Read obolo Ito 1 Bible Online

Ito 1 - obolo bible

Ito 1

¹Jei, ama Jeruselem înọọn̄ ilaak ukpọk, ama ere ebi ene ekijot inwaan̄! Jei, îkana nwakpa, ama mgbọ òre ilile me etete ido geelek! Ama òkup kubọk nwa ogwu ubọọn̄ me etete ido geelek, îkana ogwu usun̄ òkisi ikwaan̄ me òbọp mgbọ keyi.

²Ìkitoto ito ijat chieen̄ me eririeen̄, mun̄ ito îra ikigbọọk igwook me agba otu kan̄. Otutuuk ebi ima kan̄, kpunu ogwu òkakat ọmọ ejit. Otutuuk ebi une kan̄ mîfiaan̄ ọmọ ifiin̄, ema mîkana ebi ochicha inyi ọmọ.

³Ebi Juda mîlibi ekot akọn̄, mije kwulukwulu mè uga ikwaan̄. Ema mîluk me etete ebi ido geelek, kpekaan̄ isiki-efuuk. Otutuuk ebi ìkililaba ema mîsoon̄ ema, me ere ema kpekọt inwọnọ.

⁴Otutuuk oniin̄ Sayọn ìkup me ufieejit, mije, kpunu ogwu òkije me lek oniin̄ cha inu ijọk. Otutuuk otunchit kan̄ îgbugbọ igwook, ebi ngwugwa kan̄ mêkito mfi; ebi nsabọn ibaan̄ kan̄ mêkiyiyọọk, ọmọ me lek kan̄ ìkup me uga ujaralek.

⁵Ebi oriara kan̄ mîkana ebi ibot inyi ọmọ, inu îje ijaan̄ me lek ebi ochicha kan̄, mije, Okumugwem îtap ọmọ uyọrọlek me lek bak me lek ogbogbo ijo inu îrọbe. Mîkpulu nsabọn kan̄ agam agam, ema ekekije me isi ebi oriara kiban̄ isi inin̄ me usun̄ akọn̄.

⁶Otutuuk òrirọ ama Jeruselem îjijaka ita isan̄a kpai. Ebi ibot mkpulu kan̄ ekup me uraafiọọn̄, kubọk ebi kè ogaan̄ sanasana iko ekamun̄ge mbubet ìtaka, ebi kpekaan̄ efuuk ekot ilibi inwọnọ ogwu òkigọọk ema.

⁷Mgbọ Jeruselem okupbe me emen ukwook mè nyanya, îkeek otutuuk inu ubọọn̄ cha îkaan̄be me ukot ikaan̄; mgbọ ebi kan̄ erọn̄be inin̄ ubọk ebi oriara, kpunu ogwu ntap-ubọk. Mgbọ ya, ebi ochicha kan̄ mîmun̄ ọmọ orọn̄be, mè ikichak ọmọ me imọm.

⁸Jeruselem îrọ ijo inu enenen, mè ikana ikup kubọk ifin. Otutuuk ebi ìkimin ọmọ mîkpọ ọmọ chieen̄ isiki, mije, ema mîmun ọmọ njak isan̄a. Ọmọ ìnikitoto mfi, mè ichiik lek itap.

⁹Orieen̄ kan̄ îken ọmọ ire lek ekwut inyọn̄ ebon, ìkakekeek inu òborọ me mgbọ òkinu me isi kan̄. Irọn̄ kan̄ îriki ọmọ lek, ìkakaan̄ ogwu òkakat ọmọ ejit. Eya ke îtaan̄ ukpo ibe, “Jei Okumugwem, kpọ, ukwook òkitet emi, ogwu ochicha îtim ikpan̄ emi.”

¹⁰Ogwu ochicha îkwọọk otutuuk inu ubọọn̄ kan̄ ifo. Ọmọ îmun̄ ebi esese ido ekinin̄ ere mbuban kan̄, ido cha ebi owu otapbe ikan ikwek, ibe ekanin̄ me ntitiin̄ kwun̄.

¹¹Otutuuk ebi kan̄ mêkito mfi ikiweek inorie; ema ekisa inu ubọọn̄ kiban̄ inwene inorie, inyi ema egagat ugwem. Ọmọ ìkibe, “Jei Okumugwem, kpọ ma, mè kaan̄ nket ofolek, mije, mêkigwen emi urieek.”

¹²“Otutuuk kinyi ebi ìkije iraka, ìre ìkayọt enyi me lek ni? Ìyaka chieen̄ ìkpọ-nu, mè ìmun̄. Ìre ekene orak imun̄ ojelek ukwook keyi ònitoon̄ emi, eyi Okumugwem osabe initoon̄ emi me lek me usen uyok uyok unaan̄-ejit kan̄?

¹³Îria ukan̄ me akpabin inyọn̄ igwook me emen ukwuuk n̄a, itataka otu ukwuuk n̄a iriọk. Îkọọk ufe njin iban ukot n̄a, mè isa irieen̄ emi igwu ikom. Îrọ emi ǹkana ogwu ejitbe itele, mè ogwu orukan̄, usen geelek.

¹⁴Mîbọp nrọ-nlọ n̄a kubọk ekibọp ọgbọn, ọmọ osa ubọk kan̄ gaalek ikpa olik me lek, mè iben itọp ikwaan̄ emi me ebek; Ogwukaan̄-ene îrọ ibe otutuuk unye n̄a iwọ idek; îyaka emi itap me ubọk ebi m̀kpabakọt ikeke ida.

¹⁵“Otutuuk ebi usọ akọn̄ ìkup me emen n̄a, Ogwukaan̄-ene ìkpọkpọ ema isiki chieen̄; îsi idimi urum akọn̄ inu me lek n̄a, ibe initun̄ nsabọn irieen̄ n̄a ikpukpuku. Ogwukaan̄-ene îjak Jeruselem[1] ama ibot ido Juda ikpukpuku, kubọk ekijak gerep ichimi mun̄ isibi me lek.

¹⁶Mije inu kechi, ito ito ke nkito; mun̄ mun̄ okigbọọk emi me chieen̄, mije, ogwu mokat emi ejit îjọn̄ọ ere, kpunu ogwu môtapbe emi ugwem me emen. Nsabọn n̄a ekibubeek chieen̄ chieen̄, mije, ubọk ogwu ochicha înye igak ema.”

¹⁷Sayọn înyana ubọk iweek ntap-ubọk, ire, kpunu ogwu òbokat ọmọ ejit. Okumugwem ìnyinyi ida ikeme Jekọp, ibe ke ebi ìluk ikana ọmọ mêre ebi ochicha kan̄; Jeruselem îkana ten̄ten̄ inu me etete kiban̄.

¹⁸“Okumugwem ìre ogwu ata irọrọ, mije, îre emi nje ikeme ikọ otu kan̄. Enyi otutuuk ebi ife geelek ìgban̄, mè ìkpọ ufieejit òkup inyi emi. Obaak nsabọn ibaan̄ n̄a mè nsabọn irieen̄ n̄a mîsi inin̄ me usun̄ akọn̄.

¹⁹“Ngween̄ ebi òma n̄a, ire, ema efafiaan̄ emi. Ebi ngwugwa n̄a mè ebi ugane n̄a, mîkwaan̄ isan̄a me emen ama, me mgbọ ema ekiweek inorie mêriebe igat ugwem.

²⁰“Jei Okumugwem, raan̄ chieen̄ kpọ emi, ǹkup me emen ufialek; owot òkiyọọk emi, ejit òkiyok emi, mije, mkpaka ibot enenen inyi owu. Eya orọ, isibi oyet, oge ònin̄ ene ebek, ikup me uwu, eya ore mkpa.

²¹“Mfi nkito înin̄ ebi ene utọn̄, ire, kpunu ogwu òkat emi ejit. Otutuuk ebi ochicha n̄a mînọ ukpatu ijo irek n̄a, ejit okekibele ema mije inu owu orọbe emi; rọ ibe usen osusut odọmọbe isun̄ ya ire, inyi ema mênikup kubọk emi nkupbe.

²²Kè otutuuk ijo inu kiban̄ inigwuun̄ me isi kwun̄; ubọk orọbe emi mije otutuuk ijo n̄a, rọ ema si ikeya. Nto mfi iwa enenen, ejit n̄a ìkup me orukan̄.”