Read obolo Jeri 6 Bible Online

Jeri 6 - obolo bible

Jeri 6

¹“Enyi ebi otoko kè Benjamin, ìlibi ekot ugwem! Ìlibi ìsibi me Jeruselem! Ìwut otita me Tekowa ìlook ebi ene! Ìtaba egop ulook me Bet Akerem! Mije, ùrioon̄ mè ikpele mfufiat òkinan̄a me agan̄ inyọn̄ inu.

²Mâjijaka ama Jeruselem isan̄a, ama ya òjajaan̄, mè ilọkọ lek.

³Ebi òkpukpo arọọn̄ mè urum arọọn̄ kiban̄ mêjibi inin̄ ọmọ lek; mêgwugwuun̄ uwu ọfọ kiban̄ ikana ọmọ, ogwu ikup, mômọnọ irek eyi kan̄.

⁴Ema mêkibe, ‘Ìbem lek ititim akọn̄ me lek kan̄! Ìnan̄a ìkeke, mè eji ejibi enin̄ me ikarek!’ Ema mêyayaka ibe, ‘Ayi-ee, egwe îjọkọ, utun òkikwala ichep.

⁵Ìnan̄a ìkeke, mè eji enin̄ me eririeen̄, mè ejijaka uwu mgban akọn̄ kan̄ cha egwook!’ ”

⁶Okumugwem Ogwukaan̄ Inyọn̄ mè Ijọn̄ ìtumu ibe ikeyi: “Ìkeen̄ uti ìgwook, mè ìsa ìnama obubot mbin akọn̄ ìchak me lek ama Jeruselem. Ebesusulu ama yi osusut, mije itututuku ene ìjojot me otutuuk emen kan̄.

⁷Ike mun̄ okigbuk isibi me emen udọn̄ mun̄, ikeya si ke ijo inu ama Jeruselem okigbuk. Ǹkinọ okput afa mè mfufiat okitaan̄ me emen kan̄, mè ikimun̄ orukan̄ mè unan kan̄ mgbọ geelek.

⁸Enyi ebi Jeruselem, ìbọkọ ufialek chi kubọk itaba ubọk me utọn̄, inyi nkasan̄a enyi ejit me lek, mè ìrọ ama kinyi ikana ama òyayat ita, eyi ene geege ìkpokọt iluk me emen.”

⁹Okumugwem Ogwukaan̄ Inyọn̄ mè Ijọn̄ ìtumu ibe ikeyi: “Ebejijijaka ebi Ijeren ebi ìsisik isan̄a, kubọk ekirọọn̄ lek olik gerep. Chiaan̄ ubọk week ebi geelek ìsisik, kubọk ogwu òkigbeme gerep okichiaan̄ ubọk iweek lek agọọk gerep.”

¹⁰Nnenibe, “Ekene ke mbatumu ikọ inyi, mè itaba ubọk me utọn̄, mè inọ? Utọn̄ kiban̄ ìgogon ichit, eya orọ, ema kpebekọkọt igban̄. Me lek kiban̄, ikọ Okumugwem îkana inu ekisa ichak imọm, ìkakitotop ema me lek.

¹¹Unaan̄-ejit Okumugwem ìjojot emi me emen, lek îwọ emi itetet ikaan̄.” Okumugwem onenibe emi, “Da unaan̄-ejit cha gwook me lek asa nsabọn me oyet, mè gwook me lek nsabọn irieen̄ me ere ema etitiin̄be; da gwook me lek olom mè nwa, mè ebi ugane, ebi ìkakan ikpukpọkọ.

¹²Nsinyana ubọk n̄a ida ebi ìluk me lek ijọn̄ yi, mêyaka uwu kiban̄, melek ijọn̄ uko, mè ebi nwa kiban̄, inyi ebi ofifi ene ekaan̄. Emi Okumugwem ntumu.

¹³Ema otutuuk ene ekimin ejit me lek ikakaan̄ ikpoko me ngan, ibene me lek ogwu òsisip ichit isi ire lek ogwu òmimin ichit; ebi nriran mè ebi ngwugwa ìre inu yaage, ema otutuuk ìre ebi ìfeen̄ ene.

¹⁴Ema ekigwa unan ebi n̄a inyọn̄ inyọn̄, kubọk ke unan ya ìkamin, mè ikibe, ‘Esuuk, esuuk,’ me mgbọ esuuk geege ìkakup.

¹⁵Ìre esip òkitet ema ni, mije mbuban inu chi ema ekirọ? In̄-in̄, esip geege ìkatet ema; ema kperọriọọn̄ esip. Eya orọ, ema mêkwaan̄ ililam me etete ebi ìkwakwaan̄; nsisulu ema osusut, ema mêrururọn̄ọ igwook me ijọn̄. Emi Okumugwem ntumu.”

¹⁶Okumugwem ìtumu si ibe ikeyi: “Ìkeke me usọk oniin̄, mè ìkpọ, mè ìdo ibe ejeen̄ enyi asabọn oniin̄ ukot ikaan̄ cha; ìdo agan̄ ata oniin̄ okupbe, mè ìje me lek oniin̄ keya, ke ibot ejit kinyi môkaan̄ isiki-efuuk. Ire, enyi ebebe, ‘Eji kpebeje me lek oniin̄ keya.’

¹⁷Nto ebi mbem inyi enyi, mè ibe enyi, ‘Ìgban̄ ida otita akọn̄!’ Ire, enyi ebebe, ‘Eji kpebegban̄.’

¹⁸Eya orọ, ebi ido geelek, ìnọ, enyi ebi ata-ikọ, ìkpọ inu òborọ ema.

¹⁹Linyọn̄, nọ: Mânisa ùrioon̄ itoon̄ ife chi, kubọk mfut ijo otitọt kiban̄; mije, ema kpegban̄ utọn̄ me lek ikọ n̄a, ema mîjit si ikan n̄a.

²⁰Ìre m̀basa nsensi ònan̄a me Sieba irọ keke? Sà anyanya utop olu cha ònan̄a me ido ujọn̄ọ ere ìkup me lek keke? Ngwugwa ewọwọp iriọk kinyi cha, ǹkabọkọ ìtap; ngwugwa kinyi kechilọ cha ìkatop emi me lek.”

²¹Eya orọ, Okumugwem ìtumu ibe ikeyi: “Mâto inu ichit oniin̄ ife chi. Ute mè bọn mêtọbọ ukot me lek, mè inan̄a irọn̄, mbuuruk mè unene mêkwaan̄ me lek.”

²²Okumugwem ìtumu ibe ikeyi: “Ìkpọ, ebi ife ge mêkinan̄a me ido agan̄ inyọn̄ inu; ikpele ido ge òkup me okputut linyọn̄ òkibem lek akọn̄.

²³Ema eteteen̄ ogbaan̄ mè otunwa iso ubọk; ema ìre ebi unye-ejit, kpekito ene nsan. Ida kiban̄ ìkikput kubọk okwaan̄, ike ema ekikọp me inyọn̄ inyinya akọn̄ kiban̄; ema ekinu kubọk ife ìdọdọmọ lek akọn̄ isan̄a; jei Jeruselem, îre lek kwun̄ ke ema ekinu.”

²⁴Ebi Jeruselem ekekitumu ibe: “Eji mînọ etip ebi ife cha, ubọk kiji owọwọ, mè iriọkọ igwook. Ufialek okekeme eji uyọt uyọt, ufiak kiji onyenye kubọk uman otet enenwaan̄.

²⁵Ebe ekasibi ìsi oron uko, ekajeje me lek oniin̄, ke ogwu ochicha îkaan̄ oge akọn̄ me ubọk; ukpook ìkakana ene me ijọn̄ okokop.

²⁶Jei ebi n̄a, ìtap ofọnti ufieejit, mè ìkpukpọt me ntọn̄; ìfieek ejit, mè ìto ujat ito, kubọk ekito inyi gwun̄ ibot ge òkwukwu; mije, ebi akọn̄ ìkichep ama ebenu eji lek me uwuuk-lek.

²⁷“Jerimaya, nto owu me etete ebi n̄a, kubọk ogwu òkitọ alata ikpọ, ufuna owu môkpọ ema, mè iwọlọ oniin̄ kiban̄ ikpọ.

²⁸Ema ìre ebi unye-ibot ejit onyebe gboi; ekije ikana ikitumu ene ifiat. Ema enye ejit kubọk ekwe mè okwukwut; otutuuk kiban̄ ìre ebi bukubuku ugwem.

²⁹Mêkifuuk ukan̄ unye unye isasa ikala oporolo, inyi okpa ita me lek; ire, oporolo keyi, ekikakala ikeya ichep, mije, ebi ikpak kpechieek inanan̄a isan̄a me etete ebi n̄a.

³⁰Ekigwen ema alata okuket ejitbe, mije, Okumugwem îjit ema.”