Read obolo Ito 3 Bible Online

Ito 3 - obolo bible

Ito 3

¹Emi nre ene ya òmumun̄ ujaralek me ubọk m̀gbele eyi uga unaan̄-ejit kan̄.

²Ìlalap emi isibi ito, mè irọ ǹkenje me emen udun, kpan̄asi utoon̄.

³Me atikọ, îyaka ubọk kan̄ ida emi, mè ikisut emi owuwa owuwa mgbọ, kpa usen kpa usen.

⁴Îrọ mè akpalek n̄a mè ufuk n̄a ikan isan̄a, mè ifaan̄ ukwuuk n̄a.

⁵Îsa ujaralek mè ukwook ikpa mbin ikana emi okokop.

⁶Îrọ emi ǹluk me emen udun kubọk ebi ìkwakwaan̄ karake akat.

⁷Îgwuk edek ikana emi, m̀kpakọt isibi; îsa mkpọn òlolobo igon emi ikam.

⁸Ikerere ǹtataan̄ ukpo, mè ito ito iweek ntap-ubọk; ìkararaan̄ utọn̄ ìgban̄.

⁹Îsa ewuuk ebabak iwak oniin̄ n̄a ichit, mè irọ oniin̄ n̄a ikukọnọ.

¹⁰Ọmọ îkana ibo nriọk ituun̄ ikup ikikpọ emi itetet, mè ikana egbe àtat ilet ibochim emi.

¹¹Îtaba emi isan̄a me lek oniin̄, mè igwak emi iche, mè isun̄ emi ukpọk ukpọk.

¹²Înwun ogbaan̄ kan̄, mè itet otu oraan̄ kan̄ itat emi me lek.

¹³Oraan̄ òsibi me akpa oraan̄ kan̄, înin̄ inwaan̄ emi me lek ekpin.

¹⁴Nkana inu ochak inyi otutuuk ebi n̄a, ema ekikọt emi me okwa ochak usen geelek.

¹⁵Înyi emi inu òjajat ǹnwọ ǹjot, mè inyi emi olulut ǹnwọ ǹdek.

¹⁶Îsa gwun̄ ewuuk ifaan̄ emi ejeek, mè irọ inyi ǹken ntọn̄.

¹⁷Îrọ inyi nkakaan̄ esuuk, mè irọ inyi m̀wuuk inu ata irek orebe.

¹⁸Eya ke nnibe, “Òrirọ n̄a îta inọọn̄, inu mkpọbe chieen̄ me ubọk Okumugwem îlọ emi.”

¹⁹Ikekeek ujaralek n̄a mè nyanya nkinyinya, ìre ujat mè olulut inyi emi.

²⁰Me atikọ, nsikikeek inu chi, îra ikisisaak emi ibot ejit.

²¹Ire, inu nkikeek, mè ikisa me ikeya ikaan̄ ikpọchieen̄ ìre ikeyi:

²²Imumechieen̄ Okumugwem ìkakita,[2] mije, ejit nsan kan̄ ìkakaan̄ itata.

²³Ewelegwe geelek, ìkire ayaya; owu ogbe utoon̄-ejit enenen.

²⁴Ikeya ke ntumu ibe, “Okumugwem ore ìrot n̄a, eya orọ, nkaan̄ ikpọchieen̄ me lek kan̄.”

²⁵Okumugwem înwọn melek ebi ìtoon̄ ọmọ ejit me lek, mè inwọn si melek ebi ìkiweek ọmọ.

²⁶Înwọn ibe ene isusuuk lek ikup ikikpọ unyan̄a eyi Okumugwem.

²⁷Înwọn ibe ene ikween̄ ubọk ekibeme akpan kan̄ bene me mgbọ ọmọ orebe sọntiik gwun̄.

²⁸Ene ya iriaan̄ otu isiki ikweek ọmọ gaalek, mije, îre Awaji obene akpan ya itoon̄ ọmọ.

²⁹Ene ya isiki lek kan̄ ire ijọn̄, usini mgbọ, ikpọchieen̄ môkọt ikup inyi ọmọ.

³⁰Ene ya iyaka agba otu kan̄ inyi ogwu òsulu ọmọ, mè ibọkọ esip ijot owot.

³¹Mije, Ogwukaan̄-ene ìkakijit ogwu ebilene ìtele ìre mgbọ geelek.

³²Ikerere ìtatap ene ufieejit me lek, ìkikakaan̄ njijin; imumechieen̄ kan̄ òkibia ene me lek îmin enenen.

³³Ìkakigegen ibak ìsa ujaralek ìjet ene, ìkakigegen si ibak ìtap ebilene ufieejit me emen.

³⁴Ijajak otutuuk ebi mkpọn me lek ijọn̄ me irak ukot,

³⁵mè ijijit ene unen kan̄ me isi Ogwu Òbebene Ichit,

³⁶mè itetele isisibi unen oyerebet inyi ene, otutuuk chi ìre inu Ogwukaan̄-ene ìkaweweek imumun̄.

³⁷Ekene obokọt itumu ikọ, mè ikọ ya orọ, ire Ogwukaan̄-ene ìkanyi ida?

³⁸Ìre ìkare me otu Ogwu Òbebene Ichit ke ata mè ijo okinan̄a isibi?

³⁹Ìre ogwu ebilene òkup me ugwem môkisọkọ otu, mgbọ ekisut ọmọ osusut mije ijo inu kan̄?

⁴⁰Eji etap chieen̄ ekpọ oniin̄ kiji, mè ewọlọ ekpọ, mè egwu ekom enu me lek Okumugwem.

⁴¹Eji ebene ejit kiji mè ubọk kiji eriaak uriaak enyi Awaji me akpabin inyọn̄ ebe,

⁴²“Eji mîrọ ijo inu mè ikpaka ibot, owu òkatele ìnyi eji.

⁴³Owu otap unaan̄-ejit ikana ichit lek, mè irieen̄ eji isan̄a; owu okpan̄ eji, òkato nsan.

⁴⁴Owu osa oduku inyọn̄ igwuk ikwek lek kwun̄, inyi uriaak geege ikatibi ìre owu lek.

⁴⁵Owu orọ eji ekana otiton mè nsak me etete ebi ife geelek.

⁴⁶Otutuuk ebi ochicha kiji mîchili otu kiban̄ ibook eji me lek.

⁴⁷Ukpook îtet eji lek, eji mînin̄ me ufe; eji ekup me emen ubọk jakajaka mè mfufiat.”

⁴⁸Mun̄ ito ìkigbuk emi me chieen̄ kubọk okwaan̄, mije, mîjijaka ebi n̄a isan̄a kpai.

⁴⁹Ito ìkpota emi me chieen̄, ìbokpọkpọ ikigbuk,

⁵⁰mege Okumugwem môkupbe me akpabin inyọn̄ isiki chieen̄ ikpọ, mè imun̄.

⁵¹Inu nsabe chieen̄ n̄a imun̄ ofolek ebibaan̄ ama n̄a, îtap emi ufieejit igak ejit.

⁵²Ebi ochicha n̄a ekigọọk emi kubọk ogwu ota ogọọk unọn, me kpunube inu geege nrọbe ema.

⁵³Ema mîtọp emi itap me emen udọn̄, mè iteen̄ ewuuk isa ikitọbọ emi.

⁵⁴Mun̄ îmeen̄ emi ire ibot, mbebe ke nra ichep.

⁵⁵Nkukup me emen udọn̄ irak ijọn̄ ya igwen erieen̄ kwun̄, jei Okumugwem.

⁵⁶Owu onọnọ ida n̄a mgbọ nkibe owu, “Kachit utọn̄ kwun̄, nọ ida ukpo nkitaan̄ iweek unyan̄a.”

⁵⁷Owu ojeje igbet me usen ngwenbe owu, mè itumu inyi emi ibe, “Katet ukpook.”

⁵⁸Ogwukaan̄-ene, owu otumu ikọ ibot n̄a; owu onyan̄a ebek ugwem n̄a isibi.

⁵⁹Okumugwem, owu omun̄ mfeen̄ efeen̄be emi. Bọkọ oyerebet n̄a sibi!

⁶⁰Owu omun̄ otutuuk ijo ejit ema ekaan̄be, mè otutuuk ijo otitọt ema ekitọt ibak emi.

⁶¹Jei Okumugwem, owu onọ ikọ unyechieen̄ kiban̄, mè otutuuk ijo otitọt ema ekitọt ibak emi.

⁶²Owu onọ inu ebi ìkirọ ikeme emi ekinunuun̄ me otu ibak emi ibene me ewelegwe ifit egwe.

⁶³Kpọ, mè ìre ekwekweek irek, mè ìre ekekeke me ukot, emi ke ema ekikọt me okwa ochak.

⁶⁴Jei Okumugwem, kpe ema mkpukpe ògbe ema me lek inu ubọk kiban̄ orọbe.

⁶⁵Tap ema ètele; kè ogbo kwun̄ ibia ema me lek!

⁶⁶Sa unaan̄-ejit gọọk ema, mè jijaka ema san̄a me irak akpa isinyọn̄ Okumugwem.