Read obolo Jeri 49 Bible Online

Jeri 49 - obolo bible

Jeri 49

¹Ofolek ebi Amọn, Okumugwem ìtumu ibe ikeyi: “Ìre Ijeren ìkakaan̄ bọn ebirieen̄? Ìre ìkakaan̄ ebi ìberie ìrot kan̄ ni? Keke orọ eyi Molek onibọkọ Gadi ikaan̄? Keke orọ ebi ìkifaka Molek eniluk me ama ebi otoko kè Gadi?

²Ire, usen òkinu, mgbọ mâtikibe akọn̄ me Raba, ama ebi Amọn; ama ya môkakana okpurukpu ǹrioon̄, ukan̄ môkekisak me asabọn ama cha òkukup ikana ọmọ. Mgbọ ya, ebi mgbọ ìrerieen̄ Ijeren isibi cha, Ijeren mônenirieen̄ ema si isibi. Emi Okumugwem ntumu.

³Enyi ebi ama Esibon, ìto ito, mije, mîjijaka Ai isan̄a! Jei, bọn ebibaan̄ Raba, ìtaan̄ ukpo ma! Ìkwun ekwut ufieejit, mè ifieek ejit; ìliliin̄ ìnyi isi mè udun̄ me emen mgban ama, mije, Molek mônin̄ me usun̄ akọn̄, igbaalek ebi ngwugwa kan̄ mè ebi ibot ikwaan̄ kan̄.

⁴Keke orọ okisa iteke kwun̄ cha igugo lek, mè ikigugo lek ibe ke iteke cha mikisibi mfut? Owu ogwu òkup kubọk gwun̄ enenwaan̄ isi ìkakikeke, owu òkisa inu ubọọn̄ kwun̄ itoon̄ ejit, mè ikibe, ‘Ìre ekene obonu initim emi akọn̄ me lek?’

⁵Mânitap owu uga ukpook me lek, eyi mônan̄abe me lek otutuuk ebi ìluluk ikana owu. Mêrieen̄ enyi otutuuk ene isibi, kpunu ene geege òbokup ikitet ebi teeteek cha ititiin̄. Emi Okumugwem Ogwukaan̄ Inyọn̄ mè Ijọn̄ ntumu.

⁶“Ire, me mgburudun̄, mâsa ebi Amọn ebi ekpulube me usun̄ akọn̄ ika, mè ikpọk inyi ema irek kiban̄ me mgbọ òkup me isi. Emi Okumugwem ntumu.”

⁷Ofolek ebi Edọm, Okumugwem Ogwukaan̄ Inyọn̄ mè Ijọn̄ ìtumu ibe ikeyi: “Ìre iriọọn̄-inu ìkayaka ìkup me Teman ni? Sà ìre nteme îta me otu ebi ìkigobo inu itet? Sà ìre iriọọn̄-inu kiban̄ îyiyala ichep mọnọ?

⁸Enyi ebi ìluk me Dedan, ìgwu ìkom, mè ìlibi ìsi ìlet me emen ǹkororok òdọdọk, mije, mâsa ùrioon̄ initoon̄ bọn kè Isọ mgbọ mbanyi ema osusut.

⁹Ebi ìkigbeme gerep isikigbeme gerep, ekekitele usini gerep me lek olik gerep. Ebi inọ isinu uwu ene me eririeen̄, ekichiin̄ inu ema ekọtbe ichiin̄ gaalek.

¹⁰Ire, emi m̀bakwọkwọọk Isọ irak; ere geelek îkilet, mbaweweek imun̄, inyi ikakọt ìlet lek kan̄. Nsabọn kan̄, mè ebi ulọk kan̄, mè ebi melek kan̄ mêkwaan̄ ita, ọmọ ìkaboyaka ikup.

¹¹Ìtele bọn kpà-nte kinyi, emi mâsun̄ ema me ugwem; ebi nwakpa kinyi ebesa emi itoon̄ ejit.”

¹²Mije Okumugwem ìtumu ibe ikeyi: “Ìkpọ, ire ebi kpetip oyerebet inwọ inu ònan̄a me emen ekpen̄ osusut ya, ìre enyi mêje ikike ifo, kpebọkọ osusut ni? Enyi kpebeje ikike ifo, enyi ekaan̄ inwọnwọ inu ònan̄a me emen ekpen̄ osusut ya.

¹³Nsa lek n̄a inyan̄a ibot, ibe ke ama Bojira môkana ǹrioon̄, mè inu urimi, mè inu esip, mè inu ifieek-otu. Asabọn ama kiban̄ geelek môkana ǹrioon̄ ire mgbọ geelek. Emi Okumugwem ntumu.

¹⁴“Nnọ etip Okumugwem oriabe inu: Mîria ogwu otuchieen̄ ido isi lek ebi ido geelek, ibe isi ilook ibe, ‘Ìtitiin̄ lek kinyi, inyi ejibi akọn̄ esi ama ya! Ìnan̄a ìkeke ìsi ìtim akọn̄!’

¹⁵“Mânigele owu isiki me etete ebi ido geelek; ebi ene mênenikikpọ owu chieen̄ isiki.

¹⁶Ukpook kwun̄ ya òkitet ebi ene, mè ugumu òkup owu me ejit, îtap owu ebot, owu ogwu òluk me emen agbagba ewuuk, mè ikup me ubene ubene inyọn̄ ibot orioon̄. Ikerere ònama uwu kwun̄ me inyọn̄ ubene ogoon̄ kubọk igo, emi m̀basasan̄a owu me ere ya ito me ijọn̄. Emi Okumugwem ntumu.

¹⁷Edọm môkana inu urimi; otutuuk ebi mêjebe iraka, mêriki, mè ifiọọk, bak me lek otutuuk unan òsasak me lek kan̄.

¹⁸Ike egbugbọbe ama Sodọm mè ama Gomora melek ama òkukup ikana ema cha, ikeya si, ene geege ìkpoluk me Edọm, gwun̄ ebilene ge ikeyi ìkpoyaka ikup me emen. Emi Okumugwem ntumu.

¹⁹Ike egbe àtat okinan̄a isibi me ekpuk oron me agba okwaan̄ Jodan, igọọk anam me lek ijọn̄ ere mbubet ikpukpo anam ìkakinan, ikeya si, emi mârieen̄ Edọm isan̄a me lek ijọn̄ kan̄ mgbọ yaage. Ekene ke egobo, ogwu mâyakabe ikwaan̄ yi itap me ubọk? Ekene obet lek n̄a? Sà ìre ekene obokọt itọ emi ubọk me isi? Ìre kpasi ogwu òkpukpo arọọn̄ obokọt ikeke ida emi?

²⁰Eya orọ, ìgban̄ inu Okumugwem otọtbe ibak Edọm, ìgban̄ inu îdọmọbe ofolek ebi ìluk me Teman: Me atikọ, mêdut arọọn̄ echi asasa me lek urum arọọn̄ isa ije; me atikọ, mêjijaka ijọn̄ urie anam kiban̄ isan̄a mije kiban̄.

²¹Ida okput irọn̄ kiban̄ môsisik linyọn̄, ida ukpo kiban̄ môtaan̄ isi igwook me okwaan̄ Anyiaan̄.

²²Ìkpọ! Ogwu ochicha môwulu isiki inu kubọk igo, mè ijibi akọn̄ inin̄ Bojira, kubọk igo osa uwop ikana ichit. Me usen ya, ebi usọ akọn̄ ido Edọm cha mêfieek owot kubọk enenwaan̄ uman okitet.”

²³Ofolek Damasikọs, Okumugwem ìtumu ibe ikeyi: “Esip îtet ebi ama Amat mè ebi ama Aripadi, mije, ema mîbọkọ ijo etip. Ejit kiban̄ îrọ ema fiiọọ; kubọk efet ogbururu onin̄ okwaan̄, ema kpebekọt ikaan̄ utelelek.

²⁴Lek îwọ ama Damasikọs, îgwu ikom ilibi inan̄a, nyanya înin̄ ọmọ lek enenen; ufieek-owot mè ufiak îkeme ọmọ, kubọk ufiak uman otet enenwaan̄.

²⁵Keke orọ mè ama òtaan̄ etip ikayat ìta, ama òkinyi emi unwọọn̄?

²⁶Eya orọ, nsabọn irieen̄ kan̄ mêrurọn̄ọ me lek oniin̄; otu môchit otutuuk ebi akọn̄ kan̄ me usen ya. Emi Okumugwem Ogwukaan̄ Inyọn̄ mè Ijọn̄ ntumu.

²⁷Mâchim ukan̄ itap me lek mgban ama Damasikọs; ukan̄ môtataka uwu ogwu ubọọn̄ Ben-Adadi ikọọk.”

²⁸Ofolek Keda mè ijọn̄ ubọọn̄ ebi Asọru, eyi Nebukadineja ogwu ubọọn̄ ebi Babilọn otimbe ikpan̄, Okumugwem ìtumu ibe ikeyi: “Ìnan̄a ìkeke ìsi akọn̄ me Keda, mè ìjijaka ebi agan̄ mbum-ura ìsan̄a.

²⁹Mêkpulu uwu ọfọ kiban̄ mè arọọn̄ kiban̄; mè ikpulu ekwut mgban kiban̄ igbaalek ije, mè otutuuk nroon̄ uwu kiban̄ mè aligọ kiban̄. Ebi ene mêkitaan̄ ukpo ibe ema, ‘Uga ukpook îkana enyi me agan̄ geelek!’

³⁰“Enyi ebi ìluk me Asọru, ìgwat lek ìlibi ìjọn̄ọ ere! Ìsi ìlileek me emen ǹkororok òdọdọk. Nebukadineja ogwu ubọọn̄ ebi Babilọn îtọt otitọt ikeme enyi, îkaan̄ ijo nkeek ikeme enyi. Emi Okumugwem ntumu.

³¹“Ìnan̄a ìkeke ìsi akọn̄ me lek ido ya òkup me utelelek, mè ikiluk me ukarajit, ido ya eyi ìkakaan̄ otunchit, ìkakakaan̄ si olọkọrọ ekisa igon, ido ya eyi òkiluk ọmọ gaalek. Emi Okumugwem ntumu.

³²Aligọ kiban̄ môre inu efufum me akọn̄, owuwa urum eriembuuk kiban̄ cha môkana inu ekpukpulu me akọn̄. Mâyiyala ebi ìkikwọkọ ijeek isan̄a me agba isi, mâyiyala ema ifon agan̄ geelek me linyọn̄, mè isa ùrioon̄ initoon̄ ema me agan̄ geelek. Emi Okumugwem ntumu.

³³Asọru mônenikana ere ibo oron afa okiluk, mè ere òyayat ita ire mgbọ geelek. Ene geege ìkpoluk me ere ya, gwun̄ ebilene ge ikeyi ìkpokup me emen kan̄.”

³⁴Me ibebene mkpulu kè Jedikaya ogwu ubọọn̄ Juda, Okumugwem îtumu ikọ inyi Jerimaya ogwu nriran ofolek Elam ibe:

³⁵Okumugwem Ogwukaan̄ Inyọn̄ mè Ijọn̄ ìtumu ibe ikeyi: “Ìkpọ, mânifan̄a ogbaan̄ ebi ido Elam, òrere ibot ibot inu ema esabe ikinye lek.

³⁶Mâria ebi ochicha inan̄a me agan̄ ini eyi linyọn̄ inu, inyi enetim akọn̄ me lek ido Elam; mâyiyala ema itap me agan̄ ini eyi linyọn̄; ido ge ikeyi ìkposik, eyi ebi Elam kpênin̄be me usun̄ akọn̄.

³⁷Mâkpukpuku ebi Elam igwook me isi ebi ochicha kiban̄, mè isi ebi ìkiweek ebek ugwem kiban̄; mâsa ùrioon̄ initoon̄ ema, òrere uyok uyok unaan̄-ejit n̄a. Mâsa oge akọn̄ ililaba ema, mege mâkpan̄be ema isan̄a kpai. Emi Okumugwem ntumu.

³⁸Mâyik ogboon̄ ubọọn̄ n̄a me Elam, mè ijijaka ogwu ubọọn̄ Elam mè ebi ibot mkpulu kan̄. Emi Okumugwem ntumu.

³⁹Ire, me mgburudun̄ mgbọ, mâsa ebi Elam ekpulube me usun̄ akọn̄ ika, mè ikpọk inyi ema irek kiban̄ me mgbọ òkup me isi. Emi Okumugwem ntumu.”