Read obolo Jeri 8 Bible Online

Jeri 8 - obolo bible

Jeri 8

¹“ ‘Me ike mgbọ ya, mêrọkọ ukwuuk ebi ubọọn̄ Juda mè ukwuuk ebi ibot mkpulu kiban̄, mè ukwuuk ebi ngwugwa, mè ukwuuk ebi nriran, mè ukwuuk ebi ìluk me Jeruselem, isibi me udọn̄-ufuun̄ kiban̄. Emi Okumugwem ntumu.

²Mêyiyala ukwuuk kiban̄ cha iwele ikana me inyọn̄ ijọn̄ me irak ura mè onyan̄ mè ebi kè ntoronyan̄ ìkup me akpa isinyọn̄, echi ema ekima, mè ikisi ikwaan̄ inyi, mè ikigọọk, mè ikiweek, mè ikitọbọ ebum inyi.

³Me ere geelek mâlilababe ebi ido ikpak yi isi igwook, ebi geelek mêsikbe me lek kiban̄ mêma mkpa igak ugwem. Emi Okumugwem Ogwukaan̄ Inyọn̄ mè Ijọn̄ ntumu.’

⁴“Tumu nyi ema ibe, ‘Okumugwem ìtumu ibe ikeyi: “ ‘Ogwu ònanan̄a irọn̄, ìre ìkakinan̄a ìkeke? Ogwu òlọlọ oniin̄, ìre ìkakiyaka ìgwu ìkom ni?

⁵Keke orọ mè ebi ife chi egwu ekom etele emi? Keke orọ ebi Jeruselem ekpọkpọ itet lek inye ikijit emi itele? Ema etetet ofiaan̄ inye me ubọk, mè ijit igwugwu ikom.

⁶Ngwuun̄ utọn̄ igban̄, mè inọ inu geelek; ema kpekitumu inu ònenen. Ene geege me etete kiban̄ ìkagwu ìkom me lek inu ikpak kan̄, mè ìtumu ibe, “Keke ke nrọ ilọ ikeyi mọnọ?” Ogwu ikup, ìkigọọk oniin̄ eyi kan̄, kubọk inyinya okilibi bûu inin̄ emen akọn̄.

⁷Aba mbese òkiwulu me inyọn̄, îriọọn̄ ibot mgbọ kan̄; ebi kè ekerekwukwu mè ùyọrọ mè òkpirinwan̄-ekeren̄ mîriọọn̄ ibot mgbọ ema ekika inu. Ire, ebi n̄a kperiọọn̄ Ikan Okumugwem.

⁸“ ‘Enyi ejeje ikitumu ibe, “Eji ìre ebi ìriọọn̄ inu, Ikan Okumugwem ìkup eji me ubọk?” Ìkpọ, ebi ìge ikpa mîsa uti ikpa ataak ige ataak itap me lek Ikan cha.

⁹Mêtap ebi ìriọọn̄ inu esip me isi; mêkpọk ema mbum, mè itet ema kubọk ufe otet anam. Eyi ema ejitbe ikọ Okumugwem, ìre kpasi iriọọn̄-inu ke ema ekaan̄?

¹⁰Eya orọ, mâyaka ebi nwa kiban̄ inyi ofifi ebirieen̄, mè isa uko kiban̄ geelek inyi ebi esese ife ekaan̄. Ema otutuuk ene ekimin ejit me lek ikakaan̄ ikpoko me ngan, ibene me lek ogwu òsisip ichit isi ire lek ogwu òmimin ichit; ebi nriran mè ebi ngwugwa ìre inu yaage, ema otutuuk ìre ebi ìfeen̄ ene.

¹¹Ema ekigwa unan ebi n̄a inyọn̄ inyọn̄, kubọk ke unan ya ìkamin, mè ikibe, “Esuuk, esuuk,” me mgbọ esuuk geege ìkakup.

¹²Ìre esip òkitet ema mije mbuban inu chi ema ekirọ ni? In̄-in̄, esip geege ìkatet ema; ema kperiọọn̄ esip. Eya orọ, ema mêkwaan̄ ililam me etete ebi ìkwakwaan̄; nsisulu ema osusut, ema mêrururọn̄ọ igwook me ijọn̄. Emi Okumugwem ntumu.

¹³“ ‘Mâbọkọ inu uko kiban̄ isan̄a ema me ubọk, mfut gerep geege ìkpokup me lek olik gerep; mfut figi geege ìkpokup si me lek uti figi, inwan̄ mfut uti chi môchiaak ita kpai. Inu geelek nnyibe ema, mônan̄a isibi ema me ubọk.[6] Emi Okumugwem ntumu.’ ”

¹⁴Ebi ene ekekibe: “Keke orọ eji ekpọkpọ ikat ubọk ikweek ibia me ere keyi? Ngwa, eji enetitiin̄, eji enelim efon ama mgban akọn̄ esi ekup, mè ekup me ere kecha ekwaan̄; mije, Okumugwem Awaji kiji îtumu ifieek ibe ke eji mêkwaan̄, mè inyi eji ujat mudim ibe eji enwọ, bak me lek eji erọbe ọmọ ijo inu.

¹⁵Eji ekikpọ chieen̄ ikakaan̄ esuuk, ire, ata inu geege kpunu; eji ekikpọ chieen̄ ibe mgbọ igwagwa mônu, ire, ìyaka inire uga ufieek-owot!

¹⁶Karake lek ijọn̄ ebi otoko kè Dan ke eji enọ inyinya ebi ochicha okigọt inu; ida orie inyinya kiban̄ òkisisik otutuuk lek ijọn̄. Ema ekinu inenijijaka lek ijọn̄ yi, melek inu geelek òkup me lek; mè inenijijaka ama yi, melek otutuuk ebi ìluk me emen.”

¹⁷“Ìkpọ, mâria ijijinu ijet enyi, ijo ulu cha echi ugwun̄ ìkpokọt itet, ema mêniloon̄ enyi. Emi Okumugwem ntumu.”

¹⁸“Jei, ǹkiweek ubelejit![7] Ufieejit îre emi lek, ejit n̄a îrọn̄ utọọk.

¹⁹Gban̄, ebi kiji mêkito ito me ido òjọjọn̄ọ ere; ema ekibe: ‘Ìre Okumugwem ìkakup me Sayọn ni? Sà ìre Ogwu Ubọọn̄ Sayọn kpunu me emen ama kan̄ mọnọ?’ ” Okumugwem otutumu ibe: “Keke orọ ema esabe mkpọmfaka kiban̄ initap emi unaan̄-ejit, inu ikike ekọkọ cha, ònan̄a me ofifi ido?”

²⁰“Mîrọkọ uko isan̄a, mgbọ ura îraka, ire, kpenyan̄a eji.”

²¹Mije unan òre ebi kiji lek, unan îre emi lek si; ǹkup me ufieejit, jakajaka îjijit emi igwook.

²²Ìre aran̄ igwa unan kpunu me Giliadi ni? Sà ìre ogwu ofia kpunu me ama ya? Keke orọ kpegwa unan ebi kiji, inyi ita ni?