Read obolo Jeri 41 Bible Online

Jeri 41 - obolo bible

Jeri 41

¹Me òso onyan̄ jaaba, Isimen gwun̄ kè Netaniya, gwun̄ kè Elisama, osasa akọp ene melek kan̄ inu me lek kè Gedaliya gwun̄ kè Ayikam me Mijipa. Isimen ìnan̄a me owot iman ebi ubọọn̄, mè ire ene ge me lek ebi ibot inyi ogwu ubọọn̄. Mgbọ ema egbaan̄be ikup ikirie inorie me ere ya,

²Isimen gwun̄ kè Netaniya melek akọp ene cha ebi melek kan̄ enanan̄a ikeke, mè isa oge akọn̄ ikeen̄ Gedaliya gwun̄ kè Ayikam, gwun̄ kè Safan, ikpan̄. Sa me ikeyi ke ema ekpan̄ ogwu ogwu ubọọn̄ Babilọn osabe ito ogwu ibot mkpulu me lek ijọn̄ ya.

³Isimen îkpan̄ si otutuuk ebi Ju ebi ìgọọk Gedaliya ikup me Mijipa, mè ikpan̄ otutuuk ebi akọn̄ ebi Babilọn ìkup si me ere ya.

⁴Me ofit iwele usen ekpan̄be Gedaliya, mgbọ ene geege ìkarọriọọn̄-nu,

⁵akọp ebirieen̄ jeeta ìkwọkwọkọ ifet irọt me otu, mè igwak ofọnti me lek kiban̄, mè isek lek kiban̄ ibak, enenan̄a me Sekem mè Silo mè Sameria ikibeme inyinyi mè nsensi me ubọk isa ikinu me Uwu Mbuban Okumugwem.

⁶Isimen gwun̄ kè Netaniya onanan̄a me Mijipa isibi, mè ikito ito, mè ikije ikweek ema. Mgbọ îchichinibe melek kiban̄, itutumu inyi ema ibe, “Ìna esi lek kè Gedaliya gwun̄ kè Ayikam.”

⁷Mgbọ ema ejebe inire ejit ama, Isimen gwun̄ kè Netaniya mè ebirieen̄ ebi melek kan̄ ekpakpan̄ ife cha, mè itọọn̄ nkwukwu kiban̄ itaak me emen udọn̄.

⁸Ire, akọp ene me lek ife cha enenibe Isimen, “Kakpan̄ eji! Eji mîkaan̄ ogbogbo akpa wit mè akpa balì melek aran̄ mè aran̄ akwọọk, echi eji eletbe me oron.” Eya orọ, itetele ema, ìkakpan̄ ema ìgbaalek ebi melek kiban̄ cha îkpan̄be.

⁹Udọn̄ ya eyi Isimen otọọn̄be nkwukwu ife cha îkpan̄be igbaalek kè Gedaliya itaak me emen ìre udọn̄ eyi ogwu ubọọn̄ Asa orọkọbe isa ifieek mgban ikwek Basa ogwu ubọọn̄ Ijeren. Udọn̄ ya ke Isimen gwun̄ kè Netaniya otap nkwukwu ene ijot.

¹⁰Isimen onenikpulu otutuuk ebi ene ìsisik me Mijipa me usun̄ akọn̄. Îkpulu bọn ebibaan̄ ogwu ubọọn̄ mè otutuuk ebi geelek ìsisik me ama ya, ebi Nebujaradan, ogwu ibot ebi ìkibem ogwu ubọọn̄, osabe Gedaliya gwun̄ kè Ayikam ito ibe ire ogwu ibot kiban̄. Isimen gwun̄ kè Netaniya ìkpukpulu ife cha me usun̄ akọn̄ isa igbaalek ije isaba ifo igọọk ebi Amọn.

¹¹Mgbọ Joyanan gwun̄ kè Kareya mè otutuuk ebi ibot akọn̄ melek kan̄ enọbe otutuuk ijo inu Isimen gwun̄ kè Netaniya orọbe,

¹²ema esasa otutuuk urum akọn̄ kiban̄ igbaalek ijibi akọn̄ igọọk Isimen gwun̄ kè Netaniya, mè inisoon̄ ọmọ me lek òkpuku mun̄ ile òkup me Gibiọn.

¹³Mgbọ otutuuk ebi Isimen okpulube cha emun̄be Joyanan gwun̄ kè Kareya mè ebi ibot akọn̄ ebi melek kan̄, ema ebebele ejit.

¹⁴Otutuuk ebi Isimen okpulube me usun̄ akọn̄ me Mijipa egwugwu ikom, mè ikana igọọk Joyanan gwun̄ kè Kareya.

¹⁵Ire, Isimen gwun̄ kè Netaniya mè ene jeeta me lek ebi kan̄, enwọnwọnọ me ubọk kè Joyanan, mè ilibi ifo igọọk ebi Amọn.

¹⁶Joyanan gwun̄ kè Kareya mè otutuuk ebi ibot akọn̄ melek kan̄, enenikpulu otutuuk ife cha ebi Isimen gwun̄ kè Netaniya okpulube me Mijipa mgbọ îkpan̄be Gedaliya gwun̄ kè Ayikam. Ife cha ìre ebi akọn̄, mè ebibaan̄, mè nsabọn, mè ebi ibot ikwaan̄ uwu ogwu ubọọn̄, ebi Joyanan osabe inan̄a me Gibiọn.

¹⁷Ema ejeje isi igba Gerut Kimiyam me agba lek ama Beteleyem me oniin̄ ije kiban̄ ifofo Ijipiti,

¹⁸inyi ema elibi enwọnọ ebi Babilọn. Ema ekifieek owot me lek ebi Babilọn bak me lek Isimen gwun̄ kè Netaniya okpan̄be Gedaliya gwun̄ kè Ayikam, ogwu ogwu ubọọn̄ Babilọn osabe irọ ogwu ibot mkpulu me inyọn̄ ijọn̄ ya.