Read obolo Jeri 52 Bible Online

Jeri 52 - obolo bible

Jeri 52

¹Jedikaya ìre akọp acha iba mè ge mgbọ îkanabe ogwu ubọọn̄, mè ikup me Jeruselem ikpulu akọp mè acha ge. Erieen̄ ogwu uga ìre Amutali, gwun̄ kè Jerimaya ogwu Libina.

²Jedikaya orọrọ ijo inu me chieen̄ Okumugwem, kubọk Jioyakim orọbe si.

³Îre mije unaan̄-ejit Okumugwem ke otutuuk inu chi osibi inyi Jeruselem melek Juda. Òta kan̄, Okumugwem orerieen̄ ema isan̄a me isi kan̄. Jedikaya onenikpaka ibot inyi ogwu ubọọn̄ Babilọn.

⁴Eya orọ, me òso akọp usen me òso akọp onyan̄ me òso acha onaan̄ge me lek mkpulu kè Jedikaya, Nebukadineja ogwu ubọọn̄ Babilọn osasa otutuuk urum akọn̄ kan̄ ijibi akọn̄ inu me Jeruselem. Ema eneninama obubot mbin akọn̄ ichak me lek mgban ama ya ikat ikana okokop.

⁵Ema mîkpa mbin akọn̄ ikana ama ya mege ire òso akọp mè acha ge me lek mkpulu ogwu ubọọn̄ Jedikaya.

⁶Me òso usen onaan̄ge me òso onyan̄ ini kan̄, akan̄ onyenye me emen ama ya enenen ire lek kpunu inorie ebi ene eberie.

⁷Ebi akọn̄ Babilọn enenibum ere ge me lek mgban ama ya itibi. Ire, mije ebi akọn̄ Babilọn egbanbe ikana ama ya okokop, otutuuk ebi akọn̄ ìkup me emen ama ya ekukup ire eririeen̄, mè inilim me eririeen̄ ya itibi me otunchit òkup me ibot usọk mgban iba, me agba lek uko ajakajak ogwu ubọọn̄, mè ilibi ifo agan̄ iteke Jodan.[36]

⁸Ire, ebi akọn̄ Babilọn egọgọọk ogwu ubọọn̄ kiban̄, Jedikaya, mè isoon̄ ọmọ me òla ijọn̄ Jeriko. Otutuuk ebi akọn̄ kan̄ elilim iyat itele ọmọ.

⁹Ebi akọn̄ Babilọn etetet ọmọ, mè isa ijet ogwu ubọọn̄ Babilọn me Ribila me agan̄ Amat, ifefieek oyerebet itip ọmọ.

¹⁰Me Ribila ya si ke ogwu ubọọn̄ Babilọn okpan̄ bọn ebirieen̄ kè Jedikaya me chieen̄ kan̄ gaalek, mè ikpan̄ si ebi ibot mkpulu ebi Juda,

¹¹mè inirọkọ Jedikaya chieen̄ iba kan̄, mè inisa mkpọn ekwe igon ọmọ ikam, mè isa ọmọ ifo Babilọn isi itap me mkpọn mege ire usen îkwube.

¹²Me òso akọp usen me onyan̄ go, me òso akọp mè acha onaan̄ge me lek mkpulu kè Nebukadineja ogwu ubọọn̄ Babilọn, Nebujaradan, ogwu ibot ebi akọn̄ ìkibem ogwu ubọọn̄, òkisi ikwaan̄ inyi ogwu ubọọn̄ ebi Babilọn, onunu me Jeruselem,

¹³mè initap ukan̄ iwọp Uwu Mbuban Okumugwem, mè uwu ogwu ubọọn̄, mè otutuuk uwu geelek me Jeruselem. Uwu geelek òsisibi isi, ìwọwọp iriọk.

¹⁴Otutuuk urum akọn̄ ebi Babilọn, ebi ìgọgọọk ogwu ibot ebi ìkibem ogwu ubọọn̄ ya ije, egbugbugbọ otutuuk mgban òkana ama Jeruselem okokop igwook isan̄a kpai.

¹⁵Nebujaradan, ogwu ibot ebi akọn̄ ìkibem ogwu ubọọn̄, okpukpulu usini ebi Ijeren ebi ìgbọgbọọn̄ ichit, mè ebi ìsisik me ama, igbaalek ebi ìkakana igọọk ogwu ubọọn̄ Babilọn, mè ebi usọ ikwaan̄ ìsisik, me usun̄ akọn̄ isa ifo Babilọn.

¹⁶Ire, Nebujaradan, ogwu ibot ebi akọn̄ ìkibem ogwu ubọọn̄, otetele usini ebi ìgbọgbọọn̄ ichit me lek ijọn̄ ya ibe ekesi ikwaan̄ me uko gerep melek uko kechilọ.

¹⁷Ebi Babilọn mîfaan̄ atà ekwe cha, mè ngugọọn̄ ekpirikpo mè Okwaan̄ ekwe òkup me Uwu Mbuban Okumugwem, mè ibeme otutuuk okpọkọ ekwe cha isa ifon Babilọn.

¹⁸Ema mîkpulu si okwa, mè orọk, mè sisini ekisa ikpaan̄ ekwut mkpukan̄, mè ewop inyan eje, mè uchieen̄ mè otutuuk nroon̄ ikwaan̄ geelek esabe ekwe irom, isa ije.

¹⁹Ogwu ibot ebi akọn̄ ìkibem ogwu ubọọn̄ ya, okpukpulu okwa cha, mè ngigọ nsensi cha, mè ewọp inyan eje cha, mè otin̄ cha, mè ngugọọn̄ mkpukan̄ cha, mè nkọm cha, mè ekpen̄ ngwugwa miin̄ egwogwook cha, mè otutuuk inu geelek esabe alata araran̄ irọ mè otutuuk inu geelek esabe alata okuket irọ, isa ije.

²⁰Ekwe ònan̄a me lek atà iba cha, mè Okwaan̄ mè akọp mè eriembuuk iba cha òkup me irak kan̄ cha, mè echi ònan̄a me lek ngugọọn̄ ekpirikpo cha, echi ogwu ubọọn̄ Solomọn orọbe inyi Uwu Mbuban Okumugwem, îraka inu mêkọtbe itọ ulobo kiban̄.

²¹Ujọn̄ọ atà cha ge ge ìre ejit ini mè okpọkọ, ekirikit ore ejit ita; akpọk kan̄ ge ìre otubọk ini, emen kan̄ ofok.

²²Ubene ejiik ekwe òkup me inyọn̄ ibot atà cha ge ge ìre ejit ge mè agbagba otubọk iba. Inu elọlọk mè pomegaranet eyi ekwe ke esa ibala lek ejiik cha ge ge ikana. Atà keyilọ mè pomegaranet kan̄ ìre inu yaage.

²³Akọp pomegaranet onaan̄ge mè gweregwen okup me agba; otutuuk otu ifuk pomegaranet òkakana inu elọlọk ya, ìre efit ge.

²⁴Ogwu ibot ebi akọn̄ ìkibem ogwu ubọọn̄ îtet si Seraya ogwu ibot ngwugwa, mè Jefanaya ogwu ngwugwa ògọgọọk, mè ene ita ebi ìkibem isotu, me usun̄ akọn̄ isa igbaalek ije.

²⁵Îtet ogwu ibot òkikpọ chieen̄ me lek ebi akọn̄, mè ene jaaba ebi nteme ogwu ubọọn̄ ebi emun̄be me emen ama, mè itet si ogwu òge ikpa òrere ogwu ibot ebi akọn̄, ogwu òkup me otuchieen̄ me lek iraria ebi ido isi akọn̄, mè akọp ene gweregwen ebi melek kan̄, ebi emun̄be me emen ama.

²⁶Nebujaradan ogwu ibot ebi ìkibem ogwu ubọọn̄ okpukpulu otutuuk ife chi, mè isa ema inu me lek ogwu ubọọn̄ ebi Babilọn me Ribila.

²⁷Ogwu ubọọn̄ Babilọn okpakpan̄ ema isan̄a me Ribila, me agan̄ ijọn̄ Amat. Ikeya ke ekwọọk ebi Juda me usun̄ akọn̄ isibi isan̄a me inyọn̄ ijọn̄ kiban̄.

²⁸Otu ifuk ebi Nebukadineja okpulube ifo me usun̄ akọn̄ ìre ikeyi: Me òso acha jaaba, obop ebi Ju ita mè akọp iba mè ita;

²⁹me òso akọp mè acha jeeta me lek mkpulu kè Nebukadineja, ìkpulu efit ene jeeta mè akọp ita mè iba me Jeruselem;

³⁰me òso akọp acha iba mè ita me lek mkpulu kè Nebukadineja, Nebujaradan ogwu ibot ebi ìkibem ogwu ubọọn̄ okpukpulu efit ebi Ju jaaba mè akọp ini mè go. Otutuuk ebi ekpulube me usun̄ akọn̄ onenire obop ene ini mè efit gweregwen.

³¹Me òso akọp acha ita mè jaaba eyi Jioyakin ogwu ubọọn̄ Juda okupbe me usun̄ akọn̄, me ukot mgbọ Efili Merodak okanabe ogwu ubọọn̄ me ido Babilọn, Efili Merodak onenisan̄a Jioyakin isibi me mkpọn. Inu ya ìrọ me òso akọp usen iba mè jaaba me òso akọp mè onyan̄ iba me acha ya.

³²Efili Merodak onenikitumu ikọ esuuk esuuk melek Jioyakin, mè ininyi ọmọ irek ulibi òbebene igak echi ofifi ebi ubọọn̄ kechilọ melek kan̄ ekupbe me Babilọn.

³³Jioyakin oneniwọọk ofọnti mkpọn isan̄a me lek, mè inibene ikigọọk isiki ikweek me lek ikasi inorie ogwu ubọọn̄ ikirie inorie otutuuk usen ugwem kan̄.

³⁴Ogwu ubọọn̄ Babilọn okekikpe sọn̄ mkpukpe me usen me usen inyi Jioyakin me otutuuk usen ugwem kan̄, mege ire usen îkwube.