Read obolo Jeri 40 Bible Online

Jeri 40 - obolo bible

Jeri 40

¹Mgbọ ekpulube ebi usun̄ akọn̄ me Jeruselem mè Juda ibesa ifon Babilọn, mîtet si Jerimaya igbaalek, melek mkpọn me ubọk egonbe. Mgbọ erebe Rama, Nebujaradan, ogwu ibot ebi akọn̄ ìkibem ogwu ubọọn̄ Babilọn, otọtọn̄ọ Jerimaya itele. Mgbọ îtọn̄ọbe itele isan̄a, Okumugwem otutumu ikọ melek kè Jerimaya.

²Ogwu ibot ebi ìkibem ogwu ubọọn̄ ya ìgwegwen Jerimaya isibi, mè itumu inyi ibe, “Okumugwem Awaji kwun̄ îtumu ibe ke ùrioon̄ yi môrọn̄ ikeme ama yi.

³Mgbọ keyi, Okumugwem îrọ si inyi inu ya irọ iso ubọk îtumube. Otutuuk inu chi ìsibi inyi enyi, mije, enyi mîrọ ijo inu ikeme Okumugwem, mè ijit igbagban̄ ikọ kan̄.

⁴Ire, kpọ, mgbọ keyi, mkpọk mkpọn isan̄a owu me ebek ubọk, mè itọn̄ọ owu itele. Ire ineme owu igọgọọk emi ifo Babilọn, na mè efo, ke mâkpọ owu chieen̄ me lek. Ire, ire ìkatat owu me lek igọgọọk emi ifo Babilọn, kanu. Kpọ otutuuk lek ijọn̄ ire eya me isi kwun̄, ere geelek òneneme owu, mè itat owu me lek isisi, je si ere keya.”

⁵Sabum Jerimaya onigwu ikom ifọọk ọmọ otu, Nebujaradan obebe: “Ire ineme owu, gwu kom si lek kè Gedaliya gwun̄ kè Ayikam, gwun̄ kè Safan, ogwu ogwu ubọọn̄ Babilọn osabe ito ogwu ibot mkpulu me otutuuk ama ebi Juda, mè gọọk ọmọ luk me etete ebi ene. Ire òkaweek ikeya, je nin̄ agan̄ geelek òtat owu me lek isisi.” Ogwu ibot ya oneniche inorie mè inyinyi inyi Jerimaya, mè itele ibe ifo.

⁶Jerimaya onenisi lek kè Gedaliya gwun̄ kè Ayikam me Mijipa, mè igọọk ikup me etete ebi ene ebi ìsisik me ijọn̄ ya.

⁷Otutuuk ebi ibot akọn̄ Juda ebi ìkup me oron melek ebi kiban̄ eneninọ ibe ke ogwu ubọọn̄ Babilọn îsa Gedaliya gwun̄ kè Ayikam ito ogwu ibot mkpulu me ido ya, mè ibe ikikpọ chieen̄ me lek ebirieen̄ mè ebibaan̄ mè nsabọn, òrere ebi ìgbọgbọọn̄ ichit me ido ya, ebi kpekpulu me usun̄ akọn̄ isa ifon Babilọn.

⁸Ema ebi ibot akọn̄ cha: Isimen gwun̄ kè Netaniya, mè Joyanan melek Jonatan bọn kè Kareya, mè Seraya gwun̄ kè Tanayumet, mè bọn kè Efayi ogwu Netofa, mè Jejaniya gwun̄ ogwu Maaka, ema mè ebi melek kiban̄ enunu me lek kè Gedaliya me Mijipa.

⁹Gedaliya gwun̄ kè Ayikam, gwun̄ kè Safan, oneninyan̄a ibot inyi ema mè ebi melek kiban̄ ibe, “Ikatet ukpook isisi ikwaan̄ inyi ebi Babilọn. Ìluk me lek ijọn̄ yi, mè ìsi ikwaan̄ ìnyi ogwu ubọọn̄ Babilọn, ke mônwọn me lek kinyi.

¹⁰Emi me lek n̄a mâluk me Mijipa, mè ikup me otuchieen̄ kinyi mgbọ ebi Babilọn isi inu me lek kiji. Enyi ìtitiin̄ miin̄ mè mfut mgbọ ura mè aran̄ ìtaak me ugọn̄ ìsun̄, mè ìluk me ama cha enyi ebọkọbe.”

¹¹Mgbọ otutuuk ebi Ju ìkup me Mowabu, mè ebi ìkup me etete ebi Amọn, mè ebi ìkup me Edọm, mè ebi ìkup me otutuuk ido geelek, enọbe ibe ke ogwu ubọọn̄ Babilọn îsik usini ebi Juda me lek ijọn̄ ya, mè isa Gedaliya gwun̄ kè Ayikam, gwun̄ kè Safan ito ogwu ibot mkpulu inyi ema,

¹²ema otutuuk ene enanan̄a me otutuuk ido cha eyiyalabe ema isi igwook ika inu ido Juda, mè inu me lek kè Gedaliya me Mijipa, mè inititiin̄ miin̄ mè mfut mgbọ ura owuwa owuwa.

¹³Joyanan gwun̄ kè Kareya mè otutuuk ebi ibot akọn̄ ìkup me oron eneninu me lek kè Gedaliya me Mijipa,

¹⁴mè initumu inyi ibe, “Ìre oriọọn̄ ijaan̄ lek ibe ke Bayalis ogwu ubọọn̄ ebi Amọn îria Isimen gwun̄ kè Netaniya ibe inikpan̄ owu?” Ire, Gedaliya gwun̄ kè Ayikam ìkachieek ikọ kiban̄.

¹⁵Joyanan gwun̄ kè Kareya oneninween̄ lek itumu inyi Gedaliya me nlelet me Mijipa ibe, “Soso, tele mè ǹsi m̀kpan̄ Isimen gwun̄ kè Netaniya. Ene geege ìkporiọọn̄. Ìbojeje inikpan̄ owu, inyi otutuuk ebi Juda ebi ìtititiin̄ ikana owu cha eyiyala, mè ebi Juda ebi ìsisik ejijit eta?”

¹⁶Ire, Gedaliya gwun̄ kè Ayikam otutumu inyi Joyanan gwun̄ kè Kareya ibe, “Karọ inu òkup keya! Inu ya okitumu ibak Isimen ìre ataak.”