Read obolo Ito 2 Bible Online

Ito 2 - obolo bible

Ito 2

¹Jei, Ogwukaan̄-ene îsa oduku unaan̄-ejit kan̄ ikana ichit ama Sayọn bùk! Me usen ejit kan̄ onaan̄be, îben òrirọ eyi Ijeren me akpabin inyọn̄ itọbọ ito me ijọn̄, ìkakekeek ere ibene ukot kan̄, òrere Uwu Mbuban kan̄.

²Ogwukaan̄-ene îjijaka otutuuk ere ebi kè Jekọp elukbe, ìkakaan̄ ema nsan geege me lek. Îsa me unaan̄-ejit igbugbọ mgban akọn̄ ebi ido Juda igwook me ijọn̄; îda mkpulu kiban̄ mè ebi ibot mkpulu kiban̄ igwook, mè ichaka ema mbuban me lek.

³Îsa me uga unaan̄-ejit kan̄ ijijaka otutuuk unye ebi Ijeren ekaan̄be isan̄a. Îsan̄a ubọk ulom kan̄ ya îkisa inyan̄a ema isan̄a me mgbọ ogwu ochicha kiban̄ onube. Ìkisak igbaan̄ ere me etete ebi kè Jekọp kubọk alọm ukan̄ okitaka inu geelek òkakana ọmọ iriọk.

⁴Înwun ogbaan̄ kan̄ kubọk ogwu ochicha; ubọk ulom kan̄ ìbebem lek isan̄a ikup kubọk ogwu oriara. Ebi geelek ìjajaan̄ me chieen̄ ene, îkpan̄ otutuuk isan̄a; îda uyok uyok unaan̄-ejit kan̄ igwook kubọk ukan̄ me ere ebi ama Sayọn ekiluk.

⁵Ogwukaan̄-ene ìnikup kubọk ogwu ochicha; îjijaka Ijeren isan̄a kpai, îjijaka uwu ebi ubọọn̄ kan̄ igwook; îgbugbọ mgban akọn̄ kan̄ ito, mè itap ito mè ufieejit ijot etete ebi Juda.

⁶Îgwak Uwu Mbuban kan̄ igwook kubọk ìre uko, mè ijijaka ere ebi ene ekinititiin̄ itọbọ ebum inyi ọmọ. Okumugwem îrọ ebi Sayọn ewuuk ijọk ibot acha înyibe, mè ewuuk si Usen Mbuban; îsa me uga unaan̄-ejit ijit ogwu ubọọn̄, melek ogwu ngwugwa.

⁷Ogwukaan̄-ene îjit ntook ngwugwa kan̄, mè ijit Uwu Mbuban kan̄ itele. Îkana mgban òkana uwu ebi ubọọn̄ ama Jeruselem itap me ubọk ogwu ochicha. Mîdimi ukpo me Uwu Mbuban Okumugwem kubọk ekirọ me usen ijọk ibot acha.

⁸Okumugwem îben me ejit igbugbugbọ mgban ama Sayọn igwook. Îsa olik itọ isan̄a iriọọn̄ ike ìborọ, ìkayat ubọk me lek. Îrọ mgban ile mè mgban ija ibọkọ uyọt, mîgbaan̄ isi mè udun̄ ikpukpuku igwook.

⁹Otunchit Jeruselem îgwọt inin̄ ijọn̄, ọmọ îfaan̄ olọkọrọ otunchit cha ijijaka. Ogwu ubọọn̄ mè ebi ibot me usun̄ akọn̄ me ofifi owuwa ido, ikan ìkayaka ìkup ofifi. Ebi nriran kan̄ kpeyaka imun̄ ilaak ọkpọchieen̄ geege ònan̄a me ubọk Okumugwem.

¹⁰Ebi ugane ama Sayọn esiki ikweek me ukpọk ijọn̄, kpesan̄a amọn; ema mîgwọ ntọn̄ igwook me ibot kiban̄, mè itaak ofọnti ufieejit. Obaak ebibaan̄ ebi Jeruselem mîkana isi ichit me ijọn̄, mije esip.

¹¹Nto ito ichat mun̄ me chieen̄, ǹkat îyọọk emi me owot, olulut n̄a îbum igwook ire ijọn̄, mije, mîjijaka ebi n̄a igwook. Asa nsabọn mè nsek bọn mêkigak ene iweek me lek oniin̄ me emen ama.

¹²Mgbọ ema ekirurọn̄ọ me oyet ile ama kubọk ebi akọn̄ unan onin̄be lek igbet mkpa, mè ikikwaan̄ ibia me ubọk nga kiban̄, ema ekidido ebi nga kiban̄ ibe, “Mọmọ inorie? Mọmọ miin̄?”

¹³Jei, gwun̄ enenwaan̄ Jeruselem, keke ke mâsa irọ ata-ikọ inyi owu, keke ke mâsa owu itọ me lek ni? Jei, ujuja ama Sayọn, keke ke mbamọnọ ìkike me lek kwun̄, inyi ǹkọt ǹkat owu ejit? Unan kwun̄ îdọk kubọk okwaan̄; ekene obokọt igwa owu itet?

¹⁴Nriran ebi nriran kwun̄ ekiben inyi owu cha, ìre ofiaan̄ ofiaan̄, mè ataak ataak; ema kpesan̄a ijo inu kwun̄ isibi ijeen̄ owu, eyi mesabe ida usun̄ akọn̄ onin̄be isan̄a. Ilaak ọkpọchieen̄ cha ema ekimun̄ inyi owu, ìre ofiaan̄ ofiaan̄, mè nlilọ nlilọ.

¹⁵Ebi ìkije iraka me oniin̄ imun̄ owu, ekisulu ubọk inyi owu; ema ekichak owu me imọm, mè ikisisik ibot inyi owu ama Jeruselem, mè ikido ibe, “Ìre ama ekibe ìre ama òjaan̄ uja ichit ya ire eyi? Ìre ama ekibe ìre unwọọn̄ otutuuk ebi linyọn̄ ya ire eyi?”

¹⁶Otutuuk ebi ochicha kwun̄ echichili otu ibook owu me lek; ema ekiriak lek, mè ikiban̄a otu. Ema ekibe, “Eji mîjijaka ọmọ isan̄a. Usen ya eji ekikup ikpọ ire eyi; usen ya îra ire, eji mîsa chieen̄ kiji imun̄.”

¹⁷Okumugwem îrọ inu ya îdọmọbe isun̄; îrọ ikọ kan̄ iso, ikọ ya eyi înyibe otu karake akat. Îjijaka owu isan̄a, ìkato nsan. Îrọ ogwu ochicha inwọọn̄ unwọọn̄ me ibot kwun̄, mè itap ogwu oriara kwun̄ unye me lek.

¹⁸Ebi ene mîsa otutuuk ejit kiban̄ itaan̄ ukpo igwen Ogwukaan̄-ene. Jei, mgban ama Sayọn, tele mun̄ ito kwun̄ ikigbọọk kire okwaan̄, egwe geelek mè eririeen̄ geelek; kasiki efuuk, kanyinyi si chieen̄ kwun̄ irek.

¹⁹Nan̄a keke, taan̄ ukpo me eririeen̄, me mgbọ geelek ebi mbem ekinwene ene. Gbuku inu òkup owu me ejit gwook kubọk mun̄ me isi Ogwukaan̄-ene; bene ubọk kwun̄ beek ọmọ mbeek me ibot ugwem bọn kwun̄, ebi ìkigak iweek inyi uraafiọọn̄ me otutuuk ibot oniin̄ geelek.

²⁰“Jei Okumugwem, kpọ, mè kaan̄ ekiket ofolek! Ìre ekene ene ke owu orak irọ ikeyi? Ìre ebibaan̄ mêtaka bọn kiban̄ ni, nsabọn ema ekpukpobe isibi? Ìre mêkpan̄ ogwu ngwugwa mè ogwu nriran me ere mbuban Ogwukaan̄-ene ni?

²¹Nsabọn mè ugane mîgbaan̄ ililam ibia me ijọn̄ me lek oniin̄; nsabọn irieen̄ n̄a mè nsabọn ibaan̄ n̄a, oge akọn̄ înin̄ ema ebek; owu osọp ema igwook me usen unaan̄-ejit kwun̄; owu okpan̄ ema, òkato njijin.

²²Owu ogwen ebi ìluk ikana emi ititiin̄ kubọk ògwen ene usen ijọk ibe enetap emi ukpook me lek. Me usen unaan̄-ejit Okumugwem, kpunu ogwu ònwọnwọnọ, kpunu ogwu òsisik; ebi mmanbe, mè ikpukpo isibi, ogwu ochicha n̄a îkpaan̄ isan̄a kpai.”