Read obolo Jeri 43 Bible Online

Jeri 43 - obolo bible

Jeri 43

¹Mgbọ Jerimaya otumube otutuuk ikọ Okumugwem Awaji kiban̄ obe itumu inyi otuuk ebi ife cha isan̄a, ikọ cha echi îriabe ọmọ isi lek kiban̄ ibe isi itumu inyi,

²Ajariya gwun̄ kè Osaya mè Joyanan gwun̄ kè Kareya mè otutuuk ebi ugumu cha enenibe Jerimaya, “Owu ìre ene ataak! Okumugwem Awaji kiji ìkaria owu ibe owu ònotumu ibe eji ekasi Ijipiti ìsi ìluk me ere keya.

³Îre Baruk gwun̄ kè Neriya oria owu ito me isi, inyi owu òyaka eji òtap me ubọk ebi Babilọn, mè ekpan̄ eji, mè ìyaka ire, mè ekpulu eji me usun̄ akọn̄ esa efon Babilọn.”

⁴Eya orọ, Joyanan gwun̄ kè Kareya mè otutuuk ebi ibot akọn̄, mè otutuuk ebi ene ejijit ikọ Okumugwem, eyi îbe ema ekup me lek ijọn̄ Juda.

⁵Kpan̄asi ikeya, Joyanan gwun̄ kè Kareya mè otutuuk ebi ibot akọn̄, ekpukpulu otutuuk ebi Juda ìsisik cha, ebi ìnanan̄a me otutuuk ido geelek eyiyalabe ema isi igwook ika inu me ido Juda, isa ije.

⁶Ema esasa otutuuk ebirieen̄, mè ebibaan̄ melek nsabọn, mè bọn ebibaan̄ ogwu ubọọn̄, ebi Nebujaradan, ogwu ibot ebi akọn̄ ìkibem ogwu ubọọn̄ Babilọn, otelebe inyi Gedaliya gwun̄ kè Ayikam, gwun̄ kè Safan, igbaalek ije. Ema esasa si Jerimaya ogwu nriran melek Baruk gwun̄ kè Neriya igbaalek ije.

⁷Ema ekpakpaka ida ikọ Okumugwem, mè ije ifon Ijipiti isi ire ama Tapenes.

⁸Me Tapenes, Okumugwem onenitumu inyi Jerimaya ibe:

⁹“Me chieen̄ ebi Ju, teen̄ okpukpuk ewuuk òmimiin̄, mè kpulu fuun̄ me emen ibat ere ekiwọp okpungwu, òkup iriaak me otu isotu uwu ogwu ubọọn̄ Fero me Tapenes.

¹⁰Osirọ isan̄a, tumu nyi ema ibe, ‘Okumugwem, Awaji Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: Mâniria ikwaan̄ igwen ogwu ikwaan̄ n̄a, Nebukadineja, ogwu ubọọn̄ Babilọn; mâyik ogboon̄ ubọọn̄ kan̄ me inyọn̄ ewuuk chi mfuun̄be me ere yi; ọmọ môwewele ujuja okwukwek ubọọn̄ kan̄ ichit ere ewuuk cha okupbe.

¹¹Ọmọ isinu, môtim akọn̄ me lek ijọn̄ Ijipiti, mè ikpan̄ ebi mkpa okupbe inyi, mè ikpulu ebi usun̄ akọn̄ okupbe inyi isa ifo me usun̄ akọn̄, mè itap ebi otu oge akọn̄ okupbe inyi me otu oge akọn̄.

¹²Ọmọ môchim ukan̄ itap me lek uwu awaji ebi Ijipiti cha, mè iwọp uwu awaji cha ikọọk, mè iteen̄ awaji kiban̄ cha me usun̄ akọn̄ isa ifo. Ike ogwu òkpukpo arọọn̄ okijim iduk isan̄a me lek ofọnti kan̄, ikeya ke ọmọ môjibi ebi Ijipiti inọọn̄. Isirọ isan̄a, môneninan̄a ije si ifo me esuuk.

¹³Môgwak atà mbuban cha òkup me uwu awaji ura me ido Ijipiti, mè itap ukan̄ iwọp uwu awaji ebi Ijipiti kechilọ cha isan̄a.’ ”