikpa ya me agwut kè Elisama ogwu uti ikpa isa inu, mè inifuk inyi ogwu ubọọn̄ mè otutuuk ebi ibot mkpulu cha ìkekeke me agba lek kan̄.

²²Mgbọ ya ìre emen onyan̄ onaan̄ge, me mgbọ utọọk. Ogwu ubọọn̄ ìsiki ikweek irek me uwu îkikup me mgbọ utọọk, ukan̄ okekilomo me emen uchieen̄ me isi kan̄.

²³Mgbọ geelek Jewudi ofukbe ufieek ita mè ìre ini me lek ikpa ekakat ya isan̄a, ogwu ubọọn̄ îra isa ubuja ebi ìge-ikpa ikọọk ere efukbe isan̄a ya itọp itap me ukan̄ me emen uchieen̄ ya. Ikeya ke îrọ mege, mè ikọọk otutuuk ikpa ekakat ya iwọp itaka iriọk me ukan̄ isan̄a kpai.

²⁴Ogwu ubọọn̄ mè otutuuk ebi ikwaan̄ kan̄ ebi ìnọnọ otutuuk ikọ chi, kpetet ukpook kubọk ge, kpegwagwak si ofọnti me lek kiban̄.

²⁵Ubọk geelek, Elinatan mè Delaya mè Gemariya mîbeek ogwu ubọọn̄ ibe ikawọp ikpa ekakat ya, ire, ìkagban̄.

²⁶Kpan̄asi ikeya, ogwu ubọọn̄ onyinyi Jerameli gwun̄ kan̄ mè Seraya gwun̄ kè Ajirien mè Selemeya gwun̄ kè Abiden ida ibe esi etet Baruk ogwu uti ikpa mè Jerimaya ogwu nriran esa enu. Ire, Okumugwem olelet ema, kpekọt iweek ema imun̄.

²⁷Mgbọ ogwu ubọọn̄ owọpbe ikpa ekakat ya, eyi Baruk ogebe ikọ echi Jerimaya ogwenbe inyi ọmọ cha me lek, isan̄a, Okumugwem otutumu inyi Jerimaya ibe:

²⁸“Kpọk mọnọ ofifi ikpa ekakat, mè ge otutuuk ikọ òkup me lek eyi adasi ya, eyi Jioyakim ogwu ubọọn̄ Juda owọpbe itaka ikọọk ya.

²⁹Tumu nyi Jioyakim ogwu ubọọn̄ Juda ibe, ‘Okumugwem ìtumu ibe ikeyi: Owu owọp ikpa ekakat ya, mè ibe, “Keke orọ ogebe ibe ke ogwu ubọọn̄ Babilọn ìkpolọlọ inunu, mè inikpukpuku lek ijọn̄ yi igwook, mè irọ ebilene mè anam eta enọọn̄ me lek ijọn̄ yi?”

³⁰Eya orọ, ikọ Okumugwem otumube ofolek Jioyakim ogwu ubọọn̄ Juda ìre ikeyi: Jioyakim ìkpokaan̄ ene geege ogwu môkupbe me inyọn̄ ogboon̄ ubọọn̄ kè Debit; ebetọtọp nkwukwu kan̄ ito me lek uyok ikarek mè ofiik eririeen̄.

³¹Mânyi ọmọ mè ebi ototun̄ ukan̄ kan̄ melek ebi ikwaan̄ kan̄ osusut mije inu ikpak kiban̄; otutuuk ùrioon̄ cha ntumube ibak ema mè otutuuk ebi ìluk me Jeruselem melek ebi Juda, echi ema kpegban̄ utọn̄ me lek cha, m̀basasa otutuuk initoon̄ ema.’ ”

³²Jerimaya onenimọnọ ofifi ikpa ekakat isa inyi Baruk ogwu uti ikpa òrere gwun̄ kè Neriya. Jerimaya ogwegwen otutuuk ikọ cha, òkup me ikpa ekakat ya eyi Jioyakim ogwu ubọọn̄ Juda owọpbe me ukan̄, inyi Baruk, Baruk ogege. Mîge si owuwa ofifi mbet lek ikọ kecha isọkọ me lek.