Read obolo Jeri 5 Bible Online

Jeri 5 - obolo bible

Jeri 5

¹“Ìjijen̄e ìkana lek oniin̄ geelek me Jeruselem, ìkpọ ìkana lek oniin̄ cha, mè ìkeek-nu; ìweek ìkana me oyet ile kan̄ geelek. Ire enyi ikọt imun̄ ene ge kpọi ogwu òkirọ inu ònenen, mè ikiweek atikọ, mâtele ijo inu ama yi orọbe inyi ama yi.

²Ubọk geelek ema ekibe, ‘Kè lek ugwem Okumugwem,’ inyan̄a-ibot kiban̄ ìkire ofiaan̄.”

³Jei Okumugwem, ìre ìkare atikọ ke chieen̄ kwun̄ okiweek ni? Owu osulu ema, ire, ema kpenọ unan; owu okpukpuku ema igwook, ire, ema kpechieek ibe enen̄e ema esun̄. Ema mîtet ejit kiban̄ inye igak ewuuk, mè ijit igwugwu ikom.

⁴Emi nnenibe, “Ife chi ìre gaalek ebi ugbọọn̄; ema ìre ebi mbubut, mije, ema kperiọọn̄ oniin̄ Okumugwem, kperiọọn̄ inu Awaji kiban̄ okiweek.

⁵Eya orọ, mâsi lek ebi ilile kiban̄, mè ikpa melek kiban̄; mije, ema mîriọọn̄ oniin̄ Okumugwem, mè iriọọn̄ inu Awaji kiban̄ okiweek.” Ire, ebibi si mîgbaan̄ ubọk ijit Awaji kiban̄, mè ijit si igbagban̄ utọn̄ inyi ọmọ.

⁶Eya orọ, egbe àtat mônan̄a me oron inichiin̄ ema ikpan̄; ibo oron mônan̄a me emen èwê inigwak ema iche; egbe ntọọk ntọọk môtutuun̄ ikup me otunchit ama kiban̄ geelek; ogwu inan̄a isibi oyet, îra ichim itaka. Mije, inu ikpak kiban̄ îwa enenen, ikeya ke ema ejit emi itele owuwa mgbọ.

⁷“M̀bajeje itele inu yi inyi enyi? Bọn kinyi mîjit emi itele, mè ikisa awaji echi kperere awaji inyan̄a ibot. Nnyi ema inorie, ema ererie ijot owot, mè ikigbọọk ikana ere ikisi ugan me uwu ebi òje oyet.

⁸Ema ekup kubọk orie inyinya òrerie inorie ijot owot, ogwu ikup, îra ikigọt kubọk inyinya isi lek nwa ofifi ene.”

⁹Okumugwem ìkido ibe, “Mbet ido òkup ikeyi, ìre kpamasulu ema osusut ni? Ìre kpamarọ ema useen̄ inu ema erọbe ni?

¹⁰“Ìje ìkana emen uko gerep kiban̄, mè ìjijaka uko cha, ire, ikajijaka ìsan̄a isi ge. Ìsọp otu agọọk kan̄ geelek ìsan̄a me lek olik gerep cha, mije, ìkare Okumugwem okaan̄ otu agọọk kecha.

¹¹Me atikọ, ebi uwu kè Ijeren mè ebi uwu kè Juda mîfiaan̄ emi ofiaan̄ enenen. Emi Okumugwem ntumu.”

¹²Ema mîkan̄ ataak ibak Okumugwem ikibe, “Ìkporọ inu geege! Unan geege ìkpore eji lek; eji kpebemun̄ oge akọn̄, mè ìre akan̄ inorie.

¹³Ebi nriran kiban̄ ìre efet ikike, ikọ Awaji kpunu me otu kiban̄. Inu ema ekibe môrọ ya, ìborọ ikeme ema gaalek.”

¹⁴Eya orọ, Okumugwem Ogwukaan̄ Inyọn̄ mè Ijọn̄ ìtumu ibe ikeyi: “Mije ife chi etumube ikọ chi, emi mârọ inyi ikọ n̄a ire ukan̄ me otu kwun̄; ife chi mênenire iye, ukan̄ ya môtataka ema iriọk.”

¹⁵Okumugwem ìbe, “Enyi ebi uwu kè Ijeren, ìkpọ, mânisa ido ònan̄a me ujọn̄ọ ere inu enyi akọn̄ me lek. Îre ido ònyenye lek, mè ire ido òkukup akarake akat; enyi kperiọọn̄ usem ebi ido ya, enyi kpebekọkọt si inọ ikọ ema ekitumu.

¹⁶Otu akpa oraan̄ kiban̄ ìlaak òbook, kubọk otu udọn̄-ufuun̄, ema otutuuk ìre ebi usọ akọn̄.

¹⁷Ema mêkpulu inu òsibi me uko kinyi imeen̄, mè irie inorie kinyi isan̄a kpai, mè ikpaan̄ bọn kinyi ebirieen̄ mè ebibaan̄ isan̄a; ema mêkpan̄ urum eriembuuk mè urum arọọn̄ kinyi isan̄a, mè ijijaka olik gerep kinyi isan̄a. Ema mêsa oge akọn̄ igwak ama mgban cha enyi esabe itoon̄ ejit isan̄a kpai.

¹⁸“Okumugwem ìbe: ‘Ikerere me mgbọ ya si, emi m̀kpajijaka enyi isan̄a isi ge.’

¹⁹Ire ebi ene ido ibe, ‘Ìre bak me lek keke ke Okumugwem Awaji kiji orọ eji inu keyi?’ Owu môtumu inyi ema ibe ke emi m̀be, ‘Ike enyi ejitbe emi Okumugwem itele, mè ikiriaak ofifi awaji me inyọn̄ ijọn̄ kinyi, ikeya si, enyi mêsi ikisi ikwaan̄ inyi ebi ofifi ife me inyọn̄ ijọn̄ ikarege eyi kinyi.’

²⁰“Ìtumu inu yi ìnyi ebi uwu kè Jekọp, mè ìlook si me ido Juda ìbe:

²¹Ìgban̄ ikọ keyiyi, enyi ebi mbubut mè ebi tuntun, enyi ebi ìkaan̄ chieen̄, ire, kpekimọọn̄ inu, ebi ìkaan̄ utọn̄, ire, kpekinọ ikọ.”

²²Okumugwem ìbe, “Ìre ìkagbe ibe ukpook n̄a itet enyi? Ìre ìkagbe ibe enyi ekeran me isi n̄a? Îre emi nsa okpoon̄ itap okike inyi okwaan̄, mè inyi ikan ibe ikaraka okike ya, mege ire mgbọ geelek. Ekoon̄ geelek môtọbọ inibieen̄, ire, ìkpokọt isaba iraka; môgbugbut, ire, ìkposaba okike ya.

²³Ire, ife chi ekaan̄ ejit mkpaka-ibot mè unye-ibot; ema mîgwu ikom, mè ije inan̄a.

²⁴Ema kpekitumu me ejit kiban̄ ibe, ‘Eji etet ukpook me lek Okumugwem Awaji kiji, ogwu òkinyi eji ibot òta ura mè ibot aya otu ura me ibot mgbọ kiban̄, mè ikirọ inyi nde irọrọkọ uko ikakikwala ìraka eji.’

²⁵Nrọ-nlọ kinyi olap inu chi isan̄a enyi me lek, ijo inu kinyi orọ ibe ata inu ilọ enyi.

²⁶“Ebi ikpak òwa me etete ebi n̄a; ema ekilileek kubọk ebi ìkitip ufe ofut, ema ekikọọk ufe iban ene.

²⁷Ike ofut ojotbe emen uwu itap ofut, ikeya ke ofiaan̄ ojot uwu kiban̄; ema esasa me ikeya inin̄ ubọọn̄, mè ikaan̄ unye,

²⁸mè imiin̄ ufuk, mè ijot. Ijo irọrọ kiban̄ ìkakaan̄ okputut; ema kpekikeke ebi kpà-nte me udun̄, inyi ikọ inwọn ebiba, kpekigbini si unen ebi ugbọọn̄.”

²⁹Okumugwem ìkido ibe, “Mbet ido òkup ikeyi, ìre kpamasulu ema osusut ni? Ìre kpamarọ ema useen̄ inu ema erọbe emi ni?

³⁰“Inu òrọrọ me lek ijọn̄ yi îkaan̄ nriki, mè ikaan̄ urimi me lek:

³¹Ebi nriran ekiben nriran ataak, ebi ngwugwa ekikpulu ebi ene me unye eyi kiban̄; ikeyi ke ebi n̄a ekima. Me òta kan̄, keke ke enyi eberọ?