Read obolo Jeri 39 Bible Online

Jeri 39 - obolo bible

Jeri 39

¹Me òso acha onaan̄ge me lek mkpulu kè Jedikaya ogwu ubọọn̄ Juda, me òso akọp onyan̄ me acha ya, Nebukadineja ogwu ubọọn̄ Babilọn melek otutuuk urum akọn̄ kan̄, ejijibi akọn̄ inu me Jeruselem, mè inikpa mbin akọn̄ ikana ama ya.

²Me òso usen onaan̄ge me òso onyan̄ ini me òso akọp mè acha ge me lek mkpulu kè Jedikaya, ebi Babilọn ebubum mgban ama Jeruselem itibi.

³Otutuuk ebi ibot akọn̄ ogwu ubọọn̄ Babilọn eninin̄ inikweek irek me Otunchit Etete. Ema ìre: Nerigan Sareseri, mè Samigari Nebu, mè Sarisekim ogwu ibot ebi esan̄abe òsok, melek Nerigan Sareseri ilile ogwu ibot, mè otutuuk ebi ibot akọn̄ ogwu ubọọn̄ Babilọn kechilọ.

⁴Mgbọ Jedikaya ogwu ubọọn̄ Juda mè otutuuk ebi akọn̄ melek kan̄ emun̄be ife cha, ema eliliin̄. Ema enan̄a isibi me ama ya me eririeen̄, mè ije me oniin̄ uko ogwu ubọọn̄, isi itibi otunchit òkup me usọk mgban iba, mè itap ibot me agan̄ Araba.

⁵Ire, ebi akọn̄ Babilọn egọgọọk ema, mè isoon̄ Jedikaya me lek òla ijọn̄ Jeriko, mè itet ọmọ, mè isa ọmọ ijet Nebukadineja ogwu ubọọn̄ Babilọn me Ribila me agan̄ Amat. Nebukadineja ofefieek oyerebet inyi ọmọ.

⁶Me Ribila ya si ke ogwu ubọọn̄ Babilọn okpan̄ bọn ebirieen̄ kè Jedikaya me chieen̄ kan̄ gaalek, mè ikpan̄ si ebi ibot mkpulu ebi Juda,

⁷mè inirọkọ Jedikaya chieen̄ iba kan̄ isan̄a, mè inisa mkpọn ekwe igọbọ ọmọ ikam, inyi mêsabe ọmọ ifo Babilọn.

⁸Ebi Babilọn etatap ukan̄ iwọp uwu ogwu ubọọn̄ mè uwu ebi ene, mè igbugbọ mgban ama Jeruselem igwook.

⁹Nebujaradan ogwu ibot ebi akọn̄ ìkibem ogwu ubọọn̄, onenikpulu ebi ene ìsisik me emen ama ya, mè ebi ìkakana igọọk ọmọ, mè otutuuk ebi ene ebi ìsisik, isa ifo Babilọn me usun̄ akọn̄.

¹⁰Ire, Nebujaradan ogwu ibot ebi akọn̄ ìkibem ogwu ubọọn̄ otetele ebi ugbọọn̄, ebi kpekaan̄ inu geege, ibe ekup me ijọn̄ Juda, mè inyi ema uko gerep mè ijọn̄ uko me usen ya si.

¹¹Nebukadineja ogwu ubọọn̄ Babilọn oneninyi Nebujaradan, ogwu ibot ebi akọn̄ ìkibem ogwu ubọọn̄, ida ofolek lek kè Jerimaya, ibe:

¹²“Mọnọ ọmọ, mè kpọ ọmọ chieen̄ me lek. Kasak ọmọ unan geege me lek. Ire, inu geelek îbe owu òrọ, rọ ikeya si nyi ọmọ.”

¹³Nebujaradan, ogwu ibot ebi akọn̄ ìkibem ogwu ubọọn̄, mè Nebusajiban ogwu ibot ebi esan̄abe òsok, mè Nerigan Sareseri ilile ogwu ibot, mè otutuuk ebi ibot akọn̄ ogwu ubọọn̄ Babilọn kechilọ,

¹⁴eraria ene isi isan̄a Jerimaya isibi me oyet egep ebi mbem. Ema eyayaka ọmọ itap me ubọk kè Gedaliya gwun̄ kè Ayikam, gwun̄ kè Safan, ibe isa ifo uwu kan̄. Ikeya ke Jerimaya ogọọk iluk me etete ebi kiban̄.

¹⁵Mgbọ egonbe Jerimaya ikwek ibia me oyet egep ebi mbem ya, Okumugwem îtumu inyi ọmọ ibe:

¹⁶“Je si tumu nyi Ebedi-Melek ogwu Kus ibe, ‘Okumugwem Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: Kpọ, mânirọ ikọ n̄a ntumube ibak ama yi iso, ìbore me ùrioon̄, ìkpore me nnwọn. Me usen ya, ikọ ya môrọ iso me chieen̄ kwun̄.

¹⁷Ire, mânyan̄a owu me usen ya, kpebeyaka owu itap me ubọk ebi ife cha ebi owu okifieek owot me lek. Emi Okumugwem ntumu.

¹⁸Me atikọ, mânyan̄a owu; owu òkpokwu me otu oge akọn̄, ire, owu môsa ugwem kwun̄ ilibi inwọnọ, mije, owu otoon̄ emi ejit me lek. Emi Okumugwem ntumu.’ ”