Read obolo Jeri 37 Bible Online

Jeri 37 - obolo bible

Jeri 37

¹Nebukadineja ogwu ubọọn̄ Babilọn onenirọ Jedikaya gwun̄ kè Josaya ubọọn̄ me Juda me irek kè Konaya[25] gwun̄ kè Jioyakim.

²Ire, Jedikaya mè ebi ikwaan̄ kan̄ mè ebi ido kan̄ kpegban̄ utọn̄ me lek ikọ Okumugwem otumube itibi Jerimaya ogwu nriran.

³Usen ge, ogwu ubọọn̄ Jedikaya oneniria Jewukan gwun̄ kè Selemeya melek Jefanaya ogwu ngwugwa, gwun̄ kè Maseya, isi lek kè Jerimaya ogwu nriran ibe: “Soso, riaak uriaak nyi Okumugwem Awaji kiji me ibot kiji ma.”

⁴Me ike mgbọ yi, Jerimaya îkọt ikije ikana me etete ebi ene, mije, kpetap-nu ọmọ me mkpọn.

⁵Ebi akọn̄ ogwu Fero enenijibi akọn̄ inan̄a me Ijipiti isibi; mgbọ ebi Babilọn, ebi ìkpakpa mbin akọn̄ ikana Jeruselem enọbe etip ofolek ebi Ijipiti, ema enanan̄a itele Jeruselem.

⁶Okumugwem onenitumu inyi Jerimaya ibe:

⁷“Okumugwem, Awaji ebi Ijeren, ìtumu ibe ikeyi: Ìtumu ìnyi ogwu ubọọn̄ Juda, ogwu òria enyi inu me lek n̄a ibe eneweek eriọọn̄ ubọk inu okupbe, ibe, ‘Kpọ, ebi akọn̄ ogwu Fero cha ebi ìjijibi akọn̄ isibi inu ibenitap ubọk inyi enyi, mêgwu ikom ifo Ijipiti, ido kiban̄.

⁸Mgbọ ya, ebi Babilọn mênenigwu ikom inu initim akọn̄ me lek ama yi, mè ibọkọ, mè itap ukan̄ iwọp.’

⁹“Okumugwem ìtumu ibe ikeyi: Ikafiaan̄ lek kinyi, ìkibe, ‘Ebi Babilọn kpebelọlọ ijujuuk eji itele.’ Me atikọ, kpebejuuk enyi itele!

¹⁰Ìrere enyi etitim ikpan̄ otutuuk urum akọn̄ ebi Babilọn, ebi ìkitim enyi akọn̄ me lek, ebi ìsasak unan gaalek esisik me uwu ọfọ kiban̄, ebiba mêsibi inu initap ukan̄ iwọp ama yi.”

¹¹Mgbọ ebi akọn̄ ebi Babilọn ekpebebe lek inan̄a me Jeruselem mije enọbe ibe ke ebi akọn̄ ogwu Fero mêkinu,

¹²Jerimaya onanan̄a me Jeruselem ije ibosi agan̄ ebi Benjamin isi ibọkọ uche ijọn̄ kan̄ me etete ebi ene me agan̄ ya.

¹³Ire, mgbọ Jerimaya orebe otunchit Benjamin, ogwu ibot ebi mbem, ogwu ekigwen Yiriya, gwun̄ kè Selemeya, gwun̄ kè Ananiya, otetet Jerimaya mè ibe, “Îre ebi Babilọn ke owu obofiọọk isibi igọọk!”

¹⁴Jerimaya obebe, “Ataak! Ìkare ǹkifiọọk ikisibi igọọk ebi Babilọn.” Ire, Yiriya ìkagban̄. Itetet Jerimaya, mè isa inu me isi ebi ibot mkpulu.

¹⁵Ebi ibot cha enanaan̄ ejit me lek kè Jerimaya, mè inyi ida, esusulu ọmọ me njijan̄, mè isa ọmọ isi itap me mkpọn me uwu kè Jonatan ogwu uti ikpa, eyi ema esabe irọ uwu mkpọn.

¹⁶Etap Jerimaya me uwu mkpọn, me emen udọn̄ me ejit ijọn̄, ikukup me ere ya ifiin̄ mgbọ enenen.

¹⁷Ogwu ubọọn̄ Jedikaya oraria ibe esan̄a Jerimaya esibi esa enu me uwu kan̄. Mgbọ esabe inu, ogwu ubọọn̄ onwenween̄ lek ido ọmọ me nlelet ibe, “Ìre îkaan̄ ikọ Okumugwem otumube?” Jerimaya ofọfọọk ibe, “Iin̄. Mêyaka owu itap me ubọk ogwu ubọọn̄ Babilọn.”

¹⁸Jerimaya onenido ogwu ubọọn̄ Jedikaya ibe, “Mọmọ ijo inu nrọbe owu mè ebi ibot ikwaan̄ kwun̄ melek ebi ene chi, eyi enyi etetbe emi itap me mkpọn?

¹⁹Mọmọ ebi nriran kinyi cha ebi ìbeben nriran inyi enyi ibe, ‘Ogwu ubọọn̄ Babilọn ìkponu enyi akọn̄ me lek, ìkponunu si akọn̄ me inyọn̄ ijọn̄ yi?’

²⁰Mgbọ keyi, jei ogwu ubọọn̄ ogwukaan̄ n̄a, nye lek tele inyi m̀beek mbeek me isi kwun̄. Soso, karia emi ìkpọk ìfo uwu kè Jonatan ogwu uti ikpa, inyi nkakwu me ere ya.”

²¹Ogwu ubọọn̄ Jedikaya onyinyi ida ibe esun̄ Jerimaya me oyet egep ebi mbem ya, mè ekenyi fituru ònan̄a me lek oniin̄ ebi ìwọp fituru, owut ge ge me usen, mege otutuuk fituru òkup me emen ama òta òsan̄a kpai. Sa me ikeya ke Jerimaya onikup me oyet egep ebi mbem.