Read obolo Jeri 46 Bible Online

Jeri 46 - obolo bible

Jeri 46

¹Eyi ìre etip Okumugwem ònunu inyi Jerimaya ogwu nriran ofolek ebi ido geelek.

²Etip ofolek Ijipiti: Ikọ Okumugwem otumube ofolek ebi akọn̄ kè Neko ogwu Fero, ogwu ubọọn̄ Ijipiti, ebi Nebukadineja ogwu ubọọn̄ Babilọn otimbe akọn̄ ikpan̄ me Karekemis me agba okwaan̄ Yuferetis me òso acha ini me lek mkpulu kè Jioyakim, gwun̄ kè Josaya ogwu ubọọn̄ Juda, ìre ikeyi:

³“Ìnen̄e agbọ ile kinyi mè agbọ ija kinyi ìsun̄, mè ìjibi akọn̄ ìsibi ìna!

⁴Ìtobo olik me lek inyinya kinyi, ebi akọn̄ inyọn̄ inyinya enene! Ìmọnọ irek kinyi, mè okpibot akọn̄ me ibot! Ìwat otunwa kinyi ìreke, mè ìkpulu nroon̄ akọn̄ kinyi ìkwaan̄ me lek!

⁵Keke ke nkimun̄? Ukpook îtet ema, ema mêkikpebe inyi udun̄, mîtim ikpan̄ ebi unye kiban̄. Ekot înin̄ ema ukot iraak iraak, kpeyaka chieen̄ me udun̄, ukpook îkana ichit ema lek, me agan̄ geelek! Emi Okumugwem ntumu.

⁶“Ebi mfufet ukot kpeyaka ikọt ilibi ekot, ebi unye kpeyaka ikọt inwọnọ. Me agan̄ inyọn̄, me agba okwaan̄ Yuferetis ke ema ekigbugbe, mè ikirurọn̄ọ.

⁷“Ekene ire eyi òkibaak iwuku kubọk mun̄ okwaan̄ Nali, kubọk owuwa okwaan̄ unye ukot mun̄ okigbuk me emen?

⁸Ijipiti òkibaak iwuku kubọk mun̄ okwaan̄ Nali, kubọk owuwa okwaan̄ unye ukot mun̄ okigbuk me emen. Ìkitumu ibe: ‘Mâbaak iwuku imeen̄ linyọn̄; mâjijaka ama mè ebi ìluk me emen kiban̄.’

⁹Ebi kè inyinya, ìlibi ìnin̄; ebi uji akọn̄, ìkọp iraak iraak ìtap ibot! Enyi ebi usọ akọn̄, ìjibi ìnin̄; enyi ebi Kus mè ebi Put ebi ìkibeen̄ agbọ, mè ebi Lidia ebi ìkisook ogbaan̄.

¹⁰Ire, usen ya ìkup inyi Ogwukaan̄-ene, Okumugwem Ogwukaan̄ Inyọn̄ mè Ijọn̄. Îre usen useen̄, usen ìborọ ebi ochicha kan̄ useen̄. Oge akọn̄ môrie, mè irie mege owot òjot, mônwọ eje kiban̄, mè inwọ mege ebek osuuk. Mije, Ogwukaan̄-ene, Okumugwem Ogwukaan̄ Inyọn̄ mè Ijọn̄, môgwa ngwugwa me lek ijọn̄ agan̄ inyọn̄, me agba okwaan̄ Yuferetis.

¹¹“Je si Giliadi si bọkọ ugwun̄, jei Ijipiti, òkup kubọk obaak enenwaan̄. Owuwa ugwun̄ owu okititen̄e cha ìre inu ikike, igwagwa ìkakup ìnyi owu.

¹²Ebi ofifi ido mênọ esip òtetet owu, etip ito kwun̄ môtaan̄ iso otutuuk linyọn̄. Ogwu usọ akọn̄ ge môlibi itoon̄ ofifi ogwu usọ akọn̄, ema ene iba mêgbagbaan̄ inan̄a irọn̄.”

¹³Ikọ Okumugwem otumube inyi Jerimaya ogwu nriran ofolek inunu akọn̄ eyi Nebukadineja ogwu ubọọn̄ ebi Babilọn mônube initim akọn̄ me Ijipiti ìre ikeyi:

¹⁴“Ìtumu ìnyi me Ijipiti, mè ìlook me Migidọn; ìlook si me Memfis[27] mè Tapenes ibe: ‘Ìmọnọ irek kinyi, mè ìbem lek, mije, oge akọn̄ òkirie ebi ìkakana enyi okokop.

¹⁵Keke orọ mêdabe ebi unye kinyi imaan̄? Ema kpebekọt ikeke, mije, Okumugwem môda ema itọbọ ito.

¹⁶Ema ebekpọkpọ ikitọbọ ukot inan̄a irọn̄; me ikirurọn̄ọ, ge me inyọn̄ ge.’ Ema mêkitumu ibe, ‘Nan̄a keke, mè eji egwu ekom efon lek ebi kiji, mè ijọn̄ iman kiji, inyi eji enan̄a me otu oge akọn̄ ogwu òtutuku ene.’

¹⁷Ere keya ke ema etaan̄ ukpo: ‘Fero ogwu ubọọn̄ ebi Ijipiti ìkinyi okput ikike; mgbọ esun̄be inyi ọmọ îkwala ọmọ me ubọk.’

¹⁸Kè lek ugwem n̄a, ene ge òkinu, ogwu òbene kubọk ogoon̄ Tabọ me etete ebi kè ogoon̄, mè ibene kubọk ogoon̄ Kamen me agba okwaan̄. Emi ogwu ubọọn̄ ntumu, emi ogwu erieen̄ kan̄ orebe Okumugwem Ogwukaan̄ Inyọn̄ mè Ijọn̄.

¹⁹Enyi ebi ìluk me Ijipiti, ìtitiin̄ nroon̄ uwu kinyi, ke enyi mêninin̄ usun̄ akọn̄, mije, mêjijaka Memfis ikana ǹrioon̄, mè ere ukpọk ukpọk, ere ebi ene kpêlukbe.

²⁰“Ijipiti ìre ujuja uman gwun̄ eriembuuk, ire, nson òkitaka anam òkinan̄a me agan̄ inyọn̄ inu me lek kan̄.

²¹Ebi akọn̄ ebi ọkọ cha ìkup me etete kiban̄, ebet lek eriembuuk egwookbe imiin̄ ufuk. Ema si mêgwu ikom igbaan̄ ililiin̄; kpebekọt ikeke ida, mije, usen ùrioon̄ òkinu inyi ema, mgbọ ema mêbọkọbe osusut.

²²Ebi Ijipiti mêsan̄a amọn mbuuk mbuuk kubọk ijijinu òkililibi, me mgbọ ogwu ochicha okinu me unye; ema mêbeen̄ otuban isa inu ọmọ me lek, kubọk ebi ìkichon uti.

²³Ema mêchon oron Ijipiti igbugbọ igwook, ubọk geelek oron ya ominbe aka ire, mije, ebi ìkinu cha mîwa igak akaka ituuk, kpebekọt ifuk otu ifuk kiban̄. Emi Okumugwem ntumu.

²⁴Esip môtet ebi Ijipiti, mîyaka ọmọ itap me ubọk ebi agan̄ inyọn̄.”

²⁵Okumugwem Ogwukaan̄ Inyọn̄ mè Ijọn̄, Awaji ebi Ijeren, ìbe: “Mânisulu Amọn, awaji ebi Tebes[28] osusut, mè isulu ogwu Fero, mè ebi Ijipiti melek awaji kiban̄ cha, mè ebi ubọọn̄ kiban̄, mè otutuuk ebi geelek ìsa ogwu Fero itoon̄ ejit.

²⁶Mâyaka ema itap me ubọk ebi ìkiweek ebek ugwem kiban̄, mè ubọk kè Nebukadineja ogwu ubọọn̄ Babilọn, mè ubọk ebi ibot akọn̄ kan̄. Ire, me mgburudun̄, ebi ene mêluk me Ijipiti kubọk elukbe mgbọ òraraka. Emi Okumugwem ntumu.

²⁷“Eya orọ, Jekọp gwun̄ ikwaan̄ n̄a, kafieek owot, owu Ijeren, katet ukpook. Emi m̀kpalọlọ inyanyan̄a owu isibi me ujọn̄ọ ere, mè inyan̄a ebi owot iman kwun̄ me ido ere ema ekupbe me usun̄ akọn̄. Jekọp môneniyaka ikpọk ikaan̄ esuuk mè utelelek, kpunu ogwu òborọ ọmọ ifieek owot.

²⁸Owu, Jekọp gwun̄ ikwaan̄ n̄a, kafieek owot, mije, emi òwa melek kwun̄. Mâjijaka otutuuk ido cha ere nyiyalabe enyi itọọn̄ itap, isan̄a kpai. Ire, m̀kpajijaka enyi isan̄a kpai. Kpan̄asi ikeya, mâsulu enyi osusut ubọk ònenen; m̀kpatele enyi eje uluk uluk ikeya. Emi Okumugwem ntumu.”